Read Kahua HAGONEGAHANI 14 Bible Online

HAGONEGAHANI 14 - Kahua bible

HAGONEGAHANI 14

¹Na maneraha ge he o Amarapele ni Babilonia, o Arioko ni Elasare, o Ketorelaumere ni Elama mo Titale ni Goimi,

²ngaira ka meraheariha na maneraha getera gi rima: o Bera ni Sotome, o Birisa ni Gomora, o Sinaba ni Atema, o Semebere ni Seboimi, ma na maneraha ni Bela se Soare.

³Na maneraha gi rima ngegana ngaira ka heaganari ma ka hakura na mane ni me iata igê na maruguna i Sitimi, ga hêtana i ngekê vi Asime.

⁴O Ketorelaumere ki marungira me surigi na harisi tangahuru matarerua, ma igê na tangahuruta matara oru na harisi ngaira ka usitenia ma ka urapusia.

⁵Igê na tangahuruta matara ke he na harisi o Ketorelaumere ma na tamana ka merarâ me na mane ni me iata ma ka teharira na Repaimi i Aseterote-Karanaimi, ma na Susita i Hama, ma na Emita igê na bena i Kiriataimi,

⁶ma na Gorita igê na hungani i Seiri. Ngaira ka tarigenira rârâ ma ka tariha i Eleparana na agua i haganega igê na bagamasusu raha.

⁷Ma i ngekana ngaira ka kariarigu ka aporo tanga i Katesi, ga hêtana i nago vi Enemisipate. Ngaira ka henahuraugi na mako iata na Amalakita ma ka teharira na Amorita, ga oga i Gasesone-Tamara.

⁸Ma hemuri na maneraha ni Sotome, ni Gomora, ni Atema, ni Seboimi ma ni Bela ngaira ka katora na mane ni me iata ka ura harahara hehigetigi tanga na hearihatana igê na maruguna i Sitimi.

⁹Ngaira ka meraheariha na maneraha ni Elama, ni Goimi, ni Babilonia me Elasare. Na maneraha gi rima ka meraheariha na maneraha getera ge he.

¹⁰Na maruguna ki kirukiru ngavê. Matena na maneraha ni Sotome me Gomora karu gavatenia na hearihatana, ngairerua karu vota i raroni na kiru, ma na maneraha gi oru na tamaterua ngaira ka gava tangagi na hungani.

¹¹Na maneraha ge he getera ka rurugurerua hagenani i Sotome me Gomora henigi na ngauha ma na togoha ma ka migiaporo i pasita.

¹²Ngaira ka henahuraua nikâ o Loti o mona o Abaramo henigi na nahuninga hato iana, suria ngaia ki oga i Sotome.

¹³Ma ta na mane ki gava ma ki hagarongoa o Abaramo na Hebereo renigi na ara ni marâ ngegana. O Abaramo ki oga hagarangia na apinige apuna iana o Mamere na Amorita. O Mamere mo Esekole mo Anere o vesina, ngaira ka na tamana o Abaramo.

¹⁴Matena o Abaramo ki rongoa, vi o mona ka henahuraua, ngaia ki unihakura me na ara ni mane ni me iana. Ngaira hato ka vora 318. Ngaira ka tarigenira na maneraha ge he, ka merarâ ma ka tariha i Tane.

¹⁵Ma i ngekana o Abaramo ki voasira igê na mane ni me iana, ki taharira na merongana igê na bungiana ma ki teharira. Ngaia ki tarigenira rârâ ma ki tariha i Goba i na apanena râ i Tamasiko.

¹⁶Ngaia ki toregi aporo na ara ni marâ na merongana ka rurugugi. Ngaia ki torea aporo o Loti o mona henigi na nahuninga iana ma henira na gete ma na enoni getera, na merongana ka henahuraura.

¹⁷Matena o Abaramo ki teharira hato o Ketorelaumere ma na maneraha getera, ngaia ki aporo me. Ma na maneraha ni Sotome ki râ vurusia ma ki mehetarahu igê na maruguna i Save, ga hêtana nikâ vi na maruguna iana na Maneraha.

¹⁸Ma o Melekiseteki, i maneraha i Saleme ma ki mane ni vogasiha iana God raramohaga hunia, ngaia ki migirâ na bereti ma na vaini tanga o Abaramo.

¹⁹Ngaia ki nungia God tanga o Abaramo, ki vi:

²⁰“Na God raramohaga hunia, i hagavorarerua na vavearo ma na ano, ke korokoro tangago o Abaramo. Ge hagarahasia na God raramohaga hunia, i katogo ko teharira na merongamu.” Mo Abaramo ki vatea o Melekiseteki na ara ni tangahuruta na marâ, i tavogi aporo tenira na merongana.

²¹Na maneraha ni Sotome ki vi tanga o Abaramo, ki vi: “Gu nakagi ma vê na ara ni marâ, nga noga ma na kariaku kê obanira vigo vateê aporo.”

²²O Abaramo ki arami, ki vi: “Inê kê tohe i maana na Araha God raramohaga hunia, i hagavorarerua na vavearo ma na ano,

²³vi inê ki asa, be page nahunigi na ani mavê na marâ iamu, naka ma na varo na buti, i era ma ko vi, vi igo ko katoê kê ruruguha.

²⁴Inê kê pe têgi so ta na marâ tangê mareku, nga noga ma na urusini na marâ iata na mane ni me iaku. Ma na tamaku o Anere mo Esekole mo Mamere ki koro ma, ga nahunigi na anita na marâ mi henahuraugi aporo.”