Read Kahua HAGONEGAHANI 15 Bible Online

HAGONEGAHANI 15 - Kahua bible

HAGONEGAHANI 15

¹I murina ngekana o Abaramo ki marute, vi na Araha ki vi tanga, ki vi: “Abaramo, siana ko magu. Inê ka na bêata iamu. Inê be anumasigo tenigi na ani mavê na eraha. Inê be mamahata ngavê tangago.”

²Ma o Abaramo ki arami, ki vi: “Araha God iaku, na mahatanga iamu ki girara i tamaniê marata, suria inê kê pe apara kare? Ngaia ma o Eliesere ni Tamasiko kani page nahunigi na nahuniga hato iaku, matena gê meme.

³Igo ko pe katoê be apara kare. Na hitangita na kare vurivuri iaku kani page nahunigi na nahuninga iaku, matena gê meme.”

⁴Ma na Araha ki tamasi nikâ tanga o Abaramo, ki vi: “O Eliesere ngekana ki asa, vige page nahunigi.”

⁵Na Araha ki mehura o Abaramo ma i metara ngaia ki vi tanga igê, ki vi: “Gu bâsigi akê na higu i vavearo. I hega, i arari ma vari vigo tomanigi? I bara ngavê. Oi, na raraha iamu ka page rakorako teha ngavê manga ngegana.”

⁶O Abaramo ki tongesuria na Araha. Tahema na Araha ki obakoro renia, suria na parongana ki koro i maana.

⁷Hemuri na Araha ki vi tanga o Abaramo, ki vi: “Inê nga ki na Araha. Inê nga kê bêngenigo hura tenia i Uru i Babilonia, hanana gê haganahunigo renia na mako ngekê.”

⁸Mo Abaramo ki hagate, ki vi: “Araha God iaku, manga i he kê girara, vi ngaia ki na aniku?”

⁹Na Araha ki arami, ki vi: “Gu torera me na puruka, na goti ma na sipi mane i tongatonga na harisi gi oru iata, ma nikâ na gâ ma na barisumata.”

¹⁰O Abaramo ki torera me. Ngaia ki tarira hagaoto i gupu na puruka, na goti ma na sipi, ma ki naka harahara ta apaneni ma ki naka harahara nikâ ta apaneni. Ma na manu ngaia ki pe tarira hagaoto i gupu.

¹¹Na manu raha ka vato me, viga ngaugi, ma o Abaramo ki tarigenira.

¹²Matena i su noga na arito, o Abaramo ki mêru bore, ma na maguha raha ki râ me tanga.

¹³Na Araha ki vi tanga, ki vi: “Na raraha iamu ka page mamahuara igê na agua getea. Ngaira ka page vora re na kare vurivuri i ngekana ma ka page mamasiaga igê surigi na tangarê harisi ge he.

¹⁴Ma inê kê page hagaitangira na enoni i ngekana, ga hagamamasiagara. Ma hemuri ngaira ka page migihura na ruruguha raha tenia i ngekana.

¹⁵Igo ko page meme igê na matena go gemêa ki ararigo. Go page meme bâkoro ma ka page bagigo.

¹⁶Na heta na apaparaha ka page aporo me ikê, suria igê na matena ngekana inê kê page hagaitangira igê na Amorita, ga oga ikê. Inê kê page tarigenira hura, suria igê na matena ngekana ngaira ka page erataga ngavê.”

¹⁷Matena i su na arito ma ki bungi me, karu hata ni vora me na êmu i asêsu ma na ahame i mave, ma karu tara i berarogaterua na harahara gi rua ni apaneni ni puruka, ni goti ma ni sipi.

¹⁸I ngekana nga na Araha ki naka na suruheri iana henia o Abaramo, ki vi: “Inê kê tohe, vigê haganahunira na raraha iamu renia na mako hagenani, i bogo râ i Esipito tanga i ve i Uparatesi,

¹⁹henigi na mako iata na Kenita, na Kenisita, na Katamonita,

²⁰na Hitita, na Pirisita, na Repaimi,

²¹na Amorita, na Kananita, na Girigasita ma na Jebusita.”