Read Kahua HAGONEGAHANI 17 Bible Online

HAGONEGAHANI 17 - Kahua bible

HAGONEGAHANI 17

¹Matena o Abaramo ki tonga na harisi 99 iana, na Araha ki vora tanga ma ki vi: “Inê ki na God raramohaga hunia. Go têtê viteaku ma ku katogi tare na tarani ga ototo i maaku.

²Inê be naka na suruheri iaku henigo ma be hagarakonira na raraha iamu.”

³O Abaramo ki bêrusu so ki puru i ano. Ma God ki vi nikâ, ki vi:

⁴“Inê kê naka vikê na suruheri iaku henigo. Inê kê tohê, vi igo nga ki na êvarita rako na hakuta ninuni suria na maveta.

⁵Haganega tenia i ngekê na atamu ki no Abarahamo ma ki mareha vi o Abaramo, suria inê kê katogo, ko vora re na êvarita rako na hakuta ninuni suria na maveta.

⁶Inê be hagarakonira na raraha iamu ke gahu ngavê, ma tani na hitangita ka page maneraha. Na raraha iamu ka page rako teha ma ka page vora na hakuta ninuni suria maveta.

⁷Inê be hagamonaria tare na tohenga iaku ke tatarê surigamu, igo ma na raraha iamu, ma ke tatarê surira na apaparaha tare ki bê ki arâ. Na suruheri iaku ki page gâga hagahu. Inê be God iami, igo ma na raraha iamu.

⁸Inê be haganahunigamu, igo ma na raraha iamu renia na agua ikê i Kanani, mu mamahuara igê i ngekê. Na raraha iamu ka page nahunia hagahu i Kanani hagenani ma inê nga be God iata.”

⁹God ki vi tanga nikâ o Abarahamo, ki vi: “Ma igamu nogami ki tuguhigamu, igo ma na raraha iamu, tatarê surira na apaparaha i hemuri, vigamu hagamonaria na suruheri iami heniê.

¹⁰Igo ma na raraha iamu ki tuguhigamu, mu agana, hanana mu retegi râ na gavoni na varata na ara ni mane i berarogami.

¹¹Mu retegi râ gavoni na varata, na girarana na suruheri i berarogaka, igamu ma inê.

¹²Ki tuguhigamu, mu retegi râ na gavoni na varata na ara ni kare mane, tatarê surira na apaparaha, matena i hatohato hurira na tangiani ge varu. Na tarana ngekê ki tangara nikâ na kare vurivuri i pasimi ma tangara na ani mu vurira tenira na enoni hagatê getera.

¹³Na ara ni mane ki tuguhira na reteha ngekê. Na orena na reteha ngekê ki na girarana, vi na suruheri iaku henigamu ki asa vige page hato.

¹⁴Na anima na mane i pe nahunia na reteha ngekê, ngaia ki hato tenia na haku na kariaku, suria ngaia ki pe hagamonaria na suruheri iana heniê.”

¹⁵God ki vi tanga o Abarahamo, ki vi: “Haganega tenia i ngekê ko hêtana kaniamu, vi ka Sara, mareha vi ka Sarai.

¹⁶Inê be katoa, ke girara ge apara kare. Ngaia ki page apara na kare mane tangago. Inê be katoa, ke vora na êvarita rako na hakuta ninuni hehegitigi, ma tani na raraha iana ka page maneraha.”

¹⁷O Abarahamo ki bêrusu so ki puru i ano, ma ki mamanamui, suria i tako ki vi: “Tanu hega na mane ki girara i apara kare, matena i tongatonga na harisi tangarê gi tage iana? Ma ka Sara ki tonga na harisi tangahuru gi siva iana. I hega, ngaia ki girara vari i apara kare?

¹⁸Go naka na suruheri iamu henia o Isimaele hete.”

¹⁹Ma God ki arami, ki vi: “I bara vê! Ka Sara na gete iamu ngaia ki page apara vê na kare mane, ma igo ko page hêtana vi o Isako. Inê be hagamonaria na suruheri iaku henira, ngaia nga ma na raraha iana, tare ki bê ki arâ. Na suruheri iaku ki asa vige page hato.

²⁰Hoi, tanga o Isimaele, inê be aganaria na nungiha iamu. Inê be vatea na ramana ma be hagarakonira na raraha iana. Inê be katora na raraha iana ke vora na hakuta raha. Ngaia ki page aparara o karena tangahuru matarerua ma ka page maneraha.

²¹Ma inê be hagamonaria na suruheri iaku henia nga o karemu o Isako. Ka Sara ki page apara tangago i na matena manga i ngekê i na harisi i muri.”

²²God ki tamasi hato vikana tanga o Abarahamo ma ki râ vê.

²³Igê nga na tangiana ngekana o Abarahamo ki katoa na marâ, God ki bonasia renia. Ngaia ki retegi râ na gavoni na varata o Isimaele o karena ma na mane hato getera i ruma iana henira nikâ na kare vurivuri i pasina ma na ani i bani vurira.

²⁴O Abarahamo ki tonga na harisi 99 iana, matena i nahunia na reteha,

²⁵ma o Isimaele o karena ki tonga na harisi 13 iana, matena i nahunia na reteha.

²⁶Ngairerua karu nahunia na reteha igê na tangiana gi tage,

²⁷henira na kare vurivuri hato iana o Abarahamo.