Read Kahua HAGONEGAHANI 19 Bible Online

HAGONEGAHANI 19 - Kahua bible

HAGONEGAHANI 19

¹Igê na manurahitana ngekana na vererua na angero karu ata i Sotome. I ngekana o Loti ki oga so igê na maani para na hinua. Matena i bâsirerua, ngaia ki aharaga ma ki ura râ vurusirerua. Ngaia ki bêrusu tangarerua ma ki vi:

²“Bamane, muru râ me noga i pasiku. Muru tanani uga ma kamuru mauru i pasiku. I gomaha i mahogo muru riterite ma kamu kahu arâ nikâ. Ma ngairerua karu arami, karu vi: “Mareha. Igê na bungiana i ngekê igamirua kamuru gâga igê na mahera na hinua.”

³Mo Loti ki ama ni tugurirerua nga. Tahema ngairerua karu banu henia i ruma iana. O Loti ki bonasira na kariana ka hahi na bereti ma ka hagarêa na ngêra koro tangarerua. Matena i nanê na ngauha, ngairerua karu ngê.

⁴Matena i mamênga, vi garu mauru, ma na mane ni Sotome ka rihia na ruma. Na ara ni mane hato i hinua ka oga i ngekana: na mane na gapu haoru ma na bani mane.

⁵Ngaira ka hagangere i metara, ka hagatea o Loti, ka vi: “I he ngairerua nga na mane garu ata me i manurahi akê i pasimu? Kasirerua hura me tangagami!” Na mane ni Sotome ka tenia viga paronga era henirerua.

⁶O Loti ki hura ma ki purusia murisiga na maani ruma.

⁷Ngaia ki vi tangara, ki vi: “Bamane, be vi tangagamu, siana kamu katokato vikana. Na tarana i erataga ngekana

⁸Bâ, inê kê nahunirerua ka kareku gi rua, garu pe meramêru rârâ na mane. Naka be torererua hura me tangagamu. Igamu ma mu girara. Ma siana kamu katoa ta na tarana tangarerua na mane, garu oga i ruma iaku. Ma ki tuguhiê, gê bâbâsurirerua.”

⁹Ma ngaira ka aramia o Loti, ka vi: “Igo na mahuara gu gava taramani! Ti kanigo go ramonigami? Gu gava, i era ma kami katogo berasigo ngavê teharirerua na mane gi rua i pasimu agê.” Ngaira ka bugurenia râ o Loti ma ka ura râ tanga na maani ruma, hanana viga hogea.

¹⁰Ma na mane i rarona na ruma karu tagara hura, karu bahenia banu o Loti ma karu raburia na maani ruma.

¹¹Ma hemuri ngairerua karu katora ka guru na ara ni mane hato i metara, hanana siana ka tarahua na maani ruma.

¹²Na mane gi rua ngegana karu vi tanga o Loti, karu vi: “Manga tani o karemu se ka karemu, se na hungâmu se na ruma iamu ma ka gâga i hinua ikê, gu merahura,

¹³suria igamirua kamuru page ruhuruhua na hinua ikê. Na Araha ki bani rongoa na rongoha era renira na enoni i hinua ikê ma ki hagatorangenigamirua, hanana vigamuru ruhuruhua i Sotome.”

¹⁴Vikê o Loti ki râ i pasita na mane, viga auragirerua ka karena ma ki vi tangarerua, ki vi: “Garigari! Gava pania na hinua ikê. Na Araha ki sugi ruhuruhua na hinua ikê.” Ma ngairerua karu takusia ma, vi ngaia ki hagaruru.

¹⁵Igê na kahuagana na tangiana na angero karu hagasusua o Loti, karu vi: “Garigari vego! Meragava kaniamu ma ka karemu gi rua, i era ma kamu me, matena na Araha ki ruhuruhua igê hinua.”

¹⁶O Loti ki takoherua. Ma na Araha ki takuia. Tahema na mane girua ngegê karu urura hura o Loti, kaniana ma ka karena gi rua tenia na hinua.

¹⁷Memuri ta na hitangiterua na angero ki vi: “Mu masimasi tange manavami. Siana kamu sirasira bê aporo. Siana kamu rêra so igê na maruguna. Mu gaha tagere igê na hungani, i era ma kamu me.”

¹⁸Ma o Loti ki arami, ki vi: “Araha, siana ki manga ngekana.

¹⁹Igo ko bani koro tangê, suria go hagatahiê. Ma ku bâ, na hungani ngegana ka hagatê ngavê tangê. Na aruhuruhunga ki page tarahuê. Inê kê page me ma ki bara ve ata râ i ngekana.

²⁰Hoi, gu bâsia na kere hinua ikana. Ngaia ki pe hagatê ngavê. Gu nakê be gava râ be oga igê. Bâsia, ngaia ki na kere hinua sisite. Inê kê page tahitahi i ngekana.”

²¹Na angero ki arami, ki vi: “Ua, i koro ma! Vikana inê be naka mavê na hinua ngekana, mareha be ruhuruhua.

²²Garigari! Tangotango! Siana kamu hagarihu tangê vigê ruhuruhua i Sotome.” Suria o Loti ki visia na agua ngekana vi kere hinua sisite, tahema ga hêtana vi Soare.

²³O Loti ki ata i Soare, matena i akê me na arito.

²⁴Na Araha ki parama, ma ki kasi so hurirerua i Sotome me Gomora na hê karekare ni sivi.

²⁵Ngaia ki ruhuruhua i Sotome me Gomora, na maruguna hagenani, na enoni hato igê ma na ara ni marâ hato ga akê igê na mako.

²⁶Ma kaniana o Loti ki sira aporo ma ki vora renia na u na solo.

²⁷Igê na mahogotana i tangi me, o Abarahamo ki gaha tanga na agua, i bani ura igê i maana na Araha.

²⁸Ngaia ki bâsigi so i Sotome ma i Gomora ma na maruguna hagenani, ma ki rigia na asêsuna na mako i manga na asêsuna na bagagi raha.

²⁹Matena God ki ruhuruhurerua na hinua i na maruguna i oga igê o Loti, ngaia ki takusia tare o Abarahamo, ma ki naka o Loti ki gava ki tahi.

³⁰Suria o Loti ki magu, vige oga i Soare, tahema ngaia ma ka karena gi rua ka tagere igê na hungani ma ka oga igê na vaba.

³¹Ka karena hagenago ki vi tanga kesina, ki vi: “Vaemakerua ki gêmêa, ma ikê ki mareha rârâ igê na mane, hanana vige auragirerua, karu apara kare.

³²Nika râ garu hagatonomia vaemakerua renia na vaini, ke aripo na maana, hanana igerua karu memêru ke hagaobaragagerua, karu apara kare.”

³³Igê na bungiana ngekana ngairerua karu hagatonomia renia na vaini ma ka karena hagenago ki memêru. Ma o Loti ki pe hagare rârâ, suria na vaini ki ruguhia ngavê.

³⁴Ki tangi me nikâ, ka karena hagenago ki vi tanga kesina, ki vi: “Inê kê mêru henia i na bungi. Garu hagatonomia nikâ i rikini bungi hanana go memêru nogamu. Garu kato vikana hanana ge hagaobaragagerua, karu apara kare.”

³⁵I bungi me ma ngairerua karu hagatonomia nikâ, ki aripo na maana, ma ka karena hemuri ki memêru. Nikâ o Loti ki pe hagare rârâ, suria na vaini ki ruguhia ngavê.

³⁶Ngekana nga hanana o Loti i hagaobararerua ka karena marena.

³⁷Ka karena hagenago ki apara na kare mane. Ngaia ki hêtana vi o Moaba. Ngaia ki na êvarita na Moabita, ga gâga i ngekê.

³⁸Ka karena hemuri ki apara nogana na kare mane. Ngaia ki hêtana vi o Benami. Ngaia ki na êvarita na Amonita, ga gâga i ngekê.