Read Kahua HAGONEGAHANI 20 Bible Online

HAGONEGAHANI 20 - Kahua bible

HAGONEGAHANI 20

¹O Abarahamo ki pania i Mamere ma ki râ i Negeve, na apanena i Kanani bê râ tanga i Esipito. Ngaia ki oga i tagua i bererogaterua i Katesi me Suru. Ma i muri, matena i oga i Gerara,

²ngaia ki hagarongo rârâ, vi ka Sara ki mareha vi kaniana ma kesina hete. Vikê na maneraha o Abimeleki ni Gerara ki vi ka torea me ka Sara tanga.

³I ta na bungiana God ki vora tanga igê na maruteha, ma ki vi: “Igo ko page meme, suria igo ko torea na gete i bani êragi kani ikê.”

⁴Ma o Abimeleki ki pe memêru rârâ ka Sara. Tahema ngaia ki vi tanga God, ki vi: “Araha, inê kê pe katoa rârâ na tarana era henia. Tahema i pe oto, vigu mutegami, inê ma na kariaku.

⁵O Abarahamo marena kani visia vi kesina, ma na gete ki vi vikana nogana. Inê kê girara, vi na parongaku ki oto. Inê kê pe katoa rârâ ta na marâ vige era.”

⁶Igê na maruteha ngekana God ki arami, ki vi: “Inê kê bani girara, vi i oto na parongamu. Tahema inê kê urapusigo ko pe haritoheê ma ko pe kari hagarangia rârâ ka Sara.

⁷Hoi, gu vatea aporo o vaniana. Ngaia ka na poropete. Ngaia ki page avarasiê tangago, hanana siana ko meme. Ma ki manga go pe vatea aporo, be vi tangago, igamu kamu page meme, igo ma na kariamu hato.”

⁸Igê na mahogotana i tangi me nikâ, o Abimeleki ki unihakura me na gavumane hato iana ma ki hagarongora renia na tarana i tarahua. Ngaira ka magu ngavê.

⁹Ma hemuri o Abimeleki ki unia me o Abarahamo ma ki hagatea, ki vi: “Na ta ko katoa tangagami? Na tarana i era manga i he kanigê katoa tangago, tahema go hagamakigami, inê ma na kariaku? Na tarana go katoa tangê ngekana, ki komani erataga ngavê.

¹⁰Tanu hega go kato vikana?”

¹¹O Abarahamo ki vi: “Inê kê takusia ma, vi na enoni ikê ka pe hagahigasia God ma ka page nahuiê kê meme, hanana ga torea kaniaku.

¹²Ngaia monari kini kesiku. Ngaia kini ka karena o vaemaku ma ki mareha vi ka karena kenaku. Menê kê êragia.

¹³Matena God ki vi tangê, kê hura pania i pasina o vaemaku tangagi na agua getigi, inê kê vi tanga kaniaku, kê vi: “I ngekê ki na matena tangago, go tototo suriê igê. Gu hagarongo rârâ, vi o veogamu kani inê.”

¹⁴Vikê o Abimeleki ki vatea aporo ka Sara tanga o Abarahamo ma ki haganahunia nikâ renira na sipi, na puruka, na goti ma na kare vurivuri, na ani mane ma na ani hehene.

¹⁵Ngaia ki vi tanga o Abarahamo, ki vi: “Go girara go gâga igê ma na ani mavê na mako igê na arahanga iaku.”

¹⁶Ma ki vi tanga ka Sara, ki vi: “Inê be vatea o veogamu na rehagaro na maani na siliva, hanana gê hagatanga monari, vi igo ki oto na parongamu. Na ara ni enoni hato ka page girara, vi igo ko pe katoa rârâ ta na marâ i era.”

¹⁷Suria na tarana i tarahua ka Sara kaniana o Abarahamo, tahema na Araha ki katoa na gete hato i ruma iana o Abimeleki ka gomara. Vikê o Abarahamo ki avarasia God tanga o Abimeleki. Tahema God ki katora ka girara ga apara kare aporo: ngaia ma kaniana ma na gete vurivuri iana.