Read Kahua HAGONEGAHANI 22 Bible Online

HAGONEGAHANI 22 - Kahua bible

HAGONEGAHANI 22

¹I ta na matena i muri me God ki uhungia o Abarahamo. Ngaia ki unia, ki vi: “Abarahamo.” Mo Abarahamo ki arami, ki vi: “Oi.”

²God ki vi: “Gu torea o Isako o karemu, na kare i tage iamu go takuia bâraha, ma ko merâ i Moria. Igê na hungana i ngekana inê kê page usia tangago, ko susu renia igê tangê.”

³Igê na mahogotana i tangi me, o Abarahamo ki papario tanga na vogasiha ma ki naka na ario igê na gerina na tonki ki tora. O Abarahamo ki merarâ o Isako ma na kariana gi rua. Ngaira ka tavoraha tanga na agua i visia God tanga.

⁴Igê na oruta na tangiana o Abarahamo ki bâsia râ hagatê na agua ga tabea.

⁵Ngaia ki vi tangarerua na kariana, ki vi: “Muru meoga so na tonki ikê. O kareku menê kamuru tagere ikana ma kamuru rahesia God igê, ma hemuri kamuru kahu aporo me tangagamurua.”

⁶O Abarahamo ki vi tanga o Isako ki torea na ario tanga na vogasiha, ma ngaia marena ki toregi na tatapa ma na garaputa na gi, hanana i hagatanga na gi renigi. Matena garu arâ,

⁷o Isako ki tamasi, ki vi: “Mama.” O Abarahamo ki arami, ki vi: “Na ta, o kareku?” O Isako ki hagate, ki vi: “Bâ, na garaputa na gi ma na ario igê. Ma i he na karena sipi tanga na vogasiha?”

⁸O Abarahamo ki arami, ki vi: “God ma ki girara.” Ma ngairerua karu râ.

⁹Matena garu ata igê na agua i bani visia God tanga, o Abarahamo ki tagarahia na panga na bea ni vogasiha ma ki raria renigi na ario. Hemuri ngaia ki rakua o karena ma ki hagatâhia akê igê na ario igê na panga na bea ni vogasiha.

¹⁰Ma hemuri ngaia ki tavoa na tatapa. Ma na matena i nanê vi ahura renia,

¹¹ma na angero iana na Araha ki ngere me tenia na vavearo, ki vi: “Abarahamo! Abarahamo!” O Abarahamo ki arami, ki vi: “Oi.”

¹²Na angero ki vi: “Siana! Naka vê o karemu. Hoi, i ngekê inê kê girara, vi igo ko hagahigasiê ma ko tê viteaku, suria igo ko pe manimania o karemu i tage teniê.”

¹³O Abarahamo ki sira râ ma ki bâsia na sipi mane, i tu na hona igê na kere roborobo igê na agua i masigu. Ngaia ki râ ma ki torea ma ki susu renia urusina o karena.

¹⁴O Abarahamo ki hêtana na agua ngekana vi ‘Na Araha ma ki girara’. Tariha me i ngekê na enoni ka vi: “Igê na hungana iana na Araha ngaia ma ki girara.”

¹⁵Na angero iana na Araha ki ngere me nikâ tenia na vavearo tanga o Abarahamo, ki vi:

¹⁶“Inê nga ka na Araha. Inê kê tohe reniê mareku, vigê haganahunigo renia na ramana, suria go tê viteaku ma ko pe manimania o karemu teniê.

¹⁷Tahema inê kê tohe, vigê hagarakonira na raraha iamu, ka rakorako mangagi na higu i vavearo se mangagi na momogani na one i one. Na raraha iamu ka page henahuraugi na hinua iata na merongata.

¹⁸Suria igo ko tê viteaku, tahema na enoni hato i maveta ka page avarasiê, kê korokoro tangara nogata manga gê korokoro tangara na raraha iamu.”

¹⁹O Abarahamo ki aporo tangarerua na kariana ma ngaira hato ka râ tanga i Bereseba na hinua iana.

²⁰I ta na matena i muri me o Abarahamo ki rongo, vi ka Milika kaniana o Nagore o vesina ki aparara na kare ge varu.

²¹O Usu ki na bêbê ni kare iana. Na ruata ka no Busu. Ma hemuri me ka vora o Kemuele vaemana o Arama,

²²o Keseti, o Gaso, o Pilitasi, o Jitilapa mo Betuele,

²³o vaemana ka Rebeka. Ka Milika ki aparara o karena ge varu ngegê tanga o Nagore o vesina o Abarahamo.

²⁴Ka Reuma, kaniana râ ma o Nagore, ngaia ki apara o Tebaga, o Gagama, o Tagasi mo Maka.