Read Kahua HAGONEGAHANI 23 Bible Online

HAGONEGAHANI 23 - Kahua bible

HAGONEGAHANI 23

¹Ka Sara ki tonga na harisi 127 iana ma ki kahu me.

²Ngaia ki me i Heberoni i Kanani. O Abarahamo ki angisia.

³Ma hemuri ngaia ki pania so na gahuana kaniana ma ki râ ki nungira na Hitita, ki vi:

⁴“Inê kê mamahuara me i pasimi. Be vuria tenigamu tagua na mako, be bagia igê kaniaku.”

⁵Ngaira ka aramia, ka vi:

⁶“Bamane, gu rongo. Igami kami hagahigasigo, vi igo ka na maneraha. Go bagia kaniamu igê na matiku na ani i koro ngavê mi nahunia. I asa ta na hitangimami, vige manimania na matiku tenigo, hanana vigo bagia igê.”

⁷O Abarahamo ki bêrusu so tangara na avanuna na mako,

⁸ma ki vi: “Manga mu obaniê, vigê bagia kaniaku ikê, hoi, mu nungia o Eperoni o karena o Sogare,

⁹ki hagavuringenia tangê na vaba na atana i Makapela, i oga igê na akerena na mako iana. Mu nungia ki hagavuringenia tangê ma kê vuria renia nga na mena i araria ikê i maami, hanana gê nahunia nga tanga na bagiha ninuni.”

¹⁰O Eperoni ki oga so henira na Hitita getera igê na tavani hakuta igê na maani para ni hinua. Ngaia ki arami, hanana vi na ara ni enoni i ngekana ka rongoa.

¹¹Ngaia ki vi: “Bamane, gu rongo. Inê vatego na mako hagenani henia na vaba igê. Ikê i maata na kariaku inê be haganahunigo renia, hanana go bagia igê kaniamu.”

¹²Ma o Abarahamo ki berusu so tangara na Hitita,

¹³ma ki vi tanga o Eperoni, hanana vi na enoni hato ka rongoa. Ngaia ki vi: “Bamane, gu rongo. Inê be vuria nga na mako hagenani. Gu aganariê be vuria, ma be bagia igê kaniaku.”

¹⁴O Eperoni ki arami, ki vi:

¹⁵“Bamane, na mena na mako ki na maani tangarê ge he na siliva. Na ta ki hagabara i berarogakerua? Gu bagia na kaniamu igê.”

¹⁶O Abarahamo ki aganaria ma ki toma râ na mena na mako manga i bani visia o Eperoni i maata na enoni: ngaia ka na maani na siliva tangarê ge he i râ suria higahigana na haga i na matena ngekana.

¹⁷Ngekana nga hanana na mako iana o Eperoni i Makapela kerekê i Mamere ki vora na mako iana o Abarahamo. Ngaia na mako, na vaba igê ma na apinige hato i rarona na taritarihana na mako.

¹⁸Na Hitita hato ga oga igê na hekarigiana, ngaira ka girara, vi o Abarahamo ki nahunia na mako ngekana.

¹⁹Ma hemuri o Abarahamo ki bagia ka Sara kaniana igê na vaba i Kanani.

²⁰Ngekana nga na mako ma na vaba igê iata na Hitita ki nahunigi o Abarahamo tanga na bagiha ninuni.