Read Kahua HAGONEGAHANI 24 Bible Online

HAGONEGAHANI 24 - Kahua bible

HAGONEGAHANI 24

¹O Abarahamo ki merahaga ngavê. Na Araha ki tamania, ka tavoraha bâkoro na ara ni marâ hato i katogi.

²O Abarahamo ki vi tanga na kariana i teha na harisi iana ma ki onosurigi na nahuninga hato iana, ki vi: “Gu naka na rimamu i berarogaterua na tangaku ma ko tohetohe.

³Inê kê obanigo, vigo tohetohe renia na Araha God i hagavorarerua na vavearo ma na ano, vi siana ko atea so na gete ikê i Kanani tanga o kareku.

⁴Gu arâ hete igê na agua gê vora igê, ma ku atea igê na gete i berarogata na goaku tanga o kareku o Isako.”

⁵Ma na kariana ki hagate, ki vi: “Ma ki hega manga vi na gete ma ki usi vige pania i pasina, hanana vige râ me heniê ikê? Ki hega, i araria ma gê kasia aporo vari o karemu tanga i pasimu?”

⁶O Abarahamo ki arami, ki vi: “Siana hagetage! Siana ko kasia aporo râ o kareku i ngekana!

⁷Na Araha i hagavora na vavearo ngaia ki toreê hura tenia i pasina vaemaku ma tenia na mako iata na goaku. Ngaia ki suru tangê, vi haganahunira na raraha iaku renia na mako ikê. Ngaia ki page hagatorangenia na angero iana i nago taramu, hanana go tarahua na gete i ngekana tanga o kareku.

⁸Manga vi na gete ma ki usi vige râ me henigo, na tohenga iamu ki hatohato tenigo. Ma siana hagetage ko meaporo o kareku i ngekana.”

⁹Vikana na kariana ki naka na rimana i berarogaterua na tangana o Abarahamo ma ki tohe vi ngaia ki arâ surigi na tamasinga iana o Abarahamo.

¹⁰Ma hemuri na kariana, i bâsurigi na nahuninga iana o Abarahamo, ki râ. Ngaia ki merarâ na kamelo tangahuru gi tage henigi tani na mahatanga koro iana o Abarahamo. Ngaia i râ tanga na hinua, i oga i nago igê o Nagore vesina o Abarahamo. Na hinua ngekana ki oga i Arama-Naharaimi i Mesopotamia.

¹¹Matena i ata vê i ngekana, ngaia ki nakara na kamelo ka tâ so i ano hagarangia na ve karu i na apanena hura na hinua. Ma ki manurahi me. Ngaia ki na matena iata na gete ga huhura me tenia na hinua ka titi ve.

¹²Ngaia ki nungi, ki vi: “Araha, igo God iana na maneraha iaku o Abarahamo, gu katoa, ke togo na râha iaku i ngeke ma ku hagamonaria na suruha iamu tanga na maneraha iaku.

¹³Inê kê oga ikê igê na vekaru. Na kare viru i hinua ka sugia ma vige huhura me ke titi ve.

¹⁴Inê kê page vi tanga na hitangita, kê vivi: ‘Bagakare, gu kisia me na pi na ve be tono.’ Ma inê kê nungigo, hanana go katoa na ani go bani atea tanga na kariamu o Isako ki aramiê, ki vi, ‘Gu tono ma be hagatonomira nogata na kamelo iamu.’ Vikana inê kê girara, vi igo ko hagamonaria na suruha iamu tanga na maneraha iaku.”

¹⁵Matena i nunginungi mênga, ma ka Rebeka ki meata me na pi ni ve igê na gaparana. Ngaia kani ka kareterua o Betuele, karena o Nagore, o vesina o Abarahamo, ma ka Milika kaniana.

¹⁶Ngaia ki na tohona na kere gete. Ngaia ki na kere gete tatara, i mamênga vige arâ henia na mane. Ngaia ki so tanga na vekaru ki tia hato na pi ni ve iana ma ki bê aporo.

¹⁷Na kariana o Abarahamo ki tango vurusia, ma ki vi tanga, ki vi: “Gu nakê be tono noga igê na pi na ve iamu.”

¹⁸Ngaia ki arami, ki vi: “Ia, gu tono.” Na kere gete ki kisia na pi na ve i gaparana ma ki têa tanga ki tono.

¹⁹Matena i tono hato, na kere gete ki vi: “Inê be ti ve nikâ tangara na kamelo iamu, hanana ga totono nogata ki ararira.”

²⁰Ngaia ki hata ni karangia na pi na ve iana igê na maraguhu ni tonoha iata na kamelo ma ki tango ki râ ki uriringenia na ve, mataro me na kamelo ka tono ki ararira.

²¹Na mane ki muni so ma, ma ki boretenia, hanana i girara, vi na Araha ki katoa ki râha koro.

²²Matena na kere gete ki hagatonomira hato na kamelo, na mane ki tavoa akê na eburungi na golo i raha era na mena, ma ki naka râ i barisuna na kere gete, ma ki tarasirerua na rago na golo tonganigi na rimana,

²³ma ki vi: “Be hagatego, ti o vaemamu? I hega, na ruma iana ki ararigami na me iaku menê, hanana vigami mauru igê?”

²⁴Ngaia ki arami, ki vi: “O vaemaku ka no Betuele kareterua o Nagore ma ka Milika.

²⁵Na bêni na rauga ma na agata na kamelo ka aharêsigami ngavê, ma na agua ni mêruha ki oga tangagamu.”

²⁶Ma na mane ki susure ma ki rahesia na Araha, ki vi:

²⁷“Ge hagarahasia na Araha, God na maneraha iaku o Abarahamo i rahesia, suria ngaia ki hagamonaria na suruha iana tanga na maneraha iaku. Na Araha ki hagaotoê, hanana gê tarahua na goana na maneraha iaku.”

²⁸Na kere gete ki tango râ i pasina ma ki hagarongo i ruma iana kenana.

²⁹O Labani o veogana ka Rebeka ki hura ma ki tango râ tanga na ve karu, na agua i oga igê na kariana o Abarahamo.

³⁰O Labani ki bani bâsigi na eburungi i barisuna kesina ma na rago i rimana ma ki bani rongogi na marâ i visigi na mane akana tanga. Ngaia ki râ i pasina na kariana o Abarahamo i ura henira na kamelo iana hagarangia na ve karu,

³¹ma ki vi tanga, ki vi: “Râ me karu ata i ruma. Igo nga na mane, i koro ngavê tangago na Araha. Tanu hega go oga ma ikê. Inê kê bani hagarêa na agua tangago i ruma iaku ma tagua nikâ tangara na kamelo iamu.”

³²Hoi, na mane akana ki banu i ruma. O Labani ki têtê râ na toraha iata na kamelo ma ki hagangêra renigi na bêni na rauga ma na agata. Ma hemuri ngaia ki torea me na ve tangara na kariana o Abarahamo ma na me iana, ka tanani uga igê.

³³Matena ga tora me na ngêra, na kariana o Abarahamo ki vi: “Be visia hagenago na tarana gê râ me tanga, ma hemuri kê kahu ngêngê.” O Labani ki vi: “Hoita, koro ma.”

³⁴Ma ngaia ki vi: “Inê ki na kariana o Abarahamo.

³⁵Na Araha ki koro teha ngavê tanga na maneraha iaku ma ki katoa ki ruruguha ngavê. Ngaia ki haganahunia renira na totoha ni sipi, ni goti ma ni puruka, ma renigi na siliva ma na golo, ma renira na mane vurivuri ma na hehene vurivuri, na kamelo ma na tonki.

³⁶Ka Sara na gete iana na maneraha iaku. Matena i gemêa, ngaia ki apara na kare mane tanga. Na maneraha iaku ki haganahunia o karena renigi na ara ni nahuninga hato iana.

³⁷Na maneraha iaku ki katoê kê tohe, hanana vi siana kê atea na kere gete i Kanani tanga o karena.

³⁸Ngaia ki bonasiê, hanana gê arâ hete i pasita na goana ma na raraha iana o vaemana, hanana gê atea na kere gete i berarogata tanga.

³⁹Inê kê hagatea na maneraha iaku, kê vi: ‘Manga i he manga vi ngaia na kere gete akana ma i usi vi ve merâ me?’

⁴⁰Ngaia ki aramiê, ki vi, ‘Na Araha nga gê totosuria, ngaia kani page kasia na angero iana, ki arâ henigo ma ki katogo, ko râha koro. Igo ko girara ma go tarahua na kere gete tanga o kareku i berarogata na goana ma na raraha iana o vaemaku.

⁴¹Manga vi na kariana na kere gete ma ka manimania, na tohenga iamu ki hatohato tenigo.’

⁴²I ngekê matena gê atata râ igê na vekaru, inê kê nunginungi, kê vivi, ‘Araha, igo na God na maneraha iaku o Abarahamo i rahesigo. Gu katoê be râha koro.

⁴³Inê kê oga igê na vekaru ikê. Manga vi na kare viru ki arâ me ki titi ve, inê kê page nungia, kê totono na ve igê na pi na ve iana.

⁴⁴Manga vi ngaia ma ki nakê kê totono ma ki vivi, vi hagatonomira nikâ na kamelo iaku, hoi, go katoa ki vora nga, vi ngaia ka na ani, go atea tanga o karena na maneraha iaku.’

⁴⁵Matena gê nunginungi munimuni mênga, ma ka Rebeka ki mêra me na pi ni ve i gaparana ma ki so ki tia igê na ve karu. Inê kê vi tanga, kê vi, ‘Gu nakê be tono.’

⁴⁶Ngaia ki hata ni kisia na pi na ve i gaparana, ma ki vi, ‘Ia, gu tono, ma be hagatonomira nogata ma kamelo iamu.’ Menê kê tono, ma hemuri ngaia ki hagatonomira na kamelo.

⁴⁷Inê kê hagatea, kê vi, ‘Ti vaemamu?’ Ngaia ki arami, ki vi, ‘O vaemaku ki no Betuele kareterua o Nagore ma ka Milika.’ Ma hemuri inê kê naka na eburungi i barisuna ma kê tarasirerua na rago tonganigi na rimana.

⁴⁸Inê kê susure ma kê rahesia na Araha. Inê kê hagarahasia na Araha, na God na maneraha iaku o Abarahamo i rahesia, suria ngaia ki hagaotoê, hanana gê tarahua na goana na maneraha iaku. I pasina inê kê tarahua igê ka karena tanga o karena na maneraha iaku.

⁴⁹Hoi, manga vi igamu, ma kamu agana kamu hagabângenia, vi marâ era na apemi renia na maneraha iaku, mu visia me tangê. Ma ki manga mu usi, hoi, mu visia me nikâ. Ngekana inê kê page girara na tarana ta ki tuguhiê vige katoa.”

⁵⁰O Labani mo Betuele karu arami, karu vi: “Suria na tarana ngekê ki râ me tenia na Araha, tahema ki pe oto tangagami, vigami visia nikâ na ta.

⁵¹Ka Rebeka ikê. Gu mêra, ke êragia o karena na maneraha iamu suria na tamasinga iana na Araha.”

⁵²Matena na kariana o Abarahamo ki rongo vikana, ngaia ki susure ma ki rahesia na Araha.

⁵³Ma hemuri ngaia ki tavogi kê na gahu, na rêni, na siliva ma na golo ma ki vatea ka Rebeka. Ngaia ki vatererua nikâ kenana mo veogana ka Rebeka na mahatanga i raha na meni.

⁵⁴Me hemuri na kariana o Abarahamo ma na me iana ka ngê ma ka tono. Ngaira ka mêru i ngekana. Matena ga rite me i mavoraro, na kariana o Abarahamo ki vi: “Nakê be aporo i pasina na maneraha iaku.”

⁵⁵O veogana ma kenana ka Rebeka karu vi: “Igami kami obania, vi ka Rebeka ki gâga so noga surigi na tangiani gi pi se tangahuru, ma ki kahu arâ.”

⁵⁶Na karianna o Abarahamo ki arami, ki vi: “Siana kamu ruruiê kê gâga. Na Araha ki katoê kê râha koro. Nakê be aporo i pasina na maneraha iaku.”

⁵⁷Ngairerua karu aramia, karu vi: “Ge unia me ka Rebeka ma ke tarahua tenia na obaniha iana.”

⁵⁸Vikê ngairerua karu unia me ka Rebeka ma karu hagatea, karu vi: “I hega, go obania vigo arâ suria o vani akê?” Ngaia ki arami, ki vi: “Mako.”

⁵⁹Vikê ngairerua karu nakarerua vê ka Rebeka ma na gete vurivuri i marupea me matena i sisite, karu râ surira na kariana o Abarahamo ma na me iana.

⁶⁰Ngaira i ruma ka nungia God tanga ka Rebeka, ka vi: “Goaku, na karemu ke gahu ngavê ma na raraha iamu ke henahuraugi na hinua iata na merongata!”

⁶¹Matena ka Rebeka ma na gete vurivuri iana ka nanê ni râha, ngaira ka hane i gerita na kamelo ma ka râ suria na kariana o Abarahamo.

⁶²O Isako ki oga igê na bagamasusu raha i Negeve i Kanani hagarangia na vekaru i Lagairoi.

⁶³Matena i mamaru me noga, ngaia ki râ ki barebare igê na pariki iana. Ngaia ki sira râ ma ki rigira na kamelo ga arâ me.

⁶⁴Matena ka Rebeka ki basiâ me o Isako, ngaia ki vato tenia na kamelo iana.

⁶⁵Ngaia ki hagatea na kariana o Abarahamo, ki vi: “Na mane o vati kani arâ me vurusigia igê na pariki ikana?” Ngaia ki arami, ki vi: “Na maneraha iaku nge.” Vikê ka Rebeka ki gasia so na gahu pusigi na maana.

⁶⁶Na kariana o Abarahamo ki hagarongoa o Isako renia na râha iana.

⁶⁷Me hemuri o Isako ki mebanu ka Rebeka igê na ruma na gahu i oga igê ka Sara kenana matena i tahitahi mênga. Ka Rebeka ki vora na gete iana. O Isako ki takuia ka Rebeka ma ki kahu pe areare na apena renia kenana.