Read Kahua HAGONEGAHANI 25 Bible Online

HAGONEGAHANI 25 - Kahua bible

HAGONEGAHANI 25

¹O Abarahamo ki êragia nikâ ta na gete, na atana ka Ketura.

²Ngairerua karu aparara o Simirani, o Josesani, o Metana, o Mitiani, o Isibako mo Suaga.

³O Jokesani ki apararerua o Seba mo Tetano. Ma na raraha iana o Tatano ngaira ka na Asurita, na Letusita ma na Leumita.

⁴Na karena o Mitiani ngaira ka no Epa, o Epere, o Ganoke, o Abita mo Eleta. Ngaira hato ngegê ka na raraha iana ka Ketura.

⁵O Abarahamo ki me tenigi na ara ni nahuniga hato iana tanga o Isako.

⁶Ma na matena i tahitahi mênga, ngaia ki vatera renigi o karena i aparara i pasita kaniana getera. Ma hemuri ngaia ki kasira o karena ngegê igê na agua i kerekê hagatê tenia o Isako o karena.

⁷O Abarahamo ki gemêa ki araria ma ki me. Ngaia ki tonga 175 na harisi iana. Ngaia ki obakoro renia na ogaha me iana ma ki me ma ki hakunira na êvarina.

⁹O Isako mo Isimaele o karena karu bagia igê na vaba i Makapela igê na mu kerekê i Mamere, na agua iana i nago o Eperoni karena o Sogare na Hitita.

¹⁰Ngaia ki na mako i bani vuria tenira na Hitita. Ngairerua hato o Abarahamo ma ka Sara kaniana ka bagirerua i ngekana.

¹¹I murina i me o Abarahamo, God ki koro tanga o Isako, i oga hagarangia na vekaru i Lagairoi, i vi vekaru iana na ani i mamauri i bâsiê.

¹²O Abarahamo ma ka Hagara na kare vurivuri iana ka Sara karu apara o Isimaele.

¹³O Isimaele ki aparara o karena ga vora hesurisuri ngaira igê, o Nabaiote, o Ketare, o Atabele, o Mibisama,

¹⁴o Misima, o Tuma, o Masa,

¹⁵o Gatata, o Tema, o Jeture, o Napisi mo Ketema.

¹⁶Ngaira ka na êvarita na varo ni nuni tangahuru matarerua. Na atata ka hêtani renigi na hinua ma na tênga iata.

¹⁷O Isimaele ki tonga na 137 na harisi iana ma ki kahu me.

¹⁸Na raraha iana o Isimaele ka oga i na apanena i berarogaterua i Gavila me Sure, kerekê i Esipito tanga i Asure. Ngaira ka oga hagatêrira na ani getera na raraha iana o Abarahamo.

¹⁹Ikê ki na sihonga renia o Isako o karena o Abarahamo.

²⁰O Isako ki tonga na 40 na harisi iana ma ki kahu êragia ka Rebeka ka karena o Betuele na mane ni Arama i Mesopotamia ma kesina o Labani.

²¹Suria ka Rebeka ki gomara, o Isako ki avarasia na Araha tanga, hanana i apara kare. Na Araha ki aganaria na avarasiha iana, ma ka Rebeka ki atui.

²²Ngaia ki obarangenirerua na kare papa. Matena i mamênga vigaru voravora me, ngairerua karu gusurenirerua heri i obana kenaterua. Ka Rebeka ki tako ki vi: “Tanu hega ki manga ikê tangê?” Vikê ngaia ki hagatea na Araha.

²³Na Araha ki aramia, ki vi: “Na hakuta ninuni gi rua karu oga i obamu. Matena garu voravora me, ngairerua karu page hehanehane. Na ani i voravora hagenago ki page oga i ruguhana na ani i muri.”

²⁴Ka Rebeka ki riki na gerina ma ki apararerua o karena na karepapa.

²⁵Na ani i vora hagenago, ngaia ki mahui na apena ma ki varevarehuga ngavê manga na goti. Tahema ga hêtana vi o Esau.

²⁶Na ani i vora hemuri ki têa gatagata na popona ni ugana o Esau, matena i vora me. Tahema ga hêtana vi o Jakobo. O Isako ki tonga na 60 na harisi iana, matena garu vora me igê.

²⁷Ngairerua karu raha. O Esau ki aresuria ngavê na hagavasinga ma ki magemagesia na bemu. O Jakobo ki pe manga o Esau. Ngaia ki gâga tonge so ma i hinua.

²⁸O Isako ki takuia o Esau teharia o Jakobo, suria i vagevagesia na ngauha ni ganiani i nanahuira o Esau. Ma ka Rebeka ki takuia hete o Jakobo.

²⁹I ta na tangiana o Jakobo ki hagagobo na pini, ma o Esau ki hagavasi rârâ ki ata me. Ngaia ki magê ngavê,

³⁰ma ki vi tanga o Jakobo, ki vi: “E, gê mesi hioronga! Me tani na ngêra merameraga ngegana.” Tahema ga hêtana nikâ vi o Etome: O Merameraga.

³¹O Jakobo ki arami, ki vi: “Inê kê girara ma gê vatego, manga vi igo ma ko nakê kê manga vi na bêbê ni kare.”

³²O Esau ki vi: “Hoita!, i koro ma! Inê kê haga ni me ngekê. Manga ve me, na tarana vi na bêbê ni kare ki asa ma vige tamaniê!”

³³O Jakobo ki arami, ki vi: “Hoi, gu tohe hagenago, vi igo ko nakê, kê manga vi na bêbê ni kare.” O Esau ki tohe ma ki naka o Jakobo ki vora vi ne bêbê ni kare.

³⁴Ma hemuri o Jakobo ki vatea tani na bereti henigi na pini. Ngaia ki ngê ma ki tono, ma ki aharaga vê nikâ ki râ. Ngekana nga hanana o Esau i pe tako raha renia na tarana na bêbê ni kare.