Read Kahua HAGONEGAHANI 26 Bible Online

HAGONEGAHANI 26 - Kahua bible

HAGONEGAHANI 26

¹Ta na magêha raha ki tarahua nikâ na agua i murina na ani i râ me hagenago igê na matena iana Abarahamo. O Isako ki râ i pasina o Abimeleki na maneraha iata na Pilisitina i oga i Gerare.

²Na Araha ki bani vora tanga o Isako ma ki bani vi: “Siana ko arâ i Esipito. Go oga so nga i na agua ikê. Inê be visia tangago na agua go page gâga igê.

³Go gâga ikê. Inê be tamanigo ma be haganahunigo renia na ramana. Inê be haganahunigamu igo ma na raraha iamu renigi na ara ni mako hato ikê. Inê be hagamonaria na bani suruha iaku tanga o vaemamu o Abarahamo.

⁴Inê be hagarakonira na raraha iamu, ke rako mangagi na higu i vavearo, ma be haganahunira renigi na mako hato ikê. Na ara ni hakuta ninuni ka page avarasiê, kê korokoro tangara manga gê koro tangara na raraha iamu.

⁵Inê be haganahunigo renia na ramana, suria o Abarahamo ki tê viteaku ma ki marupegi na ramata ma na tamasinga hato iaku.”

⁶Vikê o Isako ki oga i Gerare.

⁷Matena na mane i ngekana ka hagatea renia kaniana, ngaia ki hagaparura, vi ngaia kani kesina. Ngaia ki pe obania, vige visia kaniana, suria ngaia ki magutenira na mane ngegana, i era ma ka nahuia ki meme, hanana viga torea ka Rebeka, suria ngaia ki na tohona na gete.

⁸Matena o Isako ki oga rârâ i ngekana, na maneraha o Abimeleki ki bâ hura igê na mabaha ma ki rigia o Isako i meapisi ka Rebeka.

⁹O Abimeleki ki kasi tamasinga tanga o Isako ki râ me ma ki vi tanga, ki vi: “O, gê kahu girara, vi ngaia kani kaniamu! Tanu hega, go visia vi kesimu?” Ngaia ki arami, ki vi: “Suria gê takusia, vi era ma ka nahuiê manga vi inê kê visia vi kaniaku.”

¹⁰O Abimeleki ki vi: “Tanu hega, go katoa tangagami na tarana ngekana? Tahema i pe bara tanga na hitangita na me iaku vige memêru kaniamu. Igami kami kato vikana, suria ma igo nge.”

¹¹O Abimeleki ki ramonira na enoni hato, ki vi: “Na anima na enoni i katoa bera na mane ikê se kaniana, ngaia ka page nahuia ki meme.”

¹²O Isako ki hasi na mu i ngekana. Igê na harisi ngekana na mu ka ganora hagetangarê me nikâ teharigi matena i hasi, suria na Araha ki haganahunia renia na ramana.

¹³Ngaia ki ama ni nahunia nga na ramana ma ki vora na mane i ruruguha ngavê.

¹⁴Suria ngaia ki nahunira rako na totoha ni sipi, ni goti ma ni puruka ma na enoni tagara, na Pilisitia ka hengaria.

¹⁵Tahema ngaira ka ahunigi na ara ni vekaru hato ga bani oparigi na kariana o Abarahamo o vaemana, matena ki tahitahi mênga o Abarahamo.

¹⁶Ma hemuri o Abimeleki ki vi tanga o Isako, ki vi: “Gu hura pania na mako iamami, suria i ngekê igo ko ura gatagata teharigami.”

¹⁷Hoi, o Isako ki tavoraha ki râ ma ki tagarahia na tênga iana igê na maruguna i Gerare, ma ki oga noga igê.

¹⁸Ngaia ki oparigi aporo na vekaru, ga bani oparigi na kariana o Abarahamo ma na Pilisitia ka ahunigi i murina i bani me o Abarahamo. O Isako ki hêtani na ve karu ngegana renigi na ata ki bani hêtani o vaemana renigi.

¹⁹Na kariana o Isako ka oparia na kiru igê na maruguna ma ka tarahua igê na ve.

²⁰Na mane i Gerara ga bâsuri sipi ka ramonira na kariana o Isako ga bâsuri sipi nogata, ka vi: “Na vekaru iamami ngekana.” Tahema o Isako ki hêtana na vekaru akana vi ‘Heparaparanga’.

²¹Na kariana o Isako ka oparia nikâ tani na vekaru, ma ngaira ka hemeronge nikâ renia na ani ngekana. Tahema o Isako ki hêtana na vekaru ngekana vi ‘Hemerongeana’.

²²Ngaia ki aharaga tenia i ngekana ma ki oparia nikâ ta na vekaru. Ngekana ka kahu pe hemeronge renia. Tahema ngaia ki hêtana na vekaru ngekana vi ‘Asitatara.’ Ngaia ki vi: “I ngekê na Araha ki katogia ka oga asitatara ikê ma igia ka page nahunia na ramana.”

²³O Isako ki tavoraha ma ki râ tanga i Bereseba.

²⁴Igê na bungiana ngekana na Araha ki vora tanga ma ki vi: “Inê nga ki na God, o Abarahamo o vaemanu i rahesiê. Siana ko magu. Inê kê ngahisigo. Inê be koro tangago, ma be hagarakonira na raraha iamu, suria inê kê bani surua tanga o Abarahamo na kariaku.”

²⁵O Isako ki tagarahia na panga na bea ni vogasiha i ngekana ma ki rahesia igê na Araha. Ma hemuri ngaia ki tênga i ngekana, ma na kariana ka oparia nikâ igê na vekaru.

²⁶O Abimeleki mo Ahusata na mane ni hagaotonga iana mo Pikolo na araha iata na mane ni me iana, ngaira ka râ me tenia i Gerara, hanana ga bâsia o Isako.

²⁷Vikê o Isako ki hagate, ki vi: Tanu hega mu kahu râ me kamu bâsiê i ngeke, suria i nago igamu kamu pe komaniê ma kamu kasiê hura hete tenia na mako iami?”

²⁸Ngaira ka arami, ka vi: “I ngekê igami kami girara, vi na Araha ki ngahisigo, ma kami takusia, vi igia ke naka na suruheri i berarogaka ma ke tohe, hanana viga arâ suria. Igami kami obanigo, vigo surusuru,

²⁹vi siana ko erasigami, suria igami kami pe erasigo rârâ. Igami kami komanigo ma kami nakago vê ko râ asitatara. I ngekê ki vaga me mave, vi na Araha ki haganahunigo renia na ramana.”

³⁰O Isako ki hagarêa na magotoha tangara. Ma ngaira ka ngê ma ka tono.

³¹Igê na mahogotana i tangi me, na ara ni hitangita ki katoa na suruha iana ma ki hagagatagatania renia na tohenga. O Isako ki arira. Ngaira ka hegirara aporo.

³²Igê na tangiana ngekana na kariana o Isako ka râ me ka hagarongoa renia na vekaru ga oparia. Ngaira ka vi: “Igami kami opatenia na ve.”

³³Ngaia ki hêtana na ve karu ngekana vi ‘Seba,’ i vi ‘Tohenga.’ Tahema ga hêtana na hinua i ngekana vi Bereseba, vi ‘Vekaru ni Tohenga.’

³⁴Matena o Esau ki tonga na 40 na harisi iana, ngaia ki êragirerua na kere gete gi rua na Hitita. Tani ka Jehutiti ka karena o Beri, ma tani ka Basemata ka karena o Elone.

³⁵Ngairerua karu hagamamasiaga apeterua o Isako ma ka Rebeka.