Read Kahua HAGONEGAHANI 27 Bible Online

HAGONEGAHANI 27 - Kahua bible

HAGONEGAHANI 27

¹Matena o Isako ki gemêa ma ki guru, ngaia ki kasi tamasinga tanga o Esau na bêbê ni kare iana, ma ki vi tanga, ki vi: “O kareku.” Ngaia ki arami, ki vi: “Oi, na ta?”

²O Isako ki vi: “Bâ, inê kê gemêa ma ki sugia ma vari ve meme.

³Gu tora na epage ma na mage iamu, ku râ i bemu, ma ku hanasia me na ganiana tangê.

⁴Go hagamakoa na ganiana na ani gê obania bâraha ma ko torea me tangê. Matena gê ngaua hato, inê kê nungia God, hanana i haganahunigo renia na ramana ma hemuri kê kahu meme.”

⁵Ka Rebeka ki karinga, matena o Isako ki tamasi tanga o Esau. Tahema matena o Esau ki râ ki gagari,

⁶ma ka Rebeka ki vi tanga o Jakobo, ki vi: “Inê kê rongoa o vaemamu ki tamasi tanga o Esau, ki vi,

⁷‘Gu hanasia na ganiana ma ku hagamakoa tangê. Matena gê ngaua hato, inê kê têbuhigo i maana God ma hemuri kê kahu meme.’

⁸Hoita o kareku, gu karingê maninga, ma ku arâ suria na marâ gê visia tangago.

⁹Go arâ ma ko torererua me na bêhâgaterua binibinikaga na goti tenia na totoha, hanana gê hagamakorerua ma kê hagarêa na ngêra, o vaemanu ki obania bâraha.

¹⁰Igo kanigo totora tanga ki ngêngê, ma hanana i page têtêbuhigo ma hemuri ki kahu meme.”

¹¹O Jakobo ki vi tanga kenana, ki vi: “Bâ, inê ki pe varevarehuga na apeku manga o Esau.

¹²Manga o vaemaku ma ki hatariê, ngaia ki page girara ototo râ, vi inê kê hagaparua. Manga gê kato ngekana, ngaia ki asa vige têbuhiê ma ki kuasiê ma vari.”

¹³Na kenana ki arami, ki vi: “O kareku, manga vi na kuasiha ki mareha vi tangago ma ki tangê hete inê. Go arâ suria nga na marâ gê visia. Gu râ nga ku torererua me na goti.”

¹⁴Vikê ngaia ki râ ma ki torererua me tanga kenana. Ma kenana ki hagamako ma ki hagarêa na ngauha, o vaemana ki obania bâraha.

¹⁵Ma hemuri ngaia ki tavogi na ani koro ngavê na marâ o Esau ki tuguni re ma ki naka so i ruma. Ngaia ki hagatugunia o Jakobo renigi.

¹⁶Ngaia ki tuguni na rimana igê na gavota na goti ma ki naka nikâ pusia na riona suria i pe varevarehuga.

¹⁷Ngaia ki tagarenigi tanga o vaemana na ngêra i obanigi bâraha henigi na bereti i bani hahigi.

¹⁸Ngekana o Jakobo ki râ i pasina o vaemana ma ki vi: “Mama!.” Ngaia ki arami, ki vi: “Oi, na anita o kareku kani igo?”

¹⁹O Jakobo ki arami, ki vi: “O Esau kani inê, na bêbê ni kare iamu. Na marâ go visia, ea ikê. Gu aharaga ma ku ngêa na ganiana, gê torea me tangago, hanana vi go têtêbuhiê.”

²⁰O Isako ki hagate, ki vi: “O kareku, go rêrête taraha renia?” O Jakobo ki arami, ki vi: “Na Araha God go rahesia, kani tamaniê kê hata ni tarahua.”

²¹O Isako ki vi tanga o Jakobo, ki vi: “Guru me hagarangiê o kareku, be hatarigo, manga vi o Esau monari kanigo.”

²²O Jakobo ki ura hagarangi. O vaemana ki têtêgi na apena ma ki vi: “E, igo ko rongo manga o Jakobo ma na rimanu ki hata manga o Esau.”

²³Ngaia ki pe girara, vi ngaia ki no Jakobo surigi na rimana ki varevarehuga manga o Esau. Matena i sugia ma vige têtêbuhia,

²⁴ngaia ki hagate noga nikâ, ki vi: “O Esau monari kanigo?” O Jakobo ki arami, ki vi: “Mako, inê nga.”

²⁵O Isako ki vi: “Me tani na ganiani. Gê ngaua hato ma kê kahu têtêbuhigo.” O Jakobo ki vatea nikâ na vaini ki tono.

²⁶Hemuri o vaemana ki vi tanga, ki vi: “O kareku, guru me hagarangi ma ku siginiê.”

²⁷Matena i guru me, hanana vi siginia, o Isako ki siginia na vanuhani na tuguni. Vikê ngaia ki têbuhia, ki vi:

²⁸“Na unuhana koro o kareku ki manga na unuhana na mu, na Araha ki katoa ki ganora. God ke haganahunigo renia na kâropu tenia ni vavearo renigi na mu ga ganora ngavê. Na koni ma na vaini ke aharêsigo!

²⁹Na hakuta ninuni ke tê viteamu ma ke nakara mareta i ruguhana na arahanga iamu. Gu marungira na goamu hato ma ngaira ke aganarigo, go raha tangara. Na eraha ke tarahura na ani ga kuasigo. Na ramana ke tarahura na ani ga nungia na ramana tenia God tangago.”

³⁰Matena o Isako ki têbuhia hato o Jakobo mo Jakobo ki hura vê ki râ. Mo Esau o veogana ki ata me tenia na hagavasinga.

³¹Ngaia ki hagamako nogana na ngêra i obania bâraha o vaemana ma ki tora râ tanga. Ngaia ki vi: “Mama, aharaga, ku ngêa na ganiana gê torea me tangago, hanana vi go têtêbuhiê.”

³²O Isako ki hagate, ki vi: “Ti kanigo?” O Esau ki arami, ki vi: “O Esau kani inê, na bêbê ni kare iamu!”

³³O Isako ki gasuga ma ki haganega ki tata, ma ki hagate, ki vi: “Ma o ti kani bani torea me tangê na ganiana i nahuia? Inê kê kahu ngêa râ ma, ma kanigo ata me akini. Inê kê bani têbuhia. I pe arari, vi ve katoa nikâ na ta? I tâ vikana i tâ.”

³⁴Matena o Esau ki rongo vikê, ngaia ki angi raha ngavê ma ki obaera ngavê, ma ki vi: “Mama, gu têbuhiê nogaku!”

³⁵O Isako ki arami, ki vi: “O vesimu ki râ me ki hagaparuê kê bani têbuhia ngaia.”

³⁶O Esau ki vi: “Na ruata na matena i hagahagaparuê ngekê. Tahema ga hêtana vi o Jakobo. Hagenago ngaia ki hanagoa teniê na tarana na bêbê ni kare, ma i ngekê ngaia ki hagaparugo ko têbuhia ngaia. I hega, i arari ma, vigu têbuhiê nogaku?”

³⁷O Isako ki arami, ki vi: “Inê kê bani naka ngaia ki raha tangago ma ki marungira na goana hato. Inê kê bani vatea renigi na koni ma na vaini. Hetaki o kareku. I bara tangê, ve katoa ta na marâ tangago.”

³⁸O Esau ki ama ni nungia nga o vaemana, ki vi: “I hega, na ani gi tage ma kani ararigo, go têtêbuhia, ma inê ki mareha? Mama, gu têbuhiê nogaku!” Ma ngaia ki haganega ki angi nikâ.

³⁹O Isako ki vi tanga, ki vi: “I vavearo ki mareha rârâ na kârupu tangago. I mareha rârâ na mu vige ganora tangago.

⁴⁰Igo ko page hagêguria na tatapa borahu iamu. Na goamu ki page marungigo. Matena gu usitenia na tarana ngekana, igo ko page musigi na varo i rakugo renigi.”

⁴¹O Esau ki merongasia ngavê o Jakobo, suria o vaematerua ki têbuhia ngaia. Ngaia o Esau ki tako ki vi: “Matena o vaemaku ki meme ki hatohato na hagahunu bungi, oi, inê kê page nahunahu hunia o Jakobo.”

⁴²Matena ka Rebeka ki rongoa na katoha iana o Esau, ngaia ki kasi tamasinga tanga o Jakobo ki râ me, ma ki vi tanga, ki vi: “Bâ, o veogamu o Esau ki naka na siva tangago, hanana vi nanahuigo ko meme.

⁴³Hoi o kareku, go arâ surigi na marâ gê visigi. Gu gavagava nga i ngekê tanga i Harani i pasina o veogaku o Labani.

⁴⁴Gu gâga vê noga i pasina, mataro me ki soso na mangariaganiha iana o veogamu,

⁴⁵ma ki bonotenia na tarana go katoa tanga. Ma hemuri inê kê kasia vê ta na enoni ki mego aporo me. I era ma kê magari renigamurua igê na tangiana gi tage.”

⁴⁶Ka Rebeka ki vi tanga o Isako, ki vi: “Inê ki usi na apeku renira na gete na Hitita iana o Esau. Inê ki araria ma vi ve me râ, manga vi o Jakobo ma ki êragia nogana na hitangita na kare viru na Hitita.”