Read Kahua HAGONEGAHANI 28 Bible Online

HAGONEGAHANI 28 - Kahua bible

HAGONEGAHANI 28

¹O Isako ki unia me o Jakobo, ki aria, ma ki vi: “Siana ko auragia na hitangita na kare viru ni Kanani.

²Go arâ hete i Mesopotamia i pasina o viramu o Betuele ma ko auragia igê ta na hitangita na kare viru i ngekana, na hitangita ka karena o momu o Labani.

³God raramohaga hunia ke hagapua na êragiha iamu, hanana go aparara rako na kare ma ko voravora re na êvarita na hakuta gahu ninuni.

⁴God ke haganahunigamu, igo ma na raraha iamu renia na ramana, manga i bani katoa tanga o Abarahamo, ma ke haganahunigo renia na agua, go bani oga me igê ikê, ma God ki bani haganahunia o Abarahamo renia.”

⁵O Isako ki kasi râ o Jakobo tanga i Mesopotamia i pasina o Labani o karena o Betuele ni Arama, o veogana ka Rebeka kenaterua o Jakobo mo Esau.

⁶O Esau ki bani girara, vi o Isako ki bani têbuhia o Jakobo ma ki kasia râ i Mesopotamia, hanana vi garia igê na gete ki auragia. Ngaia ki bani girara nikâ, vi matena o Isako ki têbuhia o Jakobo, ngaia ki hagapêpua, vi siana ki êragia ta na gete ni Kanani.

⁷O Esau ki tarahua, vi o Jakobo ki tê viteaterua na enana ma ki bani râ i Mesopotamia.

⁸Tahema o Esau ki girara, vi o vaemana ki usitenira na gete ni Kanani.

⁹Vikê ngaia ki râ i pasina o Isimaele o karena o Abarahamo ma ki êragia ka Magalata ka karena o Isimaele ma kesina o Nabaiote.

¹⁰O Jakobo ki pania i Bereseba ma ki tavoraha tanga i Harani.

¹¹Matena i su noga na arito, ngaia ki ata me igê na agua i apuna ma ngaia ki tako vi mauru i ngekana. Ngaia ki tâ ni mêruha ma ki tavoa na hê ki bêbê igê.

¹²Ngaia ki marute ma ki rigia na maraara, i haganega i ano ki akê i vavearo. Na angero ka herânge ka tagere ma ni so igê.

¹³Ngaia ki bâsia na Araha igê na taretarena akê. Na Araha ki tamasi tanga, ki vi: “Inê nga na Araha God, o Abarahamo mo Isako karu rahesiê. Inê be haganahunigamu igo ma na raraha iamu renia na mako, go tâ igê ikê.

¹⁴Na raraha iamu ka page gahugahu mangagi na momogani na one i maveta. Ngaira ka page sugasugagi na taritarihata tangagi na apanini heri. Inê be haganahunigamu igo ma na raraha iamu renia na ramana ma na hakuta hato ninuni ka page avarasiê, kê korokoro tangara manga gê koro tangagamu igamu.

¹⁵Bâ, inê be ngahisigo ma be anumasigo i na ara ni agua mavê go arâ igê. Inê kê page torego aporo tanga na agua ikê. Inê be marupego tare ma be hagamonarigi na suruha hato iaku tangago.”

¹⁶O Jakobo ki rite ma ki vi: “E, na Araha ikê! Ngaia i na agua ikê ma inê kê pe hagare!”

¹⁷Ngaia ki magu ma ki vi: “Na agua ikê ki mamagutaga! I monari, na agua iana God ngekê. Na maani ruma tanga i pasina.”

¹⁸Ki tangi me ma o Jakobo ki rite. Ngaira ki tavoa na hê i bêbê igê ma ki hagêrasia, hanana vi na girarana na agua ngekana ki apuna. Ma hemuri ngaia ki meria so na oile ni olive igê, hanana i hagapunaria tanga God.

¹⁹Ngaia ki hêtana na agua ngekana vi Betele, i vi ruma iana God. I nago na hinua i ngekana ka hêtana vi Luse.

²⁰Ma hemuri o Jakobo ki tohe, ki vi: “Manga vi igo ma ko ngahisiê ma ko anumasiê igê na râha iaku ngekê ma ko haganahuniê renigi na ngêra ma na gahu,

²¹ma ki manga gê aporo me bâkoro ma i pasina o vaemaku, oi, inê kê page rahesigo, igo getego ma na God iaku.

²²Na agua gê hagêrasia igê na hê ikê, ngaia ki na agua ga page rahesigo igê, ma inê kê page vogasigo renigi na ara ni tangahuruta na marâ, go haganahuniê renigi.”