Read Kahua HAGONEGAHANI 29 Bible Online

HAGONEGAHANI 29 - Kahua bible

HAGONEGAHANI 29

¹O Jakobo ki uruia na râha iana ma ki bêkê tanga i Mesopotamia.

²Matena i rârâ, ngaia ki tariha igê na ve karu igê na masusu. Na totoha ni sipi gi oru ka hetâhi rihia. Ga hagatonomira tenia na vekaru. Na bagahê raha ka buhia renia na maana.

³Matena na ara ni totoha ni sipi ka hakuhaku i ngekana, na enoni ga bâsuri sipi ka gurua râ na bubuhina ma ka hagatonomira ma hemuri ka buhia aporo.

⁴O Jakobo ki hagatera na enoni ga bâsuri sipi, ki vi: “Bamane, i pasimi kani i he?” Ngaira ka arami, ka vi: “I Harane.”

⁵Ngaia ki hagatera, ki vi: “Igamu kamu girara vari o Labani o karena o Nagore?” Ngaira ka arami, ka vi: “Ua, mi girara.”

⁶Ngaia ki hagatera, ki vi: “I hega, ngaia ki gâga bâkoro ma?” Ngaira ka arami, ka vi: “Ua, ngaia ki gâga bâkoro ma. Sira râ! Ka Ragele ka karena kani merarâ me na totoha ni sipi iana ikana.”

⁷O Jakobo ki vi: “E, na tangiana raha mênga ngekê. I mamênga na matena tanga vige torera me na totoha ni sipi. Tanu hega mu hagatonomira ma kamu meraporo ka ngêngê go nikâ?”

⁸Ngaira ka arami, ka vi: Mareha! Igami kami merâ ga rârâ, mataro me ka arâ me haku me na totoha ni sipi ma kami gurua râ na bubuhina na vekaru. Ma hemuri kami kahu hagatonomira.

⁹Matena o Jakobo ki meratamasi mênga, ka Ragele ki merataha me na totoha ni sipi iana o Labani o mona o Jakobo.

¹⁰Matena o Jakobo ki rigia ka Ragele henia na totoha ni sipi, ngaia ki râ tanga na vekaru ma ki gurua râ na bubuhina ma ki hagatonomira na sipi.

¹¹Ma hemuri ngaia ki siginia ka Ragele ma ki angi, suria i vagevagesia.

¹²Ngaia ki vi tanga, ki vi: “Bâ, o moku ka vaemamu. Kenaku kani ka Rebeka.” Ka Ragela ki tango ki râ ki hagarongoa o vaemana.

¹³Matena o Labani ki rongoa, vi o Jakobo o mona ki râme, ngaia ki tango vurusia, ki ruia ma ki siginia ma ki merâ i ruma iana. Matena o Jakobo ki hagarongoa hato o Labani renia na râha iana,

¹⁴o Labani ki vi: “Monari, igerua ka na ruma gi tage!” O Jakobo ki oga i ngekana suria na hageha hagenani.

¹⁵O Labani ki vi tanga o Jakobo, ki vi: “I pe ararigo, vigu tagara purua ma tangê, suria vi igo ka no moku. Hoi, gi hita ko obania, vigê vurigo renia?”

¹⁶O Labani ki nahunirerua ka karena gi rua. Na gete hagenago ka hêtana vi ka Lea ma na gete i muri ka hêtana vi ka Ragele.

¹⁷Ka Lea ki bâ mamêruga na maana ma ka Ragele ki na tohona na gete.

¹⁸O Jakobo ki takuia ka Ragele. Tahema ngaia ki vi tanga o Labani, ki vi: “Manga go hagamarumungenia ka Ragele tangê, hoi, gê tagara tangago surigi na harisi gi pi.”

¹⁹O Labani ki arami, ki vi: “Tangê inê, ki koro ngavê, manga vi igo nga kanigo auragia, mareha vi na mane getea. I koro era. Go gâga so ma ko tagara tangê.”

²⁰O Jakobo ki tagara suria ka Ragele surigi na harisi gi pi. Na harisi gi pi ngegana ka mangagi na kere tangiani haritamani ma tanga, suria i takuia ngavê ka Ragele.

²¹I murini na harisi gi pi o Jakobo ki vi tanga o Labani, ki vi: “Hoi, i hato na matena ni tagaraha iaku. Gu nakê be êragia ka karemu.”

²²Vikê o Labani ki hagarêa na ngêra na hagataku ma ki harora na enoni hato.

²³Igê na bungiana ngekana o Labani ki tagarenia râ ka Lea tanga o Jakobo ma ki mareha vi ka Ragele. O Jakobo ki memêru ka Lea.

²⁴O Labani ki tagarenia ka Silipa na kare vurivuri iana tanga ka Lea ka karena, hanana i tagara tanga.

²⁵Matena i tangi, o Jakobo, ki kahu girara, vi ngaia kani ka Lea. Tahema ngaia ki râ ki vi tanga o Labani, ki vi: “Tanu hega go katoê vikana? Inê kê tagara suria ka Ragele. Tanu hega go hagaparuê?”

²⁶O Labani ki arami, ki vi: “Na tauhamami ikê: na kere gete i muri ki pe araria, vige auragi bêso renia keogana.

²⁷Gu naka ke hato na tangiani gi pi ni ngêra na hagataku, ma hemuri kê kahu naka vê tangago ka Ragele, manga vi igo ma ko tagara suria akê nikâ surigi na harisi gi pi.”

²⁸O Jakobo ki agana ma. Matena ga hato na tangiani gi pi ni ngêra ni hagataku, o Labani ki tagarenia ka Ragele ka karena tanga o Jakobo ki êragia.

²⁹O Labani ki tagarenia ka Biliha tanga ka Ragele ka karena, hanana i tagara tanga.

³⁰O Jakobo ki memêru nogana ka Ragele ma ki takuia bâraha teharia ka Lea. Ma ngaia ki kahu tagara akê nikâ tanga o Labani surigi na harisi gi pi.

³¹Matena na Araha ki girara, vi o Jakobo ki takuia bâraha ka Ragele teharia ka Lea, ngaia ki katoa ka Lea ki girara i apara kare ma ka Ragele ki ama ni gomara nga mênga.

³²Ka Lea ki atui ma ki apara na kare mane. Ngaia ki vi: “God ki bâsiê, vi inê kê maki ma i ngekê o vaniaku ki page takuiê!” Tahema ngaia ki hêtana renia vi o Rubeni, i vivi ‘Ngaia ki bâsia na makiha iaku.’

³³Ngaia ki atui kê nikâ ma ki apara nikâ ta na kare mane. Ngaia ki vi: “Na Araha ki vateê nikâ na kare ikê, suria ngaia ki rongoa, vi o vaniaku ki pe takuiê.” Tahema ngaia ki hêtana vi o Simeone, i vivi ‘Rongoa.’

³⁴Ngaia ki atui kê nikâ ma ki apara nikâ ta na kere mane. Ngaia ki vi: “I ngekê o vaniaku ki page têtê suriê nga, suria inê kê aparara na kare mane gi oru.” Tahema ngaia ki hêtana vi o Levi, vivi ‘Têtêsuria.’

³⁵Ngaia ki atui kê nikâ ma ki apara nikâ ta na kare mane. Ngaia ki vi: “I ngeke inê kê hagarahasia na Araha.” Tahema ngaia ki hêtana vi o Juta i vivi ‘Hagarahasia.’ Hemuri ngaia ki oga te na aparaha ni kare.