Read Kahua HAGONEGAHANI 30 Bible Online

HAGONEGAHANI 30 - Kahua bible

HAGONEGAHANI 30

¹O Jakobo ma ka Ragele karu pe apara kare. Tahema ka Ragele ki hengaria keogana ma ki vi tanga o Jakobo, ki vi: “Gu kasi kare tangê. Manga i mareha, inê kê meme.”

²O Jakobo ki mangariaga tanga ka Ragele, ma ki vi: “Mareha vi God kani inê! Ngaia nga kani katogo ko pe apara kare.”

³Ka Ragele ki vi: “Gu torea ka Biliha na gete vurivuri iaku ma ko memêru, vi apara kare tangê. Inê kê page taua na karena ma kê page katoa re vi inê kani kenana.

⁴Vikê ngaia ki tagarenia ka Biliha tanga o Jakobo ma ngaia ki mêru henia.

⁵Ka Biliha ki atui ma ki apara na kare mane na karena o Jakobo.

⁶Ka Ragele ki vi: “Na Araha ki pane heniê. Ngaia ki aganaria na avarasiha iaku ma ki vateê na kere mane.” Tahema ngaia ki hêtana ki vi o Tano, i vivi ‘Panehenia.’

⁷Ka Biliha ki atui kê nikâ ma ki apara nikâ na kare mane na karena o Jakobo.

⁸Ka Ragele ki vi: “Inê kê meheariha bâraha keogaku ma kê teharia. Tahema ngaia ki hêtana vi Napatali i vivi ‘Meheariha.’

⁹Matena ka Lea ki girara, vi ngaia ki oga te na aparaha ni kare, ngaia ki tagarenia ka Silipa na kare vurivuri iana tanga o Jakobo ki manga vi na gete iana.

¹⁰Ka Silipa ki apara na kare mane tanga o Jakobo.

¹¹Ka Lea ki vi: “Inê kê hagâvo.” Tahema ngaia ki hêtana vi o Gata, i vivi ‘Hagâvo.’

¹²Ka Silipa ki apara kê nikâ na kare mane tanga o Jakobo,

¹³ma ka Lea ki vi: “Inê kê obakoro ngavê. I ngekê na gete ka page visiê, vi gê obakoro.” Tahema ngaia ki hêtana vi o Asere, i vivi ‘Obakoroha’.

¹⁴Matena i mariri na harisi, o Rubeni ki râ i mu ma ki tarahua igê na marâ ni hagangi ma ki torea tanga ka Lea kenana. Ka Ragele ki vi tanga ka Lea, ki vi: “Gu vateê tani na marâ ni hagangiana o karemu.”

¹⁵Ka Lea ki arami, ki vi: “Igo ko bani torea nga o vaniaku teniê! Tanu hega ko obania nikâ, vigo torea na marâ ni hagangi tenia o kareku?” Ka Ragele ki vi: “Manga go vateê tani na marâ ni hagangi iana o karemu, hoita, go kahu memêru o Jakobo i rikini bungi.”

¹⁶I manurahi, matena o Jakobo ki aporo me noga tenigi na mu, ka Lea ki râ vurusia ma ki vi tanga, ki vi: “Go meêmêru i rikini bungi, suria inê kê bani vuripusigo renia na marâ ni hagangi iana o kareku.” Vikê o Jakobo ki memêru igê na bungiana ngekana.

¹⁷God ki aganaria na avarasiha iana ka Lea. Ka Lea ki atui ma ki apara nikâ na kare mane tanga o Jakobo. Ngaia ki na rimata na matena i apara.

¹⁸Ka Lea ki vi: “God ki vateê na meku, suria gê tagarenia na gete vurivuri iaku tanga o vaniaku.” Tahema ngaia ki hêtana vi o Isakare, i vivi ‘Mena na Tagaraha.’

¹⁹Ka Lea ki atui nikâ ma ki apara nikâ na kare mane tanga o Jakobo. Ngaia ki na onota na matena i apara.

²⁰Ngaia ki vi: “God ki votoa na mahatanga koro tangê. I ngekê o vaniaku page obaniê, suria inê kê aparara o karena ge ono.” Tahema ngaia ki hêtana vi o Sebuluni, i vivi ‘Mahatanga-Obaniha.’

²¹Ma hemuri ngaia ki apara na kare hehene ma ki hêtana vi ka Tina.

²²Ma hemuri God ki takia ka Ragele. Ngaia ki aganaria na avarasiha iana ma ki katoa, hanana i girara i apara kare.

²³Ngaia ki atui ma ki apara na kare mane. Ngaia ki vi: “God ki hatungia na makiha iaku, suria i vateê, kê apara na kare mane.

²⁴God ki katoê be apara nikâ.” Tahema ngaia ki hêtana vi o Josepo i vivi ‘Hatungia na Makiha.’

²⁵I Murina i vora o Josepo, o Jakobo ki vi tanga o Labani, ki vi: “Nakê be râ be aporo i pasiku.

²⁶Go haganahuniê renira kaniaku ma na kareku renigi na meku gê tagara tangago, ma kê kahu arâ. Igo ko girarê, gê tagara maninga tangago.”

²⁷O Labani ki vi tanga, ki vi: “Naka be vi: Gu oga so ma. I nago na ramana ki pe tarahuê, ma suria igo tahema God ki haganahuniê renia.

²⁸Gu visia me na memu be vatego.”

²⁹O Jakobo ki arami, ki vi: “Igo ko girarê, gê tagara maninga tangago. Igo ko girara, vi na togoha iamu ka aharêsigo, suria inê kê bâsurira bâkoro.

³⁰I nago igo ko pe togoha raha, ma na matena gê râ me na togoha ka kahu aharêsigo ngavê. Ke bani ma inê nge, tahema na Araha ki hagarakonira. I ngekê ki arariê, gê bâbâsuriê mareku.”

³¹O Labani ki hagatea, ki vi: “Gi hita ki arariê, vigê vurigo renia?” O Jakobo ki arami, ki vi: “Inê kê pe obanigi na haga. Inê kê agana hanana vigê bâbâsurira na togoha iamu, manga vi igo ma ko aganaria na takoha iaku.

³²Ngaia ki manga ikê: Gu nakê be râhira na ara ni togoha hato iamu i ngekê ma be atera hura na ara ni karena sipi masuri ma na ara ni bêhâgata totoperega na goti. Ngaira nga ka na meku gê obania.

³³I hemuri igo ko kahu tarahua maninga, vi inê kê hagamonaria na suruheri iakerua se mareha. Matena go arâ me ko bâsira ma ko tarahua tani na goti i pe totoperega se tani na sipi i pe masuri, hoi igo ko girara, vi inê kê hanagoa.”

³⁴O Labani ki arami, ki vi: “Hoi, i koro ma. Garu kato manga go takusia.”

³⁵Igê na tangiana ngekana o Labani ki atera hura na ara ni goti mane ga totoperega ma ka êririga ma nikâ na ara ni goti hehene ga totoperega ma nikâ na ara ni sipi masuri. Ngaia ki nakara o karena ka bâbâsurira.

³⁶Ma hemuri ngaia ki merarâ hagatê ngavê, i ararigi na tangiani gi oru tenia o Jakobo. O Jakobo ki bâsurira na togoha iana o Labani, na ani ga hita so.

³⁷O Jakobo ki uvegi na arani na apinige hehegitigi gi oru ma ki bâgi ki segesegerega siki.

³⁸Ngaia ki nakagi na arani na apinige ngegana i raroni na vekaru ma na maraguhu ni tonoha tangara na togoha. Ngaia ki nakagi vigana tangara, suria na ani mane ka rikihira na ani hehene, matena ga arâ me tanga ga totono.

³⁹Vikê, matena na goti mane ka rikihira na ani hehene ga borogogo hagarangigi na arani na apinige ngegana, ngaira ka agusira na ani ga êririga ma ka totoperega.

⁴⁰O Jakobo ki sikara na sipi tenira na goti ma ki katora ka maatira râ na ani ga êririga ma ka masuri i berarogata na togoha iana o Labani. Igê na tarana ngekana ngaia ki hagarakonira na togoha iana marena ma ki sikara tenira na anina o Labani.

⁴¹O Jakobo ki nakagi na arani na apinige ngegana igê na maraguhu ni tonoha tangara ma na ani i bâkoro na apeta, matena ga borogogo ma ka hanehane. Vikana ka hagaobaragara, matena ga maatigi na arani na apinige ngegana.

⁴²Ma ngaia ki pe nakagi na arani na apinige agana tangara na ani i pe bâkoro na apeta hanana vi ge maatigi.

⁴³Igê na tarana ngekana o Labani ki nahunira ma na ani i pe bâkoro na apeta, ma o Jakobo ki nahunira ma na ani i bâkoro na apeta. Ngaia ka aharêsia ngavê na togoha, na enoni vurivuri, na kamelo ma na tonki.