Read Kahua HAGONEGAHANI 31 Bible Online

HAGONEGAHANI 31 - Kahua bible

HAGONEGAHANI 31

¹O Jakobo ki rongo, vi o karena o Labani ka hetamatamasi, ka vi: “O Jakobo ki têgi hato na ara ni nahuninga hato iana o vaemaka. Ngaia ki ruruguha ngavê renigi na nahuninga iana o vaemaka.”

²O Jakobo ki girara nikâ, vi o Labani ki pe komania manga i nago.

³Tahema na Araha ki tamasi tanga, ki vi: “Gu aporo tanga na agua go vora igê, na agua iata na êvarimu. Inê kê page ngahisigo.”

⁴Vikê o Jakobo ki kasi tamasinga tangarerua ka Ragele ma ka Lea, hanana i naasirerua igê na masusu, ga oga igê na togoha iana.

⁵Ngaia ki vi tangarerua, ki vi: “Inê kê girara, vi o vaemamurua ki pe komaniê manga i nago. Ma na God, o vaemaku i rahesia, ngaia ki bani tamaniê me.

⁶Igamurua kamuru bani girarê, vigê tagara raha tanga o vaemamurua, naka ma na ta ki bara.

⁷Henaka, ma ngaia ki hagabekasiê ma hagetangahuru ki urusia na meku. Ma God ki urapusia ki pe erasiê.

⁸Matena o Labani ki vivi ‘Na togoha totoperega ngaira ka na memu,’ hoi, ma na togoha hato ka agusi totoperega. Ma na matena i vivi ‘Na togoha ga êririga ngaira ka na memu,’ hoi ma na togoha hato ka agusi êririga.

⁹God kani torera na togoha tenia o vaemamurua ma ki haganahuniê renira.

¹⁰Igê na matena ga borogogo na togoha, inê kê marute. Inê kê bâsira na ani mane ga hanehane, ngaira ka êririga ma ka totoperega.

¹¹Na angero iana na Araha ki tamasi tangê igê na maruteha, ma ki vi: ‘Jakobo!’ Inê kê arami, kê vi: ‘Oi!’

¹²Ngaia ki vi: ‘Gu bâ, na togoha hato na ani mane ga hanehane, ngaira ka êririga ma ka totoperega. Inê kê katora vigana, suria inê kê bani bâsigi na tauhana o Labani tangago.

¹³Inê nga ki na God gê vora tangago i Betele, na agua go hagapunaria igê na hê ma ko meria so igê na oile ni olive, hanana vi na girarana na agua ngekana ki apuna, ma i ngekana nikâ igo ko tohe igê tangê. Hoi, gu hagarurugu ma ku aporo tanga na agua iamu go vora igê.’”

¹⁴Ka Ragele ma ka Lea karu aramia o Jakobo, karu vi: “Na nahuninga iana o vaemamirua ki mareha rârâ, vige hita so tangagamirua.

¹⁵Ngaia ki katogamirua manga na mahuara. Ngaia ki hagavuringenigamirua ma ki kasi hato na menirua.

¹⁶Na nahuninga hato i tavogi râ God tenia o vaemamirua ngegana, ka na animami, igamirua ma na karemirua. Hoi, gu râ surigi na marâ i visigi God tangago.”

¹⁷Hoi o Jakobo ki hagarurugu, ma ki aporo i pasina o vaemana i Kanani. Ngaia ki hagâgasira na gete iana henira na karena igê na gerita na kamelo henigi na ara ni nahuninga hato iana i tagara tangagi i Mesopotamia. Ngaia ki mumuri ki hagaotora na togoha iana.

¹⁸

¹⁹O Labani ki râ ki tapurua na sipi iana, ma na matena i râ, ka Ragele ki hanagogi na nunuta na ataro o vaemana ki hagarapera.

²⁰O Jakobo ki hagaparua o Labani, suria i pe hagarongoa, vi ngaia ki arâ.

²¹Ngaia ki hatani tavoraha henigi na ara ni nahuninga hato iana. Ngaia ki tarêhia na ve i Uparatesi ma ki togo tangagi na hungani i Giliata.

²²I murini na tangiani gi oru o Labani ki kahu rongoa, vi o Jakobo ki bani gava.

²³Ngaia ki merarâ na me iana ma ki tarigenia o Jakobo surigi na tangiani gi pi, mataro me ki tarahua igê na hungani i Giliata.

²⁴Igê na bungiana ngekana God ki vora tanga o Labani igê na maruteha ma ki vi tanga, ki vi: “Bâ, siana ko haganumanuma o Jakobo.”

²⁵O Jakobo ki bani tagarahia na tênga iana igê na hungani i Giliata. Matena o Labani ki ata vê i ngekana, ngaia ma na me iana ka tagarahia nogata na anita na tênga igê.

²⁶O Labani ki hagatea o Jakobo, ki vi: “Tanu hega go hagaparuê? Tanu hega ko torererua ka kareku manga na gete ga henahuraua igê na hearihatana?

²⁷Tanu hega ko hagabekasiê ko gava pinihi? Manga vigu hagarongoê, vikê igami kami vagevagesigo, kami kiki, kami kahe ma kami tarugigi na gita ma kami kahu arigo ku râ.

²⁸Ma ku bâ, igo ko pe nakê be siginira noga na esiku ma ka kareku, matena ga râ. Na tarana ngekana ki era ngavê.

²⁹Inê kê nahuni ramoha, hanana gê hagatarigo. Ma i na bungi God o vaemamu i rahesia, ngaia ki vi tangê, ki vi, siana hagetage kê hagatarigo.

³⁰Vari igo ko obania bâraha ma vigu aporo i pasimu. Ma ki tanu hega go hanagogi na nunuta na ataro gê hagarapera?”

³¹O Jakobo ki arami, ki vi: “Inê kê magu, suria inê kê takusia ma, vi igo ko page taurerua aporo ka karemu teniê.

³²Ma ki manga go tarahua ikê ta na enoni i tora na nununi na ataro iamu, ngaia ki araria, ga nahuia ki meme. Hoita, i maata na me hato iaka ikê gu gari na ani mavê na marâ iamu ma ko toregi.” O Jakobo ki pe girara, vi ka Ragele kani hanagogi na nununi na ataro o Labani ki hagarapera.

³³O Labani ki râ ma ki gari igê na ruma na gahu iana o Jakobo. Ma hemuri ngaia ki gari nikâ igê na ruma na gahu iana ka Lea ma nikâ igê na ruma na gahu iaterua na gete vurivuri. Ma ngaia ki pe tarahugi rârâ na nununi na ataro iana. Ma hemuri ngaia ki banu igê na ruma na gahu iana ka Ragele.

³⁴Ka Ragele ki bani toregi râ na nunuta na ataro o vaemana ki hagarapera, ma ki bani pinihigi i rarona na anga igê na âgâga i gerina na kamelo ma ki oga hurigi. O Labani ki gari makira i rarona na ruma na gahu ma ki pe tarahugi.

³⁵Ka Ragele ki vi tanga o vaemana, ki vi: “Siana ko mangariaga tangê, suria gê pe ura aharaga i maamu. Inê ki taha na obaku.” O Labani ki gari vê ma ki pe tarahugi rârâ na nunuta na ataro i hagarapera.

³⁶I ngekana o Jakobo ki mangariaga ma ki tamasi ramo tango o Labani, ki vi: “Na ta kê erasia? Na ramata ta kê aharê igê, tahema igo ko tarigeniê?

³⁷Igo ko gari sikosiko renigi na nahuninga hato iaku. Na marâ koro ta iamu kanigo tarahugi igê? Hoi, gu naka so ikê, hanana na me iamu ma na aniku ke bâsia ma ke girara, vi o ti na hitangikerua kani oto na apanena iana.

³⁸Inê kê bani oga me i pasimu surigi na harisi tangahuru gi rua. I na matena ngekana na sipi ma na goti iamu ka apara bâkoro tare. Inê kê pe ngêa rârâ na hitangita na sipi mane se na goti mane iamu.

³⁹I na ara ni mateni ta na marâ ki garagara hunia ta na sipi iamu, inê nga kanigê urusia. Inê kê pe torea tangago, hanana gu girara, vi inê kê pe erasia. Igo ko bonasiê, vigê barugi aporo tangago na ani mavê na marâ ga hanagogi igê na tangiani se igê na bungiani

⁴⁰Hagarako inê kê mamasiaga ngavê. Igê na tangiani na arito ki nahuiê, ma igê na bungiani kê marato ngavê. I bara tangê ve mêru.

⁴¹Na tarani vigana ka tarahuê me surigi na tangahuri harisi gi rua, gê oga i pasimu. Surigi na tangahuri harisi matara ke he inê kê tagara surirerua ka karemu, ma na harisi gi ono kê tagara meta na togoha iamu. Henaka, ma igo ko gurua vato hagetangahuru na meku.

⁴²Manga vi God, na êvariku o Abarahamo ma o Isako karu rahesia, ma ke pe tamaniê, vikê igo ku bani kasiê hura baguru. Ma God ki bâsigi na mamasiaganiha ma na tagaraha raha iaku, ma i na bungi ngaia ki pane heniê.”

⁴³O Labani ki aramia o Jakobo, ki vi: “Na gete igê ngairerua kani ka kareku. Na kareterua ka na aniku. Na togoha ngegê ka na aniku. Bâ, na ara ni marâ hato ikê ka na aniku. Ma suria i bara tangê, vi ve têrerua so ka kareku henira na kareterua,

⁴⁴tahema inê kê agana, hanana vigê naka na suruheri henigo. Hoi, garu page haku na hê, hanana i hagatakusigerua renia na suruheri iakerua.”

⁴⁵Vikê o Jakobo ki ragea na hê ma ki hagêrasia, hanana i hagatakusirerua.

⁴⁶Ngaia ki bonasira na me iana, ka ragegi me nikâ tani na hê ma ka page haku. Ma hemuri ngaira ka ngê haku hagarangia na page na hê.

⁴⁷O Labani ki hêtana na page na hê ngekê igê na tamasinga iana vi ‘Jegare Sahatuta,’ mo Jakobo ki hêtana vi ‘Galete.’

⁴⁸O Labani ki vi tanga o Jakobo, ki vi: “Na page na hê ikê ki hagatakusigerua renia na suruheri iakerua.” Tahema na agua ngekana ka hêtana renia vi Galete.

⁴⁹O Labani ki vi nikâ, ki vi: “Na Araha ke hahutugigerua, matena garu arâ hegitigi.” Vikê na agua ikê ka hêtana nikâ vi Misipa, i vi ‘Agua ni Hahutugiha.’

⁵⁰O Labani ki vi nikâ, ki vi: “Manga vi igo ma ko katorerua bera ka kareku se go auragira me nikâ na gete getera, naka ma inê kê pe girara, hoi, go takusia tare, vi God ki hahutugigerua.

⁵¹Ikê na page na hê na taritarihakerua hegetigi, ma ikê na hê i hagatakusigerua renia na suruheri iakerua.

⁵²Ngairerua gi rua ngegê karu hagatakusigerua. Inê ki asa ve page puaharêngia na page na hê ikê, hanana vi ve megoheariha, ma igo nogamu ki asa vigu page puaharêngia na page na hê ikê se na hê i hagatakusigerua, hanana vigu meêheariha.

⁵³God, o viramu o Abarahamo ki rahesia ma na ani o vaemaku o Nagore ki rahesia, karu page surigerua.” Ma hemuri o Jakobo ki tohe renia God, o vaemana o Isako i rahesia, ki vi, vi ngaia ki ototo suria na suruheri ngekê.

⁵⁴Ngaia ki nahuia ta na sipi ma ki vogasi renia igê na hungani ma ki unira me na me iana tanga na ngauha. Matena ga ngê hato, ngaira ka mêru vê i ngekana igê na hungana.

⁵⁵Igê na mahogotana i tangi râ, o Labani ki siginira na esina ma ka karena ma ki arira, ma ki tavoraha ki aporo i pasina.