Read Kahua HAGONEGAHANI 33 Bible Online

HAGONEGAHANI 33 - Kahua bible

HAGONEGAHANI 33

¹O Jakobo ki bâsia râ o Esau i merarâ me na tangarê ge he na me iana. Vikê ngaia ki voasira na karena tangara ka Lea, ka Ragele ma na gete getererua gi rua iana.

²Ngaia ki nakarerua na gete getererua gi rua iana henira na kareterua, ma hemuri ka Lea henira na karena, ma hemuri tatare ka Ragele henia o Josepo.

³O Jakobo ki nanago tarata. Matena i memênga vige tarahua râ o veogana, ngaia ki bani tubê so i ano hagepi.

⁴Mo Esau ki tango vurusia, ki ruia ma ki siginia. Ngairerua karu angi tagenaterua.

⁵Matena o Esau ki sira râ ma ki bâsira na gete ma na kare, ngaia ki hagate, ki vi: “Ti kanigo merarâ me?” O Jakobo ki arami, ki vi: “Maneraha, na kareku ngegana. God ki koro ngavê tangê.”

⁶Ma hemuri na gete getererua gi rua henira na kareterua ka ura me ma ka tubê so i ano.

⁷Ma hemuri ka ura me nogata ka Lea ma na karena, ma hemuri tatare na ahemana o Josepo ma ka Ragele karu ura me ma karu tubê so i ano.

⁸O Esau ki hagate, ki vi: “Na togoha gê bani tarahura me i tara, tanu hega go kato vikana?” O Jakobo ki arami, ki vi: “Inê kê kato vikana, suria vigê hagakoro obamu.”

⁹O Esau ki vi: “O vaesiku, ga bani aharêsiê. Nakara ma vê tangago.”

¹⁰O Jakobo ki vi: “E, siana. Gu koro aporo hete tangê. Gu aganaria na panepanenga iaku tangago. Tangê inê, matena gê bâsigo, ki tagenana gê bâsia God, suria igo ko komaniê ngavê.

¹¹Gu aganaria nga na panepanenga iaku tangago. God ki koro ngavê tangê ma ki haganahuniê renigi na ara ni marâ ga arariê, vigê nahunira.” O Jakobo ki ama ni togeaga nga tanga, mataro me ki aganaria.

¹²O Esau ki vi: “Hoi, nika ge râ. Be nanago taramu.

¹³O Jakobo ki arami, ki vi: “Igo ko girarara na kare ka pe mêa ni râha, ma inê kê takusira nikâ na sipi ma na togoha hekareta. Manga viga hagasusura re râha, henaka ma i rarona na tangiana gi tage, ngaira hato ka page me igê.

¹⁴Gu nanago nga taraku. Inê be meramumuri haritagi na togoha ma na kare, gê arâ surira ma ngaira. Inê kê page atata vê nogaku i Etome.”

¹⁵O Esau ki vi: “Hoi, manga ngekana, gu nakê, be panira so tani na me iaku henigo.” Ma o Jakobo ki arami, ki vi: “Inê kê pe tako vikana. Gê obania ma hete, vigê hagakoro obamu.”

¹⁶Hoita, igê na tangiana ngekana o Esau ki aporo i Etome,

¹⁷ma o Jakobo ki râ i Sukote. I ngekana ngaia ki toregi igê na ruma iana ma na mamaruku tangara na togoha iana. Tahema ga hêtana na aguna ngekana vi Sukote, i vivi ‘Mamaruku.’

¹⁸Matena o Jakobo ki aporo me tenia i Mesopotamia, ngaia ki ata bâkoro ma i hinua i Sekemi i Kanani ma ki tagarahia igê na tênga iana tarege tenia na hinua.

¹⁹Ngaia ki vuria na mako, na tênga iana ki oga igê, renigi na tangarê gi tage na haga na siliva. Ngaia ki vuria tenira na raraha iana o Hemore, o vaemana o Sekemi.

²⁰Ngaia ki tagarahia na panga na bea ni vogasiha i ngekana ma ki hêtana vi ‘El’, i vivi ‘God.’ Ngaia kani God iana o Isiraele.