Read Kahua HAGONEGAHANI 34 Bible Online

HAGONEGAHANI 34 - Kahua bible

HAGONEGAHANI 34

¹I ta na tangiana ka Tina ka kareterua o Jakobo ma ka Lea, ngaia ki vatugira na hehene na Kananita.

²Matena o Sekemi o karena o Hemore na Hivita i maneraha i na apenena i ngekana, ki bâsia, ngaia ki ranguia ma ki paronga era henia.

³Ngaia ki bâsia, vi ka Tina ki na tohona na kere gete. Tahema ngaia ki angisia ma ki uhungia vi hagangisia.

⁴Ngaia ki vi tanga o vaemana, ki vi: “Inê kê obanigo, go torea na kere gete ikê tangê, kê auragia.”

⁵O Jakobo ki rongo, vi ka karena ki tangahuria, ma ki naka mavê, mataro me o karena ka aporo me tenigi na masusu, ga bâsurira igê na togoha iana.

⁶O Hemore o vaemana o Sekemi ki râ ki metamasi o Jakobo.

⁷Igê na matena nga ngekana o karena o Jakobo ka ata me tenigi na masusu. Matena ga rongo, ngaira ka gasuga ma ka mangariaga ngavê, suria o Sekemi ki katoa na tarana i erataga ngavê ma ki hagamakira na Isiraelita, suria i ranguia ka karena o Jakobo ma ki rongo era henia.

⁸O Hemore ki vi tanga o Jakobo, ki vi: “Kareku o Sekemi ki angisia ka karemu. Gu naka vê nga ke êragia.

⁹Nakagerua karu suruheri, vi na êragiha hetarênge ke oga i berarogaka.

¹⁰Vikana igamu kamu girara, mu oga ikê henigami i pasimami. Igamu kamu girara mu gâga igê na agua mavê mu obania, ma kamu ata ni vurivuri purunguniaga ma kamu hagavuri purunguniaga, ma kamu nahunigi na mako iami maremi.”

¹¹Hemuri o Sekemi ki vi tangara o vaemana ma o goana ka Tina, ki vi: “Mu hagamarumungenia tangê ma kê page vategamu na ani mavê na vurina.

¹²Mu usigi me na mahatanga mu obanigi ma kamu naka na vurina manga mu obania tangê, naka ma i akê. Inê kê page vategamu na ani mavê na marâ mu obanigi, manga vi igamu ma kamu hagamarumungenia tangê.”

¹³Suria o Sekemi ki bani katoa kesita ka Tina ki tangahuria, ngaira o karena Jakobo ka aramirerua hagaparu o Sekemi ma o Hemore o vaemana.

¹⁴Ngaira ka vi tanga o Hemore, ka vi: “I bara tangagami, vigami hagamarumungenia kesimani ke êragia na mane, ga pe retea râ na gavona na varana. Manga mi katokato vikana, igami kami tangahurigami.

¹⁵Igami kami girara mi hagamarumungenia, manga vi igo ma ko manga igami ma na ara ni mane hato ka retegi râ nogata na gavoni na varata.

¹⁶Hoi, ngekana igami kami girara kahu hagamarumungenia na êragiha hetarênge. Igami kami page gâga i berarogami ma igia ka voravora na varo ninuni gi tage.

¹⁷Ma ki manga mu pe aganarigi na tamasinga iamami ma kamu usisi, vige retegi râ na gavoni na varami, hoi, igami kami page meaporo ma kami arâ.”

¹⁸O Hemore mo Sekemi o karena karu takusia, vi na tamasinga ngegana ka koro.

¹⁹O Sekemi na mane na gapu haoru ki pe obania, vige hagarihu, suria i angisia bâraha ka karena o Jakobo. O Sekemi ki na ani i raha i berarogata na goana.

²⁰O Hemore mo Sekemi o karena karu râ igê na agua ni hekarigiana hagarangia na maani para ni hinua. Ngairerua karu tamasi tangara na enoni i hinua iaterua, karu vi:

²¹“Na mane ngegana ngaira ka koro. Mu nakara ke oga i pasika ma ke merarâ tatarasi na togoha iata. Na agua ki raha ki ararigia igia ma ngaira. Naka ke êragira ka kareta ma ke hagamarumungenira ka kareka tangara ke êragira.

²²Ma na marâ gi tage ma: na mane ngegana ka agana, hanana viga gâga henigia ma ka tage voravora re na varo ninuni gi tage, manga vi igia ma ka retegi râ na gavoni na varata na mane hato i pasika mangara ngaira.

²³Igia ma hete ge nahunira na togoha hato ma na ara ni nahuninga hato iata. Nika ge aganaria hanana ngaira ka page gâga henigia.”

²⁴Na enoni hato i hinua ka aganarigi na tamasinga iaterua o Hemore ma o Sekemi o karena, ma ka retegi râ na gavoni na varata na ara ni mane hato.

²⁵Ga retera ki hato hurigi na tangiani gi oru ma ka maehasigi mêngagi, o hegoana o Simeone mo Levi veogana ka Tina, ngairerua karu migibanu pinihi i hinua na tatapa borahu iaterua ma ka ahura hunira na ara ni mane hato,

²⁶henirerua o Hemore mo Sekemi o karena. Ma hemuri ngairerua karu torea hura ka Tina tenia na ruma iana o Sekemi ma karu meaporo.

²⁷Matena garu nahuira hato, tani o karena o Jakobo ka rurugua na hinua, baruna ga katoa kesita ki tangahuria.

²⁸Ngaira ka torera hato vê na sipi, na goti, na tonki, na puruka ma na ara ni marâ hato i hinua ma i mu.

²⁹Ngaira ka toregi hato vê na ara ni marâ ga obanigi. Ngaira ka henahuraura hato vê na gete ma na kare ma ka sinogi vê na ruma.

³⁰O Jakobo ki vi tangarerua o Simeone mo Levi, ki vi: “Igamurua kamuru hagarateku. Bâ, na Kananita, na Perisita ma na enoni getera ga oga igê na agua ikê, ka page merongasiê. Inê kê pe nahunira rako na mane ni me. Manga vi ngaira ma ka hakuhaku tangê ka meêheariha, ngaira ka page mutera na ahemata hagenani iaka.”

³¹Ma ngairerua karu arami, karu vi: “Ua, ma igamirua ki bara, vigamuru naka mavê kesimirua tangara ke katoa manga vi ngaia ka na êrâ purua ma.”