Read Kahua HAGONEGAHANI 38 Bible Online

HAGONEGAHANI 38 - Kahua bible

HAGONEGAHANI 38

¹Igê na matena ngekana o Juta ki panira o goana ma ki râ ki oga i hinua i Atulama i pasina o Gira.

²I ngekana ngaia ki tarahua igê ka karena o Sua ni Kanani. Ma ngaia ki êragia.

³Ngaia ki memêru, ma ngairerua karu apara na kare mane. Ngaia ki hêtana vi o Eri.

⁴Na gete ki obara ma ki apara tani nikâ na kare mane, ma ki hêtana vi o Onane.

⁵Ngaia ki apara ta na kare mane nikâ ma ki hêtana vi o Sela. O Juta ki oga i Kesibe, matena i vora o karena ngekana.

⁶O Juta ki atengenia na gete tanga o Eri na bêbê ni kare iana. Na gete ngekê kani Tamare.

⁷O Eri ki bagatauhana tare ma ki hagamangaria na Araha. Tahema na Araha ki nahuia ki me.

⁸Vikê o Juta ki vi tanga o Onane vesina o Eri, ki vi: “Gu râ ma ku memêru na nâna o veogamu. Na tarana ngekana ki tuguhigo, suria igo ka no vehana hanana o veogamu ki nahunira na raraha.”

⁹Ma Onane ki bani girara, vi na kare ngegana ka mareha vi na anina. Vikê matena i memêru kehana, ngaia ki hagaguguhigi hura ma na marasina i metara.

¹⁰Na bagatauhana ngekê ki hagamangaria na Araha. Tahema na Araha ki nahuia ki me nogana.

¹¹Ma hemuri o Juta ki vi tanga ka Tamare ka hungâna, ki vi: “Gu aporo i pasina o vaemamu ma ko gâga go nânâ ma vikana, mataro me ki raharaha o kareku o Sela.” Ngaia ki vi vikana, suria ngaia ki magu vi i era ma ka nahuia nogana o Sela mangarerua o veogana. Vikê ka Tamare ki aporo i pasina.

¹²I rârâ ma kaniana o Juta ki me. Matena ki hato na hagahunu bungi, o Juta ma na tamana o Gira ni Atulama ngairerua karu râ i Timina, na agua ga tapurura igê na sipi iana.

¹³Ta na enoni ki hagarongoa ka Tamare, vi o hungâna ki râ i Timina ki tapurura igê na sipi iana.

¹⁴Vikê ka Tamare ki nakagi râ na gahu ni nâ iana, ma ki buhia na maana renia na gahu vavararaga, ma ki oga so igê na matangana na tara tanga i Enaimi na hinua i gupuna na tara tanga i Timina. Ngaia ki bani girara bâkoro, vi o Sela o karena o Juta ki bani raha, henaka ngaira ka pe atengenia tanga o Sela.

¹⁵Matena o Juta ki bâsia ka Tamare, ngaia ki takusia ma vi na êrâ, suria i buhia na maana.

¹⁶Ngaia ki râ i pasina i na akerena na tara ma ki vi tanga, ki vi: “Hoi, gi hita na memu?” Ngaia ki pe girara, vi ngaia kani ka hungâna. Ngaia ki arami, ki vi: “Na ta ko obania vigo vateê?”

¹⁷Ngaia ki arami, ki vi: “Inê kê page hagatorangenia tangago na bêhâgana na goti tenia na totoha iaku.” Ma ngaia ki vi: “I koro ma manga vi igo ma ko vateê i ngekê na marâ gê page nahunia baruna na goti, manga vi igo ma ko pe hagamonaria na tamasinga iamu.”

¹⁸Ngaia ki hagate, ki vi: “Na marâ ta ki araria vigê vatego i ngekê?” Ngaia ki arami, ki vi: “Na marâ na giraramu henia na varo go kuha igê ma na vato iamu.” Ngaia ki vatea. Ma ngairerua karu rongo era, ma ka Tamare ki obara.

¹⁹Ngaia ki aporo i pasina, ki tavoa râ na gahu tenia na maana ma ki tuguni aporo renigi na gahu ni nâ iana.

²⁰O Juta ki hagatorangenia o Gira na tamana, hanana vi torea na goti tanga na gete, ma ki toregi aporo me na marâ na baruna na goti. Ma o Gira ki pe tarahua rârâ.

²¹Ngaia ki hagatera tani na mane i Enaimi, ki vi: “I he nga na êrâ, i gâga i na akerena na tara?” Ngaira ka arami, ka vi: “I mareha rârâ vi tani na êrâ ikê!”

²²Vikê o Gira ki aporo i pasina o Juta ma ki vi: “Inê ki bara vi ve tarahua. Na mane i ngekana ka vi, vi mareha rârâ vi tani na êrâ i ngekana.”

²³O Juta ki vi: “Naka vê ke nahunigi na marâ ngegana. Igia ka pe obania, vi na enoni ke rurusigerua. I koro ma. Inê kê uhungia vigê vuria, ma igo ko gari makira renia.”

²⁴I murina na ararina na hageha gi oru, ta na enoni ki hagarongoa o Juta, ki vi: “Ka hungâmu ka Tamare ki kato manga na êrâ ma i ngekê ngaia ki obara. O Juta ki vi: “Torea hura tenia na hinua! Sungia ki meme!”

²⁵Matena ga torea hura tenia na hinua, ngaia ki kasi tamasinga tanga o hungâna, ki vi: “Na avanuni na vato ma na marâ na girarana igê kani hagaobarê. Râ me ku bâsigi, ti ka na avanuni.”

²⁶O Juta ki bâgiraragi, ma ki vi: “Ngaia ki vi monari. Inê kanigê aharê, suria gê pe vatea na marâ, i tuguhiê, vigê vatea. I tuguhiê hete, vigê atengenia tanga o kareku o Sela.” O Juta ki hato vige rongo era nikâ henia.

²⁷Matena ka Tamare ki riki na gerina, ngaia ki tarahua, vi page apararerua na kare papa.

²⁸Matena i harahara, ta na hitangiterua ki hura me i nago na rimana. Na gete i hagaapara, ngaia ki tê i rimana ma ki surua igê na varo memera, ma ki vi: “Na ani ikê ki vora me hagenago.”

²⁹Ma na kare ki rurunia aporo na rimana, ma na tamana ki kahu vora me hagenago ngaia. Vikê na gete i hagaapara ki vi: “Ngaia ngekana gu hari ku hura!” Tahema ga hêtana vi o Peresi i vivi ‘Harihura.’

³⁰Ma hemuri na tamana ki kahu vora me nogana henia na varo memera i rimana. Tahema ga hêtana vi o Seraga i vivi ‘Memera.’