Read Kahua HAGONEGAHANI 39 Bible Online

HAGONEGAHANI 39 - Kahua bible

HAGONEGAHANI 39

¹Hoi, na Isimaelita ka bani torea o Josepo tanga i Esipito ma ka bani hagavuringenia tanga o Potipare, na hitangita na mane ni hagaotonga iana na maneraha i Esipito. Ngaia ki araha tangara na mane ni me, ga anumasia na ruma raha iana na maneraha.

²Na Araha God ki ngahisia o Josepo ma ki katogi ka tavoraha bâkoro na tagaraha iana. O Josepo ki oga i ruma iana Potipare ni Esipito, i araha tanga.

³O Potipare ki girara, vi na Araha ki ngahisia o Josepo ma ki katogi ka tavoraha bâkoro na tagaraha hato iana.

⁴O Potipare ki obakoro renia o Josepo ma ki naka ki tagara tanga ngaia marena o Potipare. Ngaia ki kasia ki bâsuria na ruma henigi na ara ni nahuninga hato iana.

⁵Haganega tenia i ngekana suria ma o Josepo, tahema na Araha ki koro tanga na ruma iana na mane ni Esipito i ngekana, ma ki katogi na ara ni marâ i ruma iana ma i mu iana ka tavoraha bâkoro.

⁶O Potipare ki nakagi vê na ara ni marâ hato iana tanga o Josepo ki bâsurigi, mareha vi ngaia marena nikâ, nga noga ma na ngauha. O Josepo ki raha tongatongani ma ki vora re na tohona na mane.

⁷I pe arihu râ ma kaniana o Potipare ki tenia o Josepo ma ki vi tanga, ki vi: “Gu meêrongo era.”

⁸O Josepo ki usi ma ki vi tanga, ki vi: “Bâ, na araha iaku ki hato, vige bâsurigi nikâ na ara ni marâ i ruma iana, suria inê kê oga ikê. Ngaia ki kasiê, kê onosurigi na ara ni nahuninga hato iana.

⁹I ruma ikê inê kê nahunia na ramoha manga ngaia. Ngaia ki nakagi na ara ni marâ hato i ruguhaku, nga noga ma igo, suria igo kaniana. I bara ngavê tangê, vi ve katoa na tarana go visia, suria God ki manimania.”

¹⁰Naka ma ngaia ki ama ni uhungia nga i na ara ni tangiani, ma o Josepo ki ama ni usisi nga vige memêru.

¹¹Hoi, i ta na tangiana, matena o Josepo ki banu getea i ruma, hanana vi katogi na tagaraha iana, ma i ngekana ki mareha rârâ nikâ igê ta na hitangita na enoni tagara,

¹²kaniana o Potipare ki rangu igê na tuguni iana o Josepo ma ki vi: “Gu meêtâ!” Ma o Josepo ki tarasia vê na tuguni iana tanga na gete ma ki gava ki hura i metara.

¹³Matena na gete ki bâsia i pania na tuguni, matena i gava ki hura,

¹⁴ngaia ki unira me na enoni tagara iana ma ki vi tangara, ki vi: “Bâ ikê! Na mane na Hebereo, o vaniaku ki unia me ki tagara i ruma ikê, kani uhungia vi erasigamirua. Ngaia kani banu me igê na kiboru iaku ma ki uhungia vi tuguriê, hanana vigamuru rongo era. Ma inê kê ngere raha ngavê.

¹⁵Matena i rongoê gê ngere, ngaia ki gava ki hura i metera ma ki pania so na tuguni iana i pasiku.”

¹⁶Na gete ki naka na tuguni ki oga mataro me na matena i aporo me igê na araha iana o Josepo.

¹⁷Ma hemuri ngaia ki hagarongoa renia na tarana ngekana, ki tamasi manga i bani hagarongora na enoni tagara, ki vi: “Na mane na Hebereo go unia me ki tagara i ruma ikê, ngaia kani banu me igê na kiboru iaku ma ki uhungia, vi tuguriê, hanana vigamuru rongoa era.

¹⁸Ma na matena gê ngere raha, ngaia ki gava ki hura i metara ma ki pania so na tuguni iana i pasiku.”

¹⁹O Potipare na araha iana o Josepo ki mangariaga ngavê.

²⁰Ngaia ki haribona ka rakua o Josepo ma ka kasia igê na ruma ni hagaitangiha. I ngekana ka oga igê na mane, na maneraha i Esipito ki bani kasira igê. Mo Josepo ki oga i ngekana.

²¹Ma na Araha ki ngahisia o Josepo ma ki tamania, hanana i hagakoro obana na mane i bâsuria na ruma ni hagaitangiha.

²²Na mane ngekê ki nakara na mane hato getera i ruma ni hagaitangiha i ruguhana o Josepo, ma o Josepo ki raha tangagi na ara ni marâ i ruma ni hagaitangiha.

²³Na mane i bâsuria na ruma ni hagaitangiha ki nakagi vê na ara ni marâ hato tanga o Josepo ki onosurigi, mareha vi ngaia marena nikâ. Suria na Araha ki ngahisia o Josepo, tahema na ara ni marâ i katogi ka tavoraha bâkoro.