Read Kahua HAGONEGAHANI 40 Bible Online

HAGONEGAHANI 40 - Kahua bible

HAGONEGAHANI 40

¹Ta na matena i muri na mane i bâsurira na enoni ni karakara vaini ni tonoha ma na mane i bâsurira na enoni ni hahinga ni bereti, ngairerua karu hagaera obana na maneraha i Esipito.

²Ngaia ki mangariaga tangarerua na kariana ngegê.

³Ngaia ki kasirerua i ruma ni hagaitangiha, o Josepo ki bani oga igê. Na ruma ni hagaitangiha ngekê kini ta apanena na ruma ga oga igê na mane ni me henia na araha iata, ga anumasia na maneraha i Esipito.

⁴Ngairerua karu oga arihu era i ruma ni hagaitangiha. Na araha iata na mane ni anumasiha ki atea o Josepo ki marupererua.

⁵Matena na mane i bâsurira na enoni ni karakara vaini ni tonoha ma na mane i bâsurira na enoni ni hahinga ni berete karu oga i ruma ni hagaitangiha, i ta na bungiana ngairerua karu marute. Na maruteha iaterua karu tora hegitigi ma karu râ hegitigi na girarani.

⁶Ki tangi me ma o Josepo ki râ me i pasiterua. Ngaia ki bâsirerua, garu ape ruruhi.

⁷Ngaia ki hagatererua, ki vi: Tanu hega kanimuru bâ ruruhi i ngekê?”

⁸Ngairerua karu arami, karu vi: “Na ara ni hitangimirua ki marute. Ma ikê ki mareha rârâ igê ta enoni, hanana vige ramatenigi tangagamirua na girarani.” O Josepo ki vi: “God nga kani hagagirara na enoni renigi na girarani na maruteha. Muru visigi me na maruteha iamurua.”

⁹Vikê na mane i bâsuria na karaha ni vaini, ki vi: “Inê kê marute, vi i maaku inê kê rigia na apinige ni vaini.

¹⁰Ngaia ki vora na arana gi oru. Ki parama ma ki bâgo, ki taka ma ki mata na guani.

¹¹Inê kê têa na kâkâ iana na maneraha. Inê kê têgi na guani na vaini ma kê rusigi so igê, ma kê tagarenia na kâkâ tanga na maneraha.”

¹²O Josepo ki vi: “Na girarana ki manga ikê. Na arani gi oru ki vi, vi na tangiani gi oru.

¹³I murini na tangiani gi oru na maneraha ki page kasigo hura tenia na ruma ni hagaitangiha ma ki page bonotenigi na bagatauhamu, ma ki page nakago aporo igê na tagaraha iamu. Igo ko page tagarenia aporo nikâ na kâkâ tanga manga i nago, matena go vora na mane ni karakara vaini iana.

¹⁴Hoi, go takusiê aporo, matena ga tavoraha maninga na ara ni marâ tangago. Go metamasi na maneraha reniê, ku tamaniê, hanana ve hura tenia na ruma ni hagaitangiha ikê.

¹⁵Bâ, i nago ka rauê tenia na agua iata na Hebereo ma ikê nikâ i Esipito inê kê oga igê na ruma ni hagaitangiha menê kê pe erasia rârâ ta na marâ.”

¹⁶Matena na mane i bâsuria na hahinga ni bereti ki bâsia, vi na girarana na maruteha ki hagakoro obana na mane ni karakara vaini, ngaia ki vi tanga o Josepo, ki vi: “Inê kê marute, vi inê kê toregi i bêku na heni gi oru na bereti.

¹⁷Na ani i kerekê matakere ki vunu renigi na bereti ma na ani mavê na marâ vigana, ga hahigi tanga na maneraha. Ma na manu ka gaha me ka ngêgi.”

¹⁸O Josepo ki arami, ki vi: “Na girarana ki manga ikê. Na heni gi oru ki vi na tangiani gi oru.

¹⁹I murini na tangiani gi oru na maneraha ki page kasigo hura tenia na ruma ni hagaitangiha ma ki page kasigo akê. Ga page kuharenigo igê na apinige, na bêmu i avoramu. Na manu ka page hasihasigi na ahasigomu.”

²⁰I murini na tangiani gi oru na maneraha ki magoto tangara na kariana, suria ngaia ki na tangiana iana i vora igê. Ngaia ki kasirerua hura na mane ni karakara vaini ma na mane ni hahinga ni bereti tenia na ruma ni hagaitangiha, ma ki kasirerua akê.

²¹Ngaia ki naka aporo na mane ni karakara vaini igê na bani tagaraha iana,

²²ma ki nahuia ki kuharenia na mane ni hahinga ni bereti. Na ara ni marâ ka tagenani ma manga i bani visigi o Josepo.

²³Ma na mane ni karakara vaini ki asa vige takusia o Josepo. Ngaia ki bonotenia ngavê.