Read Kahua HAGONEGAHANI 41 Bible Online

HAGONEGAHANI 41 - Kahua bible

HAGONEGAHANI 41

¹Matena o Josepo ki hato huria na harisi gi rua i ruma ni hagaitangiha, na maneraha i Esipito ki marute. Ngaia ki marute, vi ura i na akerena na ve i Nile.

²Ngaia ki bâsira na puruka hehene gi pi, ga hura akê me tenia na ve. Ngaira ka binibinikaga ma ka bâkoro ngavê, ma ka haganega ka ngêngê na go.

³Ma hemuri ka hura akê me nikâ na puruka hehene gi pi. Ngaira ka rataga ma ki bera na apeta. Ngaira ka râ ura henira na ani ga bani akê me, ma ka ura i na akerena na ve.

⁴Na ani ga rataga ka ngêra ka unumira na ani ga binibinikaga. Ma na maneraha ki rite.

⁵Na matena i mêru so aporo, ngaia ki marute nikâ. Ngaia ki marute, vi rigia na apena gi tage na koni i hungu renigi na guani gi pi, ga agêguruga ma ka mata.

⁶Ma hemuri ka hungu me nikâ na guani gi pi, ga pe agêguruga, ma ka garoro renia na roga mahana i râ me tenia na bagabena raha.

⁷Na ani ga garoro ka ngê unumigi na ani i agêguruga. Ma na maneraha ki rite ma ki girara, vi ngaia ki marute.

⁸I tangi me, ma ngaia ki anumanuma. Vikê ngaia ki unira me na ara ni mane hato ni girarasiha ma na mane ni takoha mataha. Ngaia ki hagarongora renigi na maruteha iana, ma ki mareha rârâ ta na hitangita ge girara, vige ramatenigi na girarani tanga.

⁹Hoi, ma na mane ni karakara vaini ki vi tanga na maneraha, ki vi: “I ngekê inê kê tangahuriê, suria gê pe bani hagarongogo renia ta na marâ.

¹⁰I nago, matena go mangariaga tangagamirua na mane ni hahinga ni bereti menê, igo ki kasigamirua i ruma ni hagaitangiha i pasina na araha iata na mane ni me ga anumasigo.

¹¹I ta na bungiana na ara ni hitangimirua ki marute. Na girarani ka tora hegitigi.

¹²Na Hebereo na mane na gapu haoru ki oga i ngekana henigamiru. Ngaia ki na kare vurivuri iana na araha iata na mane ni me ni anumasiha. Igamirua kamuru hagarongoa renigi na maruteha iamirua, ma ngaia ki ramatenigi na girarani tangagamirua hegetigi.

¹³Na girarani i visigi ka vora me mave. Igo ko nakê aporo igê na bani tagaraha iaku, ma ko nahuia ko kuharenia na mane ni hahinga ni bereti.”

¹⁴Na maneraha ki unia me o Josepo. Ga torea hura me ototo râ tenia na ruma ni hagaitangiha. Ngaia ki hegoro ma ki hagesuru bâkoro, ma ki râ i pasina na maneraha.

¹⁵Na maneraha ki vi tanga, ki vi: “Inê kê marute, ma ki mareha rârâ ta na enoni ge girara, vige ramatenigi me na girarani. Inê kê rongoa, vi igo ko girara, go ramatenigi.”

¹⁶O Josepo ki arami, ki vi: “Maneraha, inê ki mareha. God ma kani girara ma ki page visigi vê na girarani, ga page hagakoro obamu.”

¹⁷Na maneraha ki vi: “Inê kê marute, vi gê ura i na akerena na ve i Nile.

¹⁸Inê kê bâsira igê na puruka hehene gi pi, ga hurakê me tenia na ve. Ngaira ka binibinikage ma ka bâkoro ngavê, ma ka haganega ka ngêngê na go.

¹⁹Ma hemuri ka hurakê me nikâ na puruka hehene gi pi. Ngaira ka rataga ma ki bera na apeta. I Esipito hagenani inê kê pe bâsira rârâ igê vi na puruka ge rataga ma ke bera vigana.

²⁰Na puruka ga rataga ka ngê unumira na ani ga binibinikaga.

²¹Henaka, i manga ngekana, ma ki asa vige bâsigi i apeta. Ngaira ka ama ni rataga nga ma ka ama ni bera nga, manga i nago. Ma inê kê rite.

²²Inê kê marute nikâ, vigê rigia na apena gi tage na koni, i hungu na guani gi pi ga agêguruga ma ka mata.

²³Ma hemuri ka hungu me nikâ na guani gi pi, ga pe agêguruga ma ka garoro renia na roga mahana i râ me tenia na bagabena raha.

²⁴Na ani ga garoro ka ngê unumigi na ani ga agêguruga. Inê kê visigi na maruteha iaku tangara na mane ni girarasiha, ma ki mareha rârâ ta na hitangita, vige ramatenigi me na girarani.”

²⁵O Josepo ki vi tanga na maneraha, ki vi: “Na giraraterua na maruteha ki tagenani ma. God ki hagarongogo renigi na tarani i page katogi.

²⁶Na puruka binibinikage gi pi ki vi, vi na harisi gi pi. Na guani gi pi na ani ga agêguruga ki vi, vi na harisi gi pi me nikâ. Na girarani ki tagetora ma.

²⁷Na puruka gi pi ga rataga ma ka hurakê me hemuri ma na guani gi pi na koni ga pe agêguruga ma ka garoro renia na roga mahana, ki vi, vi na harisi gi pi ni magêha.

²⁸Oi, inê kê bani visia tangago: God ki hagagirarago renia na katoha iana.

²⁹Surigi na harisi gi pi na ngêra ka page aharêsia ngavê i Esipito hagenani.

³⁰I murina ngekana ka page arâ me na harisi gi pi ni magêha raha. Na enoni ka page bonotenigi na harisi, ga aharêsira igê na ngauha, suria na magêha raha ki page nahuia ngavê i Esipito hagenani.

³¹Na enoni ka page hitenia ngavê na matena i aharêsira igê na ngauha, suria na magêha i page arâ me i muri ki page erataga ngavê.

³²Na maruteha hagerua iamu ki vi, vi God ki asa vige urusia na katoha iana. Ngaia ki sugia ma vige hagamonaria na katoha iana.

³³Hoi, go atea ta na enoni i tako mataha ma ki hagakitagi maninga na marâ ma ko naka ki ononosuria na agua iamu hagenani.

³⁴Go atera nga nikâ na kariana, ma ko bêbagi râ nanê na pita na apanini na ngauha surigi na harisi gi pi, ga rakorako igê na ngauha.

³⁵Go bonasira nga na enoni, igo bani atera ngegana, hanana ga bêbagi râ nanê na pita na apanini na ngauha hato ngegana surigi na harisi ni ngauha, ga sugi arâ me. Go haganahunira nga renia na ramoha, hanana ga tavotavo na ngêra tenira na enoni ma ka nakanaka igê na ruma ni ngêra surigi na hinua ma ka anumasigi.

³⁶Na ngêra ngegana ka gâga tanga na enoni nanêgi na harisi gi pi ni magêha, ga page tarahua i Esipito. Igê na tarana ngekana na enoni ki asa vige page mesi magêha.”

³⁷Na maneraha ma na mane ni hagaotonga iana ka aganaria na katoha ngekê.

³⁸Na maneraha ki vi tangara, ki vi: “I bara tangagia vige tarahua na mane ge koro manga o Josepo, suria God ki mavesia na aitangihana.”

³⁹Na maneraha ki vi tanga o Josepo, ki vi: “Suria God ki hagagirarago renigi na marâ hato ngegê, tahema ki mave, vi igo ko tako mataha ma ko hagakitagi maninga na marâ teharira na enoni hato getera.

⁴⁰Inê be kasigo ku onosuria na agua gê marungia ma na kariaku hato ka page têtê viteamu. Igo ka na ruata me tangê go nahunia na ramoha i ruguhaku.

⁴¹Hoi, i ngekê inê kê kasigo ko onosuria i Esipito haganani.”

⁴²Na maneraha ki tarasia râ na ringi i kakêna ma ki tarasia i kakêna o Josepo. Na ringi ngekê ki segea igê na girarana na maneraha. Ngaia ki aruha renia na gahu siki ma ki hagahaga renia na seni na golo.

⁴³Ngaia ki katoa ki tagiria na ruata na ani koro ngavê na kati iana, ma na mane ni anumasiha iana ka nanago tarana ma ka ngerengere ka vivi: “Gava tarana! Gava tarana!” Igê na tarana ngekana o Josepo ki vora re na mane i onosuria i Esipito hagenani.

⁴⁴Na maneraha ki vi tanga, ki vi: “Inê nga ka na maneraha, ma na ara ni marâ ga katogi na ai ni Esipito ki tuguhira vi ga hagarongogo hagenago.”

⁴⁵Ngaia ki hêtana o Josepo renia na ata i Esipito, i vi Sapenata Paneaga, ma ki atengenia ka Asenata tanga. Ngaia kini ka karena o Potipera na mane ni hagarahenga i hinua i Heliopolisi. O Josepo ki tonga na tangahuru gi oru na harisi iana, matena i haganega ki tagara tanga na maneraha i Esipito. Ngaia ki pania na ruma iana na maneraha ma ki râhia i Esipito hagenani.

⁴⁶

⁴⁷Surigi na harisi gi pi ni ngauha na mu ka ganora ngavê.

⁴⁸O Josepo ki tavo râ na pita na apanini na ngauha ma ki nakagi i ruma ni ngauha surigi na hinua. Ngaia ki bêbagi nanê na ngauha igê na ara ni hinua, na ngauha tenigi na mu hagarangigi hegitigi.

⁴⁹Na koni ki rako teha ngavê mangagi na one i one. Tahema o Josepo i bara tanga vige hagararingenigi.

⁵⁰I nago tarani na harisi ni magêha o Josepo ma ka Asenata karu aparerua na kare mane gi rua.

⁵¹O Josepo ki vi: “God ki katoê, kê pe takusigi na mamasiaganiha hato iaku ma na ruma iana o vaemaku.” Tahema ngaia ki hêtana o karena hagenago vi o Manase i vi ‘Hagahite.’

⁵²Ma ngaia ki vi nikâ: “God ki haganahuniê renirerua na kare igê na agua ni mamasiaganiha iaku.” Tahema ngaia ki hêtana na ruata o karena vi o Eparaimi i vi ‘Votokare.’

⁵³Matena ga bani hato na harisi gi pi ni ngauha i Esipito,

⁵⁴ka haganega na harisi gi pi ni magêha, manga i bani visia o Josepo. Na magêha ki tarahugi na agua getigi nikâ, ma ki nga noga ma i Esipito ki oga igê na ngauha.

⁵⁵Matena na ai ni Esipito ka hatamia na magêha, ngaira ka hagagege tanga na maneraha. Vikê ngaia ki bonasira ka râ i pasina o Josepo ma ka arâ surigi na marâ i visigi.

⁵⁶Na magêha ki ama ni akê raha nga me ma ki tarahua i Esipito hagenani. Tahema o Josepo ki tangahigi na ara ni ruma ni ngauha hato ma ki hagavuri na koni tangara na ai ni Esipito.

⁵⁷Na enoni i maveta hagenani ka arâ i Esipito ka vurivuri na koni tenia o Josepo, suria na magêha ki ramo suria na maveta hagenani.