Read Kahua HAGONEGAHANI 43 Bible Online

HAGONEGAHANI 43 - Kahua bible

HAGONEGAHANI 43

¹Na magêha i Kanani ki tê era ngavê.

²Matena na ahemata iana o Jakobo ka ngêgi hato na ara ni koni, ga bani vurigi i Esipito, o Jakobo ki vi tangara o karena, ki vi: “Mu râ nikâ kamu vuri me tani na ngauha tangagia.”

³O Juta ki vi tanga, ki vi: “Na mane mi arâ i pasina ngekana ki ramonigami, vi manga mi pe merâ o vesimami tanga, ngaia ki page usi vige bâsigami.

⁴Manga go agana ko hagamarumungenia o vesimami ki takugami, hoi, mi girara mi arâ kami vurivuri ngêra tangago.

⁵Manga go pe hagamarumungenia, igami ki asa mi râ, suria na mane mi arâ i pasina ngekana ki vi tangagami, vi ngaia ki usi vige bâsigami, manga vi o vesimami ma ki pe takugami.”

⁶O Jakobo ki vi: “Tanu hega mu hagamamasiagê? Hega mu hagarongoa o vani akana, vi igamu ki tonga tani o vesimi?”

⁷Ngaira ka aramia, ka vi: “Suria ngaia ki ama ni hagategami nga renigami ma renia na ahemata iaka, ki vi, ‘O Vaemami ki mauri menga? Igamu ki tonga tani nikâ o vesimi?’ Tahema mi aramigi na hagatenga iana. Igami kami pe bani girara, vi ngaia ki page bonasigami, hanana vigami merâ o vesimami tanga!”

⁸O Juta ki vi tanga o vaemana ki vi: “Gu hagamarumungenia o vesimami be merâ, ma kami tavoraha nga vikê, hanana siana na hitangika ki mesi magêha.

⁹Manga gê pe meaporo me, hoi, go hagamesiê, suria inê kanigê bâsuria. Manga vi inê ma kê pe meaporo me asitatara, hoi, na perenga iaku inê.

¹⁰Manga vi igia ma siana ke hagarihu, vikê igami kami bani rugu hagerua râ i ngekana nge.”

¹¹O vaemata ki vi tangara, ki vi: “Manga i manga ngekana, hoi, mu tuguni i na anga iami na ani koro ngavê na ngêra tenia na mu iaku mu migirâ, ma kamu migirâ hanana mu mahatangenigi tanga: tani na aeni na apinige, tani na pirui, tani na marâ i katogi na ngauha ki ngê koro, tani na angeri ma na hara.

¹²Mu migirâ na haga henigi na haga mu tarahugi igê na maani na anga iami, suria igamu kamu vatea aporo. Suria vari ngaira ka tuguni tasi renigi.

¹³Mu merâ nga o vesimi ma kamu aporo nga me.

¹⁴God raramohaga hunia ke katoa o vani akana ke takuigamu, hanana ge vategamu aporo o Benamino ma na ani i oga vê i ngekana. Tangê inê, manga vi inê ma kê magari nga renira na kareku, hoi, ma vi na ta be visia?”

¹⁵Vikê o vahegoata ka migirâ na mahatanga ma na haga henigi na haga ga tarahugi igê na anga iata ma ka metavoraha o Benamino tanga i Esipito. I ngekana ngaira ka râ i pasina o Josepo.

¹⁶Matena o Josepo ki bâsia o Benamino henira, ngaia ki vi tanga na kariana, i onosuria na ruma iana, ki vi “Gu merarâ na mane igê i ruma iaku. Ngaira ka page ngêngê heniê igê na ritovagana. Tahema gu nahuia na ganiana ma ku hagarêa tangagami.”

¹⁷Na mane tagara ki râ surigi na marâ i visigi ma ki merarâ o vahegoata ngegana tanga na ruma iana o Josepo.

¹⁸Matena ga arâ vê tanga na ruma, ngaira ka magu ma ka tako ka vi: “Ga toregia me ikê surigi vari na haga ga tuguni aporo igê na anga iaka, matena igia ka taha mora me ikê. Vari ngaira ka hagakakangi ka ranguigia, ka torera panigia na tonki iaka ma ka katogia ka voravora re na kare rakuraku iana.”

¹⁹Vikê i metara i maani ruma, ngaira ka vi tanga na mane tagara, i onosuria na ruma, ka vi:

²⁰“Bamane, hoi, gu naka kami tamasi vikê. Hagetage i nago igami kami râ me ikê, kami vuri ngauha.

²¹Matena mi aporo i pasimami, igami kami mêru i tara ma kami tangahigi na anga iamami. Na ara ni hitangimami ki tarahugi na haga iana igê na maana na anga iana, ga tonga koro manga bani hanani. Igami kami migiaporo me.

²²Igami kami tora tani nikâ na haga, hanana vigami vurivuri ngêra nikâ renigi. Igami pe girara, vi o ti kani tugunigi na haga i na anga iamami.”

²³Na mane tagara ki vi: “Siana kamu tako bâraha. Siana kamu magu. Na God iami, na God iana o vaemami, ngaia vari kani tugunigi tangagamu na haga igê na anga iami. Inê kê bani têgi na haga mu vuri re.” Ma hemuri ngaia ki tagarenia râ o Simeone tangara.

²⁴Na mane tagara ki merabanu o vahegoata i ruma. Ngaia ki vatera na ve, hanana ga tanani uga igê, ma ki hagangêra na tonki iata.

²⁵Ngaira ka nanê renigi na mahatanga iata, hanana viga mahatangenigi tanga o Josepo, matena i ataata me igê na ritovagana, suria ga bani vi tangara, vi ngaira ka ngêngê henia.

²⁶Matena i ata me o Josepo, ngaira ka migibanu na mahatanga tanga ma ka tubê so i ano tanga.

²⁷Ngaia ki hagatera, vi ga mêri koro ma, ma ki vi: “Igamu kamu hagarongoê renia o vaemami, i merahaga. Ngaia ki hega? I tahitahi mênga? Ma ki mêri koro ma?”

²⁸Ngaira ka arami, ka vi: “O vaemami ki hagahigasigo ngavê. Ngaia ki tahitahi mênga ma ki mêri koro ma.” Ngaira ka susure ma ka tube so nikâ tanga.

²⁹Matena o Josepo ki bâsia o Benamino o vesina, ngaia ki vi: “Hoi, o vesimi hagemuri mu bani hagarongoê renia kani ikê. God ke korokoro tangago o kareku.”

³⁰Mo Josepo ki râ nga, suria i nahuia na hetakiha renia o vesina i mevora. Ngaia ki haga ni angi. Tahema ngaia ki banu igê na kiboru iana ma ki angi purunguni vê igê.

³¹Matena i manuhigi hato na maana, ngaia ki hura. Ngaia ki hagagatagata ma, ma ki vi: “Tora me na ngêra.”

³²O Josepo ki ngê getea igê na bea ni ngêra. O goana ka ngê igê na ani getea râ na bea ni ngêra. Na ai ni Esipito, ga unira me, ka ngê nogata igê na ani getea râ nikâ na bea ni ngêra, suria ngaira ka ruhira na Hebereo. Tahema ngaira ka usi vige ngê henira.

³³O vahegoata ka ngê igê na bea ni ngêra, ga maatia o Josepo. Ngaira ka oga harahara manga hanana ga vora, haganega igê na bêbê ni kare tanga na ani i muri tatare. Matena ga rigia na tarana ngekê, ngaira ka kone ma ka hesirasire.

³⁴Na ngêra iata ka tora tenia na bea ni ngêra iana o Josepo. Na ngêra ga voto tanga o Benamino ki upuga akê hagerima taharira o veogana. Hoi, ngaira ka ngê ma ka tono henia o Josepo mataro ki ruguhira ngaira. Ma o Josepo ki mareha.