Read Kahua HAGONEGAHANI 45 Bible Online

HAGONEGAHANI 45 - Kahua bible

HAGONEGAHANI 45

¹O Josepo ki bara tanga vige hagagatagata i maata na kariana. Tahema ngaia ki bonasira ka hura tenia na kiboru. Ngaira getera ma o vahegoata kaniga oga, matena o Josepo ki hagagirarara renia marena.

²Ngaia ki angi raha matomatoania. Vikê na ai ni Esipito ka rongoa ma na rongoha ki tarahua na maneraha i Esipito, i oga i ruma raha iana.

³O Josepo ki vi tangara o goanna, ki vi: “O Josepo kani inê. I hega, o vaemaku ki tahitahi mênga?” Ma na matena o goana ka rongo vikana, ngaira ka magu ngavê ma ka muni raha.

⁴Ma o Josepo ki vi tangara, ki vi: “Mu guru me hagarangi.” Ma ngaira ka guru râ. O Josepo ki vi tangara, ki vi: “Inê ka no goami o Josepo. Igamu kamu bani hagavuringeniê me i Esipito.

⁵Hoi, siana kamu takotako bâraha. Siana kamu hagahunigamu maremi, suria vigamu hagavuringeniê me ikê. God hete kani hagatorangeniê me tarami ikê, hanana gê hagatahira na enoni tenigi na mera.

⁶I ngekê ki na ruata ma na harisi ni magêha igê na maveta. Na harisi gi rima ni magêha ka mamêngagi me, ma ki asa vige hasihasi se vige apâpa nikâ.

⁷God ki hagatorangeniê hagenago me tarami, hanana gê hagatahigamu, ma hanana siana igamu ma na raraha iami kamu meme. Na katoha iana God ngekê ki hagakonegia ngavê.

⁸Tahema i mareha, vi igamu kanimu hagatorangeniê me ikê, ma God hete. Ngaia ma God kani kasiê kê vora na ruata râ tanga na maneraha. Inê kê onosuria i Esipito hagenani.

⁹Hoita, mu aporo rêrê i pasina vaemaku ma kamu hagarongoa renia na tamasinga iaku tanga. Inê o Josepo o karena kê vi vikê: God ki kasiê kê marungia i Esipito hagenani. Go arâ me i pasiku. Siana ko hagarihu.

¹⁰Igo ko girara go gâga i na apanena i Gesene: igo, na karemu, na esimu, na sipi iamu, na goti iamu, na puruka iamu ma na ani mavê na marâ hato getigi go nahunigi. I ngekana igo ko gâga hagarangiê igê.

¹¹Manga go gâga i Gesene, inê kê girara ge marupego. Na harisi gi rima ni magêha ka mamêngagi me. Inê kê pe obania, vi igo, na ahetama iamu ma na togoha iamu, vigamu mesi magêha.”

¹²O Josepo ki vi tangara o goana, ki vi: “Hoi, igamu hato ma igo nikâ o Benamino, igamu kamu girara maninga, vi inê ka no Josepo monari.

¹³Mu hagarongoa o vaemaku, vi inê kê raramohaga teha ikê i Esipito, ma kamu hagarongoa renigi na ara ni marâ mu bâsigi. Ma hemuri kamu hata ni meaporo me ikê.”

¹⁴Ngaia ki ruia o Benamino o vesina ma ki haganega ki angi. O Benamino ki angi nogana, suria o veogana ki ruia.

¹⁵Ma hemuri matena i angiangi mênga, ngaia ki ruira tatage o veogana ma ki siginira. I murina vikana o goana ka kahu metamasi.

¹⁶Matena na maneraha i Esipito ma na mane ni hagaotonga iana ka rongoa, vi o goana o Josepo ka râ me, ngaira ka vagevage.

¹⁷Na maneraha ki vi tanga o Josepo, ki vi: “Gu vi tangara o goamu ke hagarutangigi na gerita na tonki iata ma ke aporo i Kanani.

¹⁸Vi tangara ka merarâ me o vaemata ma na ahemata iata tanga ikê. Inê kê page haganahunira renia na mako na ani i koro teha i Esipito, ma i ngekana na ngêra ki page aharêsira igê.

¹⁹Vi tangara nikâ ka tagirigi na kati tenia i Esipito tanga i pasita, hanana ga mera aporo me igê kaniata ma na kareta ma o vaemata.

²⁰Siana ka takotako renigi na nahuninga iata ga page panigi vê, suria ngaira ka page nahunia na mako, na ani i koro teha ngavê i Esipito.”

²¹O karena o Jakobo ka kato vikana. O Josepo ki vatera na kati na maneraha ki bani visigi, ma na suarita i tara.

²²Nikâ o Josepo ki tonganira renigi na gahu ni urisiha, ma tanga o Benamino ngaia ki vatea na tangarê gi oru na haga na siliva ma na gahu gi rima ni urisiha.

²³Tanga o vaemana ngaia ki hagatorangenira na tonki tangahuru gi tage ga hagarutangira renigi na marâ na ani ga koro teha i Esipito, ma na tonki tangahuru gi tage nikâ, ga hagarutangira renigi na koni, na bereti ma na ani getigi na ngêra na suari ni tara.

²⁴Ngaia ki kasira vê o goana ka râ, ma ki vi vikê tangara: “Siana kamu heariha i tara.”

²⁵Ngaira ka pania i Esipito ma ka aporo i pasina o Jakobo o vaemata i Kanani.

²⁶Ngaira ka hagarongoa, ka vi: “O Josepo ki tahitahi mênga. Ngaia ki marungia i Esipito hagenani!” O Jakobo ki unuia na agua gi tage suria i pe tongesurira.

²⁷Matena ga hagarongoa hato renigi na tamasinga iana o Josepo tangara ma na matena ngaia ki bâsigi hato na kati, i hagatorangenigi me o Josepo tenia i Esipito, ngaia ki kahu tako ki vi:

²⁸“E, o kareku o Josepo ki tahitahi mênga! Nga hanana gê obania ngekana! Be râ nga, be bâsia ma kê kahu meme.”