Read Kahua HAGONEGAHANI 46 Bible Online

HAGONEGAHANI 46 - Kahua bible

HAGONEGAHANI 46

¹O Jakobo ki hagarurugu na nahuninga hato iana ma ki tavoraha tanga i Bereseba. I ngekana ngaia ki vogasia igê God, o Isako o vaemana ki rahesia.

²Igê na bungiana God ki tamasi tanga igê na maruteha. Ngaia ki unia, ki vi: “Jakobo! Jakobo!” Ma o Jakobo ki arami, ki vi: “Oi, inê ikê.

³God ki vi: “Inê ki na God, o vaemamu i rahesiê. Siana ko magu ni râ i Esipito. Inê be hagarakonira na raraha iamu ke rako mangara na enoni i ngekana.

⁴Inê kê arâ henigo i Esipito ma kê page meraporo me na raraha iamu tanga na agua ikê. O Josepo ki page taugo, matena go meme.”

⁵O Jakobo ki râ nga tenia i Bereseba. O karena ka hagarutangira ngaia, na kareta ma kaniata igê na kati, na kati na maneraha i Esipito ki hagaguhigi tangara.

⁶Ngaira ka migirâ na togoha iata ma na nahuninga ga bani nahunigi me i Kanani ma ka tavoraha tanga i Esipito. O Jakobo ki merarâ na raraha hato iana:

⁷o karena, o vesina, ka karena ma kesina.

⁸Ngaira hato ga takua o Jakobo tage i Esipito, ngaira kani igê: o Rubeni na bêbê ni kare iana,

⁹ma ngaira o karena o Rubeni: o Ganoke, o Palu, o Geseroni ma o Karimi;

¹⁰O Simeone ma o karena: o Jemuele, o Jamini, o Ohata, o Jakini, o Sogare, ma o Saulo o karena na gete ni Kanani;

¹¹O Levi ma o karena: o Geresoni, o Kehata ma o Merari;

¹²O Juta ma o karena: o Sela, o Peresi ma o Seraga. O karena gi rua o Juta o Eri ma o Onani karu bani me i Kanani. O karena o Peresi ka no Geseroni ma o Gamulu.

¹³O Isakare mo karena: o Tola, o Puva, o Jobe ma Simirone;

¹⁴O Sebuluni ma o karena: o Sereti, o Eloni ma o Jagalele;

¹⁵O karena hato ngegana o Jakobo ma ka Lea karu aparara i Mesopotamia henia ka Tina ka kareterua. Na raraha hato iana ka Lea ka vora tangahuru gi oru matara oru.

¹⁶O Gata ma o karena: o Sipione, o Gagi, o Suni, o Eseboni, o Eri, o Arote ma o Areli;

¹⁷O Asere ma o karena: o Imina, o Isiva, o Beria ma ka Seraga kesita. O karena o Beria ka no Gebere ma o Malakiele.

¹⁸Na tangahuru matare ono ngegana ka na raraha iaterua o Jakobo ma ka Silipa, na gete na kare vurivuri o Labani ki vatea renia ka Lea ka karena

¹⁹O Jakobo ma ka Ragele karu aparerua na kare mane gi rua: o Josepo mo Benamino.

²⁰I Esipito o Josepo ma ka Aseneti karu aparerua igê na kare mane gi rua: o Manase ma o Eparaimi. Ka Aseneti kani ka karena o Potepera na mane ni vogasiha i hinua i Heliopolisi.

²¹O karena o Benamino ka no Bela, o Bekere, o Asabele, o Gera, o Naamane, o Egi, o Rosi, o Mupimi ma o Arata.

²²Na tangahuru matare he ngegana ka na raraha iaterua o Jakobo ma ka Ragele.

²³O Tane mo Gusimi o karena.

²⁴O Napatali mo karena: o Jagasele, o Guni, o Jesere ma o Sileme.

²⁵Na vere pi ngegana ka na raraha iaterua o Jakobo ma ka Biliha. Ka Biliha ki na gete na kare vurivuri o Labani ki vatea renia ka Ragele ka karena.

²⁶Ngaira hato na raraha iana o Jakobo ga râ tanga i Esipito ka na tangahuru ge ono matare ono. Ga pe tomanira banu me kaniata o karena.

²⁷I Esipito o Josepo ki apararerua o karena gi rua. Tahema ngaira hato haku na raraha iana o Jakobo ga râ i Esipito ka na tangahuru gi pi.

²⁸O Jakobo ki hagatorangenia o Juta ki nanago, ki vi tanga o Josepo, hanana vi arâ me vurusira i Gosene, matena ga ata vê o Jakobo ma na raraha iana i Gosene.

²⁹O Josepo ki tagiria na kati iana ma ki râ i ngekana, hanana i mehetarahu o vaemana. Matena garu hetarahu, o Josepo ki ruia o vaemana ma ki angi arihu era.

³⁰O Jakobo ki vi tanga o Josepo, ki vi: “Hoi, i ngekê inê kê bâsigo go tahitahi mênga. I arariê ma vigê meme.”

³¹Ma hemuri o Josepo ki vi tangara o goana ma na raraha getera iana o vaemana, ki vi: “Inê be râ nga ma be hagarongoa na maneraha i Esipito, vi na goaku ma na raraha getera hato iana o vaemaku, ga oga i Kanani, ngaira ka râ me.

³²Inê be hagarongoa, vi igamu ka na enoni ni sipi ma kamu bâsurira na togoha, ma kamu merarâ me na togoha ma na ara ni nahuninga hato getigi.

³³Manga vi na maneraha ma ki unigamu ki hagategamu renia na tagaraha iami,

³⁴mu hagarongoa nga, vi igamu kamu bâsurira na togoha igê na ogaha hagenani iami mangara na êvarimi. Vikana ngaia ki page nakagamu, kamu gâga i na apanena i Gosene.” O Josepo ki vi vikana suria na ai ni Esipito ka kitenira na ani ga bâsuri sipi.