Read Kahua HAGONEGAHANI 47 Bible Online

HAGONEGAHANI 47 - Kahua bible

HAGONEGAHANI 47

¹Vikê o Josepo ki merarâ o veogana gi rima tanga na maneraha i Esipito. Ngaia ki vi tanga na maneraha, ki vi: “O vaemaku ma o goaku ka râ me tenia i Kanani henira na togoha iata ma henigi na ara ni nahuninga hato iata. I ngekê ngaira ka oga i na apanena i Gosene.”

²Ma hemuri ngaia ki hagararingenira o veogana tanga na maneraha.

³Na maneraha ki hagatera, ki vi: “Na ta ka na tagaraha iami?” Ngaira ka arami, ka vi: “Maneraha, igami ka na ani ni sipi mangara na êvarimami.

⁴Igami kami râ me, hanana vigami gâga i na agua ikê, suria i pasimami i Kanani ki ramo era igê na magêha ma ki mareha na go tangara na togoha iamami. Gu hagamarumungenigami, kami oga i na apanena i Gosene.”

⁵Na maneraha ki vi tanga o Josepo, ki vi: “Suria o vaemamu ma na goamu ka ata me,

⁶i koro ma ka gâga i na agua mavê ga obania ikê i Esipito. Nakara vê ke oga i na apanena i Gosene, na mako koro teha ngavê. Manga i berarogata ma ka oga igê na mane ga manisi ni bâsuriana na togoha, go kasira ka bâbâsurira na togoha iaku.”

⁷Ma hemuri o Josepo ki merâ o Jakobo o vaemana ma ki hagagirara na maneraha renia. O Jakobo ki nungia God, hanana vi koro tanga na maneraha.

⁸Na maneraha ki hagatea, ki vi: “Gi hita na harisi iamu?”

⁹O Jakobo ki arami, ki vi: “Inê kê rârâ i maveta surigi noga na harisi 130. Na harisi ngegana ka pe rako ma na marâ gi tage na mamasiaganiha. Na harisi iaku ka pe rako mangagi na harisi iata na êvariku.”

¹⁰O Jakobo ki nungia nikâ God tanga na maneraha ma ki kahu râ.

¹¹Ma hemuri o Josepo ki katora o vaemana ma o goana ka oga i Esipito. Ngaia ki haganahunira renia na mako koro teha ngavê hagarangia na hinua i Ramesesi, manga i bani visia na maneraha.

¹²O Josepo ki bâsurira o vaemana ma o goana ma na raraha hato getera iana o vaemana henira na ara ni kare gari renigi na ngauha.

¹³Na magêha ki raha teha ngavê. Ki mareha ngavê vi na kere ngêra surigi na hinua. Na ai ni Esipito ma ni Kanani ka arutaveo ngavê renia na magêha.

¹⁴Matena na enoni ka vuri koni, o Josepo ki tavogi na haga hato na meni ma ki toregi râ tanga na ruma raha iana na maneraha.

¹⁵Matena i Esipito me Kanani ka vurivuri hato renigi na haga hato iata, na ai ni Esipito ka arâ i pasina o Josepo, ka vivi: “Vategami na ngauha, naka ma i marehasigami na haga. Gu botage renigami, i era ma kami me i maamu.”

¹⁶O Josepo ki arami, ki vi: “Mu merarâ me na togoha iami ma kamu hohoro renigi na ngauha, manga vi marehasigamu na haga.”

¹⁷Vikê ngaira ka merarâ me na togoha iata tanga o Josepo ma ngaia ki vatera na ngauha meta na hosi iata, na sipi iata, na puruka iata ma na tonki iata. Suria na harisi ngekana ngaia ki vatera igê na ngauha meni na ara ni togoha hato iata.

¹⁸I na harisi i muri me ngaira ka râ me nikâ i pasina o Josepo ma ka vi: “Araha, igami kami pe obania, vigami pinihia ta na marâ tenigo. I monari, igami ki marehasigami ngavê na haga, ma igo ko nahunira na togoha iamami. I mareha vige hita rârâ ta na marâ, hanana vigami vurivuri ngauha renigi tenigo, nga noga ma na apemami ma na mako iamami.

¹⁹Gu botage renigami, i era ma kami me. Siana ki banogo na mako iamami. Gu vurigami igami ma na mako iamami renigi na ngauha. Igami ki koro ma vigami voravora re na kare rakuraku iana na maneraha. Ngaia ki koro ma vi nahunigi na mako iamami. Gu vategami na ngauha, hanana mi tahitahi. Gu vategami na ngauha ni hasinga, hanana mi hasihasi i mu iamami.”

²⁰O Josepo ki vurigi na ara ni mako hato i Esipito tanga na maneraha. Suria na magêha ki ramo teha ngavê, tahema ki katora na ai ni Esipito hato ka hagavuringenigi na mako iata. Na ara ni mako hato ki têgi na maneraha.

²¹O Josepo ki katora na enoni suria i Esipito hagenani ka vora re na kare vurivuri.

²²Ngaia ki vurigi na ara ni mako hato, nga noga ma na mako iata na mane ni vogasiha. Ngaira ka pe hagavuringenigi na mako iata, suria na maneraha ki vatera na meta, hanana vi ga mauri re.

²³O Josepo ki vi tangara na enoni, ki vi: “Hoita, inê kê bani vurigamu igamu ma na mako iami tanga na maneraha. Na ngauha ni hasinga tangagamu kani igê tangagi na mu iami.

²⁴Ma na matena ga maua, ki tuguhigamu, vigamu mahatangenia na pita na apaneni na harisi iami tanga na maneraha. Ma na ani i hitahita râ kamu ngêngê tani igamu ma na ahemata iami ma kamu hasihasi tani.”

²⁵Ngaira ka arami, ka vi: “Araha, igo ko hagatahigami. Igo ko koro tangagami ma igami kami page vora re na kare vurivuri iana na maneraha.”

²⁶Vikê o Josepo ki naka na ramata tanga i Esipito hagenani, hanana vi na pita na apanena na harisi ki arâ tanga na maneraha. Na ramata ngekê ki arâ mênga mataro me i ngekê. Nga noga ma na mako iata na mane ni vogasiha na maneraha ki pe têgi.

²⁷Na Isiraelita ka oga i Esipito i na apanena i Gosene. Ngaira ka ruruguha igê ma ka rako na kareta.

²⁸O Jakobo ki oga i Esipito surigi na harisi tangahuru matare pi, mataro me ki tonga na 147 na harisi iana.

²⁹Matena ngaia ki sugia ma vige meme, ngaia ki unia me o Josepo o karena ma ki vi tanga, ki vi: “Gu naka na rimanu i berarogani na tangaku ma ko tohetohe, vi igo ki asa vigu bagiê so Esipito.

³⁰Inê kê obania, go bagiê henira na êvariku. Go toreê tenia i Esipito ma ko bagiê igê na agua, ga bani bagira igê na êvariku.” O Josepo ki arami, ki vi: “I koro ma, gê page bagigo i ngekana.”

³¹O Jakobo ki vi: “Gu tohe, vi igo ko katokato monari nga vikana.” O Josepo ki tohe ma o Jakobo ki rahesia God i ngekana igê na bea iana.