Read Kahua HAGONEGAHANI 48 Bible Online

HAGONEGAHANI 48 - Kahua bible

HAGONEGAHANI 48

¹I ta na matena i muri, o Josepo ki rongoa, vi o vaemana ki maeha bâraha. Vikê ngaia mo Manase mo Eparaimi o karena gi rua ka râ ka bâsia o Jakobo.

²Matena o Jakobo ki rongoa, vi o Josepo o karena ki râ me, hanana vi bâsia, ngaia ki hagaramoramo ki aharaga ki oga i bea.

³O Jakobo ki vi tanga o Josepo, ki vi: “God raramohaga hunia ki vora tangê i Luse i Kanani ma ki tamaniê.

⁴Ngaia ki vi tangê, ki vi, ‘Inê be hagarakonira na raraha iamu, hanana ga voravora na apaneni me gahu. Inê be haganahunira na raraha iamu renia na agua ikê, hanana ga nahunia hagahu.”

⁵O Jakobo ki vi nikâ: “O Josepo, igo ko apararerua o karemu gi rua i Esipito, ma i murina gê râ me ikê ngairerua ka na kareku. O Eparaimi ma o Manase ngairerua ka na kareku mangarerua o Rubeni ma o Simeone.

⁶Manga vi igo ma ko aparara nikâ tani o karemu, hoi na animu igo ngegana. Ngaira ki asa vige page nahunigi na nahuninga gê meme tenigi, nga noga ma o Eparami ma o Manase kani garu page vatera.

⁷Inê kê kato vikê suria ma kenamu ka Ragele. Inê kê mesia ngavê, matena i me i Kanani hagarangia i na akerena na tara tanga i Eparata.” I Eparata ka hêtana i ngekê vi i Beteleheme.

⁸Matena o Jakobo ki bâsirerua o karena o Josepo, ngaia ki hagate, ki vi: “Ti ka na kere mane igê?”

⁹O Josepo ki arami, ki vi: “O kareku ngegê. God ki vateê renirerua ikê i Esipito.” O Jakobo ki vi: “Mererârua me tangê be têbuhirerua.”

¹⁰O Jakobo ki guruha na maana, suria i merahaga ngavê ma ki pe marava na maana. O Josepo ki torererua me na kere mane tanga o Jakobo. O Jakobo ki ruirerua ma ki siginirerua.

¹¹Ma hemuri o Jakobo ki vi tanga o Josepo, ki vi: “Inê kê girara i bara vi ve page bâsigo nikâ. Henaka, ma God ki katoê kê bâsirerua nogaterua o karemu.”

¹²Ngairerua karu oga hetangenia o Jakobo. O Josepo ki têrerua aporo me ma ki tube so i ano tanga.

¹³O Josepo ki naka o Eparaimi i mahana o Jakobo ma ki naka o Manase i otona, hanana vi o Jakobo ki têtêbuhia o Eparaimi renia na rimana na mahana ma o Manase renia na otona.

¹⁴Ma o Jakobo ki urusia ki têbuhia o Eparaimi renia na rimana i otona, henaka vi ngaia ki na ani i vora hemuri, ma ki têbuhia o Manase renia na rimana na mahana, hanaka vi ngaia ki na bêbê ni kare.

¹⁵Ngaia ki nungia God tanga o Josepo, ki vi: “God na êvariku o Abarahamo ma o Isako karu rahesia, ke korokoro tangarerua na kere mane igê. God, i ngahisiê tare mataro me i ngekê, ke ngahisirerua.

¹⁶Na angero i hagatahiê tenigi na ara ni eraha hato, ke anumasirerua. Na raraha iamami inê ma na êvariku o Abarahamo ma o Isako ke tataka tare renirerua na kare mane ngegê, ke rakorako na kareterua ma na raraha iaterua.”

¹⁷O Josepo ki hataera na obana, matena i bâsia o vaemana i têbuhia o Eparaimi renia na rimana na otona. Vikê ngaia ki têa na otona o vaemana ma ki panegenia râ tenia na bêna o Eparaimi tanga na bêna o Manase.

¹⁸Ngaia ki vi tanga o vaemana, ki vi: “Mama, siana ko kato vikana. Na bêbê ni kare hete ikê. Gu têbuhia renia na otomu.”

¹⁹O Jakobo ki usi, ki vi: “O kareku, inê kê girara! Inê kê girara! Na raraha iana o Manase ka page gahugahu ngavê nikâ. Ma o vesina ngaia ki page teharia, suria na raraha iana ka page gahu igê na hakuta ninuni.”

²⁰Igê na tangiana ngekana ngaia ki têbuhirerua igê, ki vi: “Na Isiraelita ka page visigi na atamurua, matena ga visira koro heri. Ngaira ka page vivi, ‘God ke katogamu maratoraterua o Eparaimi ma o Manase.” Igê na tarana ngekana o Jakobo ki katoa o Eparaimi ki manga na bêbê ni kare.

²¹Hemuri o Jakobo ki vi tanga o Josepo, ki vi: “Bâ, inê ki sugia ma vi ve meme. God ki page ngahisigamu ma ki page toregamu aporo tanga na agua iata na êvarimi.

²²Inê kê haganahunigo igo getego ma renia na mako koro i Sekemi, gê henahuraua tenira na Amorita, nga noga ma na goamu getera râ ki mareha.”