Read Kahua HAGONEGAHANI 49 Bible Online

HAGONEGAHANI 49 - Kahua bible

HAGONEGAHANI 49

¹O Jakobo ki unira me o karena ma ki vi tangara, ki vi: “Mu ura hagarangiê, hanana ve hagarongogamu renigi na marâ ga page tarahugamu i muri me.

²Igamu hato o karena o Jakobo, râ me kamu karingê. Mu karinga o vaemami o Isiraele.

³Rubeni na bêbê ni kare iaku, igo ka na raramohaku. Igo ka na kare hagâkani iaku. Igo ko paro ma ko ramo ngavê teharira o kareku hato.

⁴Igo ko pe hagatogo surigo maremu manga na aogana na maganuha. Ma igo ki asa vigu raha tangara o vesimu, suria igo ko memêru na gete râ ma iaku ma ko oga erasia o vaemamu.

⁵O Simeone ma o Levi karu têhesuri. Ngairerua karu hagaera renigi na tangaruha iaterua.

⁶Inê ki asa ve hakunirerua, matena garu harikato se garu hekarigi, suria garu nahu enoni igê na mangariaganiha iaterua ma karu meramarabe na puruka mane, hanana vigaru hagamanamana.

⁷Na hagaitangiha ke tarahurerua, suria i raha ngavê na mangariaganiha iaterua, ma na bagamangamangariaganiha iaterua ki hagamamasiagara purua ma na enoni. Inê be tokorenira na raraha iaterua suria i Isiraele hagenani. Inê be kasi totoko renira i guputa na enoni i ngekana.

⁸O Juta, na goamu ka page hagarahasigo. Igo ko page mutera na merongamu. O goamu ka page tubê so tangago.

⁹O Juta ki manga na laione i garahunia na ganiana i ngaua, ki aporo igê na tâtâ iana, ki gugusia marena ma ki tâtâ. Ti ki gatagata hanana i hagakangia?

¹⁰O Juta ki page taua na vato ni maneraha ma na raraha iana ka page maratorana ngaia. Na agua getigi ki page tuguhira, viga mahata tanga. Ngaira ka page têtê viteana ma ka page tubê so tanga.

¹¹Ngaia ki baroa na bêhâgana na tonki iana igê na apinige na vaini igê nga na apena koro ngavê na vaini. Ngaia ki tananigi na gahu iana igê na vaini memera.

¹²Na maana ka masuri ngavê teharia na vaini. Na rivona ka sikisiki ahuru ngavê teharia na miliki.

¹³O Sebuluni ki page oga igê na tarasini. Na marugu iana ki page vora re na manitava ni haka. Na apanena iana ki page tariha râ i Sitone.

¹⁴O Isakare ki maratorana na tonki ramo i tâ i berarogani na erutanga.

¹⁵Ngaia ki girara na agua vi mamaro igê na agua i hagagarakoro ngavê ma ki vagevagesia na agua hagenani. Vikê ngaia ki ramatutuku na gerina, hanana i toregi na erutanga. Ga tuguria ki tagara manga na kare rakuraku.

¹⁶O Tane ki page marungira na kariana Ngaira ka page maratorata na raraha getera iana o Isiraele.

¹⁷O Tane ki page maratorana na ma i papana na tara, na ma ni garahunu i na akerena na tara, i hanasia na popogani ugana na hosi, ma na mane i tagiria ki votavota hagarenga.

¹⁸Araha, inê kê naasia tenigo na tahinga.

¹⁹Na manero ka page taharia o Gati ma ngaia ki page meramato hetanga ma ki page tarigenira.

²⁰Na mu iana o Asere ka page ganora ngavê renigi na ngêra ga araria na maneraha.

²¹O Napatali ki na goti i arârâ asitatara ma ki agusingenira na karena ga koro ngavê.

²²O Josepo ki maratorana na tonki vasiga igê na ve banga, na bêhâgana na tonki vasiga igê na apanena na hungana.

²³Na merongana ka gamorahia ngavê ma ka tarigenia renigi na mage ma na epage

²⁴Na God raramohaga hunia, o Jakobo i rahesia na God i marupea ma ki anumasia o Isiraele, ngaia ki barugi na epage iata.

²⁵God o vaemamu i rahesia ngaia nga kani page tamanigo. Na God raramohaga hunia ki page korokoro tangago. Ngaia ki page vatego renia na rangi ni vavearo renia na ve tenia na ruguhana na ano, renia na hagarakoniha ni togoha ma ni nuni,

²⁶renigi na ngauha ma na mahe, renigi na korohani na barani hagahu, renigi na korohani na hungani hagahu. Na mahatanga hato ngegana God ke haganahunia o Josepo renigi, suria ga atea i berarogata o goana.

²⁷O Benamino ki manga na o vasiga i garaga. I mavoraro ngaia ki gagari ma ki tagenana ma nikâ igê na manurahi.”

²⁸Ngegana ka na tamasinga i visigi o Jakobo tanga na ara ni hitangita o karena ma ki kahu me. Ngaira ka vora na êvarita na raraha tangahuru matererua i Isiraele.

²⁹O Jakobo ki bonasira o karena, ki vi: “Hoi, i ngekê inê kê sugi hakunira na êvariku ga bani me. Mu bagiê henira na êvariku igê na vaba igê na mako iana o Eperoni na Hitita,

³⁰hagarangia i Makapela kerekê i Mamere i Kanani. O Abarahamo ki bani vurigi na vaba ma na mako ngegana tenia o Eperoni tanga na matahu.

³¹O Abarahamo ma ka Sara kaniana ka bani bagirerua i ngekana. I ngekana inê kê bani bagia nikâ igê ka Lea.

³²Na mako ma na vaba igê ka vurigi tenira na Hitita. Mu bagiê nga i ngekana.”

³³Matena o Jakobo ki tamasi hato vikana tangara o karena, ngaia ki tâ hagarenga ma ki me.