Read Kahua HAGONEGAHANI 50 Bible Online

HAGONEGAHANI 50 - Kahua bible

HAGONEGAHANI 50

¹O Josepo ki abahia o vaemana, ki angisia ma ki siginia.

²Hemuri ngaia ki bonasira na mane mangata ka tagarahia na gahuana o vaemana, hanana vi siana ki kakaga.

³Ngaira ka tagara vikana surigi na tangiani tangahuru ge he manga bani hanana. Na ai ni Esipito ka hetaki surigi na tangiani tangahuru gi pi.

⁴Matena i hato na hagahunu bungi, o Josepo ki vi tangara na mane ni hagaotonga iana na maneraha i Esipito, ki vi:

⁵“Bamane, mu torea na rongoha ikê tanga na maneraha: ‘Matena o vaemaku ki sugia ma vige meme, ngaia ki katoê, kê tohe, vi inê kê bagia nga igê na vaba, i bani hagarêa i Kanani. I koro, ko nakê kê arâ ma kê bagia o vaemaku ma kê kahu aporo me.”

⁶Na maneraha ki arami, ki vi: “I koro ma vi go arâ ma ko bagia o vaemamu manga hanana go tohe.”

⁷Vikê o Josepo ki râ ma ki bagia o vaemana. Na gavumane hato iana na maneraha ma na mane ni hagaotonga iana ma na mane ni bêngeniha ka râ henia.

⁸Na ahemata iana, o goana ma na ani getera na raraha iana o vaemana ngaira hato ka râ nikâ henia, nga noga ma na kere kare iata ma na sipi, na goti ma na puruka iata ka oga vê i na apanena i Gosene.

⁹Na mane ga tagirigi na kati ma na ani ga tagirira na hosi ngaira ka râ nikâ henia. Ngaia ki vora na râha raha ngavê.

¹⁰Matena ga tariha i Atata i na apanena akê i ve i Jotano, igê na agua ni hatanga ni koni, ngaira ka angi maramara raha arihu era. O Josepo ki râ surigi na ramata ni angiha maramara surigi na tangiani gi pi.

¹¹Matena na ai ni Kanani ka bâsira ga angiangi maramara i Atata, ngaira ka vi: “Oi, tangara na ai ni Esipito na angiha maramara ki na tarana i raha teha ngavê.” Tahema na agua ngekana ka hêtana vi Abele Misiraimi i vi ‘Ai ni Esipito ka angi maramara.’

¹²Hoi, o karena o Jakobo ka kato manga i bani bonasira.

¹³Ngaira ka torea na gahuana tanga i Kanani ma ka bagia igê na vaba i Makapela i na apanena akê i Mamere igê na mako, o Abarahamo ki bani vuria tenia o Eperoni na Hitita tanga na matahu.

¹⁴Matena o Josepo ki bagia hato o vaemana, ngaia ki aporo i Esipito henira o goana ma na enoni hato, ga tage râ tanga na bagiha ninuni.

¹⁵I murina i me o Jakobo, o veogana o Josepo ka hetamatamasi, ka vi: “O Josepo ki mangariaga mênga vari tangagia? Ngaia vari ki usumigia renia na bagatauhaka tanga?”

¹⁶Vikê ngaira ka kasi tamasinga tanga o Josepo, ka vi: “Hagenago ma ki me o vaemaka,

¹⁷ngaia ki bani vi tangagami, ki vi, ‘Mu nungia o Josepo, ki bonotenigi na bagatauhami tanga, matena mu merongasia.’ Tahema igami kami nungigo, hanana go bonotenigi na bagatauhamami tangago, suria igami nogamami kami rahesia God, o vaemamu i rahesia.” O Josepo ki angi, matena i rongo vikana.

¹⁸Ma hemuri ngaira mareta o veogana ka râ ma ka tubê so tanga, ma ka vi: “Igami ikê. I ararigami, vigami voravora re na kare rakuraku iamu.”

¹⁹Ma o Josepo ki vi tangara, ki vi: “Siana kamu magu! Mareha vi God kani inê!

²⁰Igamu kamu katoa na eraha tangê, ma na eraha mu katogi, God ki horogi igê na tarani ga koro, hanana ga tahitahi rako na enoni ga goga i ngekê surigi na marâ hato ga tarahuê.

²¹Siana kamu magu! Inê be marupegamu igamu ma na karemi. “Vikê ngaia ki hagakoro tangara ma ki haganaku parongata, suria na tamasinga iana ki hagakoro obata.

²²O Josepo ki oga nga i Esipito henira na raraha iana o vaemana. Ngaia ki tonga na 110 na harisi iana ma ki kahu me.

²³Ngaia ki tahi togâta na karena ma na esina o Eparaimi. Ngaia ki tahi togâta na karena o Makire o karena o Manase ma ki katora ka vora na raraha iana.

²⁴Ngaia ki vi tangara o veogana, ki vi: “Inê kê sugi meme, ma God ki page marupegamu nga ma ki page bêngenigamu hura tenia na agua ikê tanga na agua i bani tohe vi haganahunira o Abarahamo, o Isako ma o Jakobo renia.”

²⁵Hemuri o Josepo ki vi tangara na raraha iana o Isiraele, ka tohe. Ngaia ki vi: “Mu tohe, vi igamu kamu page migirâ na suriku, matena God ki page bêngenigamu hura tanga na agua ngekana.”

²⁶Hoi, o Josepo ki tonga na 110 na harisi iana ma ki me i Esipito. Ngaira ka tagarahia na gahuana, siana ki vi kakaga ma ka naka i rarona na bokesi ni gahua.