Read Kahua HAGONEGAHANI 6 Bible Online

HAGONEGAHANI 6 - Kahua bible

HAGONEGAHANI 6

¹Matena na enoni ka ama ni rakorako nga, ngaira ka totoko suria na maveta hagenani. Ngaira ka aparara na kare hehene, ga bâkoro era.

²Tani na ataro ka bâsira na kere gete bâkoro ngegê ma ka êragira na ani ga tenira.

³Ma na Araha ki tako ki vi: “Na mauriha gê vatera na enoni ngaia ki pe araria vige gâga tare. Ngaira ka oga tanga ga meme. Haganega tenia i ngekê ngaia ki asa, vige mêri arihu teharigi na harisi 120.”

⁴Igê na matena ngekana ma i muri me nikâ ka gâga i maveta na mane ga bagararaha. Ngaira ka na kareta na gete ma na ataro. Na mane ga bagararaha ngegana ngaira ka na maneraha i nago, i rongo raha na atata.

⁵Na Araha ki bâsigi na bagatauhata na enoni ma na katoha era iata.

⁶Tahema ngaia ki tangahuria, suria ngaia ki hagavorara ma ki kasira i maveta. Ngaia ki marâ era ngavê na apena.

⁷Tahema ngaia ki tako ki vi: “Inê be mutera na enoni gê hagavorara ngegana. Inê be mutera nikâ na marâ ga mauri i ano ma na manu, suria inê kê tangahuriê, suria gê hagavorara.”

⁸Ma ngaia ki obakoro ma renia o Noa.

⁹Ikê ki na sihonga renia o Noa. Ngaia ki aparara o karena gi oru: o Semi mo Gamu mo Japeti. O Noa ngaia getea ma ki na mane i koro ma ki oto na parongana i maana God. Ngaia ki tarisuria God.

¹¹Na enoni hato getera ka erataga i maana God ma ka oga sutaga igê na ara ni agua.

¹²God ki bâsia vi na maveta ki erataga ngavê, suria na enoni hato igê ka bagaparongata.

¹³God ki vi tanga o Noa, ki vi: “Inê kê bani kato, vigê mutera na enoni hatohato. Inê be hatungira hagetage, suria na bagatauhata na enoni ki ramo teha i maveta hagenani.

¹⁴Gu tagarahia na haka tangago maremu renigi na hata. Go katogi na kiboru i rarona ma ko puruia i rarona ma i metera.

¹⁵Go tagarahia ki borahu na 150 mita. Na aberaberagana ki 25 mita ma na rêna ki akê 15 mita.

¹⁶Go tagarahia na gerina na haka ki tehateha hura na mamarupa, i 50 sentimita. Go tagarahigi na ruma gi oru hariabahi igê, ma ko naka na maani ruma igê na apanena.

¹⁷Inê kê katoa na maganuha raha i maveta, hanana i hagamesira na ara ni marâ hato ga mauri igê. Na ara ni marâ hato i maveta ka page me.

¹⁸Ma inê be naka na suruheri iaku henigo. Go tagetage igê na haka henia na gete iamu ma henira o karemu ma na gete iata hegitigi.

¹⁹Go torera henigo nikâ na ani mane ma na ani hehene tenira na ara ni marâ hato ga mauri i ano ma tenira na manu, hanana ga tahitahi.

²¹Go totora henigo nikâ na ani mavê na ngauha tangagamu ma ngaira.”

²²O Noa ki katogi na ara ni marâ God ki visigi tanga.