Read Kahua HAGONEGAHANI 7 Bible Online

HAGONEGAHANI 7 - Kahua bible

HAGONEGAHANI 7

¹Na Araha ki vi tanga o Noa, ki vi: “Go bêbanu i na haka henira ngaira hato i ruma iamu. Inê kê bani girara, vi na parongamu igo getego ma ki oto i maaku.

²Go torera henigo na ani mane gi pi ma na ani hehene gi pi tenira na ara ni marâ ga mauri ma ka arari ni vogasiha, ma na ani mane gi tage ma na ani hehene gi tage tenira na ani ga pe arari ni vogasiha.

³Go torera nikâ na ani mane gi pi ma na ani hehene gi pi tenira na ataka mavê na manu. Go katokato vikana, hanana na ara ni ataka mavê na marâ ga mauri i ano ma na manu ka tahitahi, ma hanana ga page tataka nikâ i maveta i muri me.

⁴I murini na tangiani gi pi haganega tenia i ngekê, inê kê page katoa na tangi ki rangirangi surigi na tangiani ma na bungiani tangahuru ge he. Inê kê page hagamesira na ara ni marâ hato ga mauri gê hagavorara.”

⁵O Noa ki katogi na ara ni marâ na Araha ki visigi tanga.

⁶O Noa ki tonga na harisi 600 iana, matena i haganega na maganuha raha i maveta.

⁷Ngaia ma kaniana ma o karena henira na gete iata hegetigi ka banu igê na haka, hanana vi ga tahitahi tenia na maganuha.

⁸Suria na tamasinga iana God o Noa ki merabanu igê na haka na ani mane ma na ani hehene renira na ataka mavê na marâ ga mauri i ano ma na manu, naka ma na ani ga arari ni vogasiha se mareha.

¹⁰I murini na tangiani gi pi na maganuha ki haganega.

¹¹Matena o Noa ki tonga na harisi 600 iana, igê na tangahuruta matare pi na tangiana igê na ruata na hageha, na ve hato i ruguhana na maveta ka akê raramohaga me ma ka nongasia na maveta, ma na ara ni ve i basina na vavearo ka tahataha.

¹²Na tangi ki oga surigi na tangiani ma na bungiani tangahuru ge he.

¹³Igê nga na tangiana ngekana o Noa ma kaniana karu banu igê na haka henira o kareterua gi oru o Semi mo Gamu mo Japeti ma na gete iata hegetigi.

¹⁴Ma henira ngaira ka banu nogata na ataka mavê na marâ ga mauri, na ani ga manata ma na ani ga vasiga, na ani raha ma na ani sisite, ma na ataka mavê na manu.

¹⁵O Noa ki merabanu igê na haka na ani mane ma na ani hehene tenira na ani mavê na marâ ga mauri,

¹⁶suria God ki bonasia vikana. Ma hemuri na Araha ki purusia banu o Noa.

¹⁷Na tangi ki oga surigi na tangiani tangahuru ge he. Na ve ki nonga ki akê, ma na haka ki haganega ki tare.

¹⁸Na ve ki ama ni akê nga ma na haka ki kahu tare.

¹⁹Na maganuha ki akê ma ki anuigi na barani.

²⁰Ngaia ki ama ni akê nga na tangahani ge he tenigi na barani.

²¹Na ara ni marâ hato ga mauri i maveta ka me: na ara ni manu hato, na ara ni marâ hato ga mauri i ano, ma na ara ni enoni hato.

²²Na ara ni marâ hato i maveta ga manava so ngaira ka me.

²³Na Araha ki mutera na ara ni marâ hato ga mauri i maveta: na enoni, na marâ ga mauri i ano ma na manu. Nga noga ma o Noa ma na ani ga oga henia i rarona na haka kaniga tahi.

²⁴Na maganuha ki pe so rârâ mataro me ki hato na tangiani tangarê gi tage matara na tangahuru gi rima.