Read Kahua HAGONEGAHANI 9 Bible Online

HAGONEGAHANI 9 - Kahua bible

HAGONEGAHANI 9

¹God ki koro tangara o Noa ma o karena ma ki vi: “Mu apapara kare, hanana na raraha iami ka vunusia na maveta hagenani.

²Na ara ni marâ hato ga mauri i ano, na manu hato ma na siare i asi ka page magutenigamu. Inê kê hagatoragamu renira hanana mu marungira.

³Igamu kamu girara mu ngaura na ganiani ma na ngauha ni agua. Ngaigi ka na ngauha iami.

⁴Na marâ gi tage ma ki apu tangagamu. Siana kamu ngaugi na ganiani gagapugaga. Inê kê manimania vikana, suria na gapu ki na mêriha.

⁵Na anima na enoni i nahuia ki meme na tamana, inê kê page hagaitangia ki meme nogana. Inê kê page hagaitangia ki meme na ani mavê na marâ i mauri, manga i nahunahu hunia na enoni.

⁶Na enoni ki maratorana God. Tahema manga vi tani ma ki nahuia ki meme na tamana, ngaia ka page nahuia ki meme nogana.

⁷Mu apapara kare, hanana na raraha iami ka vunusia na maveta.”

⁸God ki vi tangara o Noa ma o karena, ki vi:

⁹“Inê be naka na suruheri iaku henigamu igamu ma na raraha iami,

¹⁰ma henira na ara ni marâ hato ga mauri: na manu hato, na marâ hato ga mauri i ano henira na ara ni marâ hato, mu merahura me tenia na haka.

¹¹Inê be naka na suruheri iaku henigamu vikê. Inê kê tohe, vi inê ki hato, vi ve mutera nikâ na ara ni marâ hato ga mauri renia na maganuha. Na maganuha ki hato hagetage, vige erasia nikâ na maveta.

¹²Na suruheri iaku henigamu, igamu ma na ara ni marâ hato ga mauri, ngaia ki asa vige page hato. Na girarana ki manga ikê.

¹³Inê be naka na rorovagaro ni marapeha iaku igê na vaha. Ngaia ki na girarana na suruheri iaku henia na maveta.

¹⁴Na ara ni mateni gê katoa na vavearo ki vahagaga ma na rorovagaro ki voravora me,

¹⁵inê be takusia aporo na tohenga iaku tangagamu, igamu ma na ara ni marâ hato ga mauri, hanana vi na maganuha ki hato hagetage vige mutera nikâ na ara ni marâ hato ga mauri.

¹⁶Matena na rorovagaro ki voravora me igê na vaha, inê be rigia ma be takusia aporo na suruheri iaku henigamu, igamu ma na ara ni marâ hato ga mauri i maveta, vi ngaia ki asa vige page hato.

¹⁷Ngaia nga ka na girarana na tohenga iaku tangara na ara ni marâ hato ga mauri.”

¹⁸O karena o Noa ga hura me tenia na haka, ngaira ka no Semi mo Gamu mo Japeti. O Gamu ki apara o Kanane.

¹⁹O karena gi oru o Noa ngegê ngaira ka na êvarita na enoni hato i maveta.

²⁰O Noa ka na mane i tagarahigi na mu. Ngaia ka na mane i hagenago ki hasigi na mu ni vaini.

²¹Matena i tono hato na vaini, ngaia ki aripo na maana. Ngaia ki tasia na gahu iana ma ki tâ rupaturi igê na ruma na gahu iana.

²²Matena o Gamu, o vaemana o Kanane, ki bâsia vi o vaemana ki rupaturi, ngaia ki urahura ma ki hagarongorerua o veogana.

²³Ma hemuri o Semi mo Japeti karu tavoa na gahu ni aruha karu tê gasia ma karu tê tongani na bogoniheri i bêni gaparaterua. Ngairerua karu mebanu murisiga igê na ruma na gahu ma karu tukuia o vaematerua renia. Ngairerua karu aharo nga getererua, suria garu pe obania vigaru bâsia o vaematerua i rupaturi.

²⁴Matena i hato na raramohana na vaini tenia o Noa, ngaia ki rongoa na tarana i katoa o karena hemuri tanga,

²⁵ma ki vi: “Na hagaitangiha tanga o Kanane. O veogana karu page hagatutunguhia.

²⁶Ge hagarahasia na Araha God o Semi ki rahesia. O veogana karu page hagatutunguhia o Kanane.

²⁷God ke hagarakonira na raraha iana o Japeti. Na raraha iana ke oga haku henira na anina o Semi. O veogana karu page hagatutunguhia o Kanane.”

²⁸I murina na maganuha raha o Noa ki oga nikâ surigi na harisi 350.

²⁹Ngaia ki tonga na harisi 950 iana ma ki kahu me.