Read Kahua 2 SAMUELE 1 Bible Online

2 SAMUELE 1 - Kahua bible

2 SAMUELE 1

¹I murina i bani me o Saulo ma o Tavite ki bani teharira na Amalekita, ngaia ki aporo i Sikilage ma ki oga igê surigi na tangiani gi rua.

²Igê na oruta na tangiana ta na mane ni me ki ata me. Ngaia ki râ me tenia na tênga iana o Saulo. Ngaia ki bani tarisia na tuguni iana ma ki bani makuia na bêna, suria i mesia o Saulo. Ngaia ki râ i pasina o Tavite, ki susure ma ki tubê so i ano, ki hagahigasia.

³O Tavite ki hagatea, ki vi: “Go râ me tenia i he?” Na mane ki arami, ki vi: “Inê kê gava me tenia na tênga iata na Isiraelita.”

⁴O Tavite ki vi: “Suria i hega?” Na mane ki arami, ki vi: “Na mane ni me iamami ka gava tenia na hearihatana. Rako na me iamami ka me. O Saulo ma o Jonatane o karena karu me nikâ.”

⁵O Tavite ki hagatea, ki vi: “Tanu hega kanigo girararerua vi o Saulo mo Jonatane karu me?”

⁶Na mane ki arami, ki vi: “Inê kê oga i hungana i Giliboa ma kê bâsia o Saulo, i maroro ki matarigia na ora iana. Na kati ni me ma na me igê na hosi na merongana ka ura hagarangia ka rihuia.

⁷Ngaia ki ahoro me ki bâsiê. Ngaia ki uniê. Inê kê arami, kê vi, ‘Oi, maneraha!’

⁸Ngaia ki hagateê, ki vi: “Ti kanigo?’ Inê kê hagarongoa, vi inê ka na Amalekita.

⁹Ngaia ki vi, ‘Râ me ku nahuiê be me! Inê kê mamari ngavê ma kê sugi meme noga.’

¹⁰Tahema inê kê râ tanga ma kê nahuia ki me, suria inê kê girara, vi ngaia ki sugi vota ke me. Inê kê tavoa na tarepuri i bêna ma kê tarasia râ na rabu i rimana. Inê kê migirâ me tangago, maneraha.”

¹¹O Tavite ki hetaki ma ki tarisigi na tuguni iana marena ma na me hato iana ka kato vikana nogata.

¹²Ngaira ki rugu na obata, ka hari rârâ mataro me ki bungi ma ka mesira o Saulo, o Jonatane ma na Isiraelita na kariana na Araha, suria ga rako na ani ga me igê na hearihatana.

¹³O Tavite ki hagatea na mane i torea me na rongoha, ki vi: “Pasimu i he?” Na mane ki arami, ki vi: “Inê ki na Amalekita ma kê oga i na apanena iamu.”

¹⁴O Tavite ki hagatea, ki vi: “Go pe magu ma kanigo nahuia ki me na maneraha, na Araha i atea?”

¹⁵Hoi, o Tavite ki unia me na hitangita na me iana ma ki bonasia, ki vi: “Nahuia ke me!” Na me ki ahura hunia.

¹⁶O Tavite ki vi tanga na Amalekita, ki vi: “Igo maremu kanigo hagaratemu. Igo ko naka tangago maremu, suria go ranganigo maremu, vi igo kanigo nahuia ki me na maneraha, na Araha ki atea.”

¹⁷O Tavite ki kiria na ki ni angiha maramara renirerua o Saulo mo Jonatane o karena.

¹⁸Ngaia ki bonasira na ai ni Juta ka hagesuringenia. Na ki ni angiha ngekê ki oga igê na Buka iana o Jasare. I râ vikê:

¹⁹“Isiraelita, na mane ga bêngenigamu ka me ka tâ surigi na hungani. Na mane ni me ramo iami ka me igê na hearihatana

²⁰Siana kamu hagarongo i Gate, se vi igê na mahera i Asekelone. Siana kamu hagakoro obata na gete na Pilisitina. Siana kamu katora ka vagevage ka kareta na ahuroto.

²¹Siana ki rangirangi se na korupu igê na hungani i Giliboa. Na mako igê ke bêratega tare, suria na bêata iata na me ramo ka babarogani ka tâ i ngekana. Na bêata iana o Saulo ki hato vige togatoga nikâ renia na oile.

²²Na epage iana o Jonatane ki haritake tare. Na tatapa borahu iana o Saulo ki henahu tare. Ngairerua karu mutera na merongaterua ma karu ohegi na obata.

²³Saulo mo Jonatane muru hetakuiheri ma kamuru hekorokoro tare. Muru hetarisurige igê na ogaha ma igê na mera. Muru gaha teharira na ahetaronga. Muru ramo teharira na laione.

²⁴Gete na Isiraelita, mu mesia o Saulo. Ngaia ki hagatugunigamu renigi na gahu rotorotoaga memera. Ngaia ki hagarênigamu renigi na rêni ma na golo.

²⁵Na me ramo ka mute, ka me igê na hearihatana. O Jonatane ki me ki tâ igê na hungani.

²⁶Goaku o Jonatane, inê kê mesigo. Inê kê takuigo ngavê. Na hetakuiha iamu tangê ki teharia na anita na gete.

²⁷Na me ramo ka me. Na tangaruha iata ka tasi vê.”