Read Kahua 2 SAMUELE 10 Bible Online

2 SAMUELE 10 - Kahua bible

2 SAMUELE 10

¹Rârâ ma o Nagasi na maneraha i Amone ki me ma o Ganunu o karena ki urusia ki maneraha.

²Na maneraha o Tavite ki vi: “Inê be katoa na hekomaniha henia o Ganunu, suria o Nagasi o vaemana ki bani kato vikana tangê.” Vikê o Tavite ki kasira na mane tora tamasinga, ka hagarongoa o Ganunu, vi ngaia ki hetaki nogana. Matena na mane tora tamasinga ka ata râ i Amone,

³na enoni raha i pasita na Amonita ka vi tanga na maneraha o Ganunu, ka vi: “Go takusia vari, vi o Tavite ki hagatorangenira me na mane ngegana, hanana viga hagarongogo, vi ngaia ki hetaki nogana ma ki hagahigasia o Vaemamu? I mareha vê! Ngaia ki kasira me ikê, hanana ma viga arâ bâbâ i hinua, hanana vi henahuraugia!”

⁴O Ganunu ki hagatotongora na mane tora tamasinga iana o Tavite, ki gurigi na apaneni gi tage na taboturita, ki rete mukugi i gupita na tuguni iata ma ki kasira vê ka aporo.

⁵Ngaira ka maki ngavê, vige aporo. Matena o Tavite ki rongo vikana, ngaia ki kasi tamasinga tangara ka oga i Jeriko rârâ ma ki gagahi aporo na taboturita, ma hemuri ka kahu aporo me.

⁶Na Amonita ka kahu tahetara, vi ngaira kaniga katoa o Tavite ki merongasira. Tahema ngaira ka vatevatera na 20,000 na mane ni me ni Beteregobo me Soba i Siria ma na 12,000 na mane ni me ni Tobo ma ni Maka.

⁷O Tavite ki rongo vikana ma ki hagatorangenia o Joaba henira na mane ni me hato, hanana ga meraheariha.

⁸Na Amonita ka tavo uga hura tenia i Raba na hinua raha iata ma ka ura harahara i maana na maanipara ni hinua. Na mane ni me ni Siria henira na mane ni me ni Tobo me Maka, ngaira ka ura harahara igê na bena.

⁹O Joaba ki bâsira na mane ni me na merongana ga page taharia, tani i matona ma tani i murina. Vikê ngaia ki atera na mane ni me ramo na Isiraelita ma ki nakara ka ura harahara ka maatira na me ni Siria.

¹⁰Ngaia ki naka o Abisai o vesina ki bêngenira na mane ni me getera iana. O Abisai ki nakara ka ura harahara ka maatira na Amonita.

¹¹O Joaba ki vi tanga o Abisai, ki vi: “Manga go bâsia, vi na me ni Siria ka ramoramo tehariê, hoi, go arâ me ko tamaniê. Ma ki manga inê ma kê bâsira na Amonita ga ramoramo teharigo, hoi, inê kê page arâ kê tamanigo.

¹²Gu ramoramo! Siana ko magu! Ge ramo ke meraheariha nga pusira na kariaka ma na hinua iana God iaka! Ge vora me na marâ na Araha i takusia!”

¹³O Joaba ma na me iana ka guru râ ka taharira na me ni Siria ma na me ni Siria ka gava.

¹⁴Matena na Amonita ka bâsira na me ni Siria ga gava, ngaira ka gavatenia o Abisai ma ka banu aporo i hinua. O Joaba ki kariarigu tenia vi meraheariha na Amonita ma ki aporo i Jerusaleme.

¹⁵Na me ni Siria ka kahu tahetara vi ngaira ka so renira na Isiraelita. Tahema ngaira ka hagahakura na mane ni me hato iata.

¹⁶Na maneraha o Hatatesere ki unira me na mane ni me ni Siria, ga oga igê na apanena akê i ve i Uparatesi. Ngaira ka haku i Gelama. O Sobaka, i bêngenira na mane ni me iana o Hatatesere na maneraha i Soba, ngaia ki bêngenira nogata.

¹⁷Matena o Tavite ki rongo vikana, ngaia ki hagahakura na mane ni me na Isiraelita, ki tarêhia i ve i Jotano ma ki tavo uga tanga i Gelama. Na me ni Siria ka ura harahara ka maatia o Tavite. Na hearihatana ki haganega.

¹⁸Na Isiraelita ka sugarira bê aporo na me ni Siria. O Tavite ma na mane ni me iana ka nahuira ka me na 700 na me igê na kati ni me ma na 40,000 na mane ni me igê na hosi. Ngaira ka hagamamaria o Sobaka, i bêngenira na me ni Siria, ma ngaia ki me igê na agua ni hearihatana.

¹⁹Matena na maneraha ga oga i ruguhana o Hatatesere ka tahetara, vi ngaira ka so renira na Isiraelita, ngaira ka heaganari henira na Isiraelita, hanana viga gâga i ruguhata. Na ai ni Siria ka magu vige tamanira nikâ na Amonita.