Read Kahua 2 SAMUELE 11 Bible Online

2 SAMUELE 11 - Kahua bible

2 SAMUELE 11

¹Igê na hagahisi i muri, na matena na maneraha ka arâ tare igê na hearihatana, o Tavite ki hagatorangenia o Joaba tanga na hearihatana henira na mane ni me hato na Isiraelita ma henira na mane ga bêngenira. Ngaira ka teharira na Amonita ma ka oga rihia na hinua i Raba. Ma o Tavite marena ki oga vê i Jerusaleme.

²I ta na tangiana, igê na manurahitana, o Tavite ki aharaga akê i bea iana ma ki tagere igê na gerina aberabera na ruma raha iana. Matena i arârâ igê, ngaia ki bâsia ta na gete i mamanu i ruma iana. Na gete ki bâkoro ngavê.

³Vikê ngaia ki hagatorangenia ta na mane ki râ, hanana i girara, vi ka ti ngekana. Na mane ngekana ki hagarongoa o Tavite, ki vi: “Ka Bateseba nge, ka karena o Eliama ma kaniana o Uria na Hitita.”

⁴O Tavite ki hagatorangenira na mane tora tamasinga ka merâ me. Ngaira ka torea me tanga ma o Tavite ki memêru. Ka Bateseba ki kahu hatungia râ ma na hagamatarotaroha i murina i taha na obana. I memêru hato, ngaia ki aporo i pasina.

⁵Ki rârâ ma ngaia ki girara so, vi ngaia ki obara ma ki kasi tamasinga tanga o Tavite, ki hagarongoa renia.

⁶Vikê o Tavite ki kasi tamasinga tanga o Joaba, ki vi: “Gu hagatorangenia me o Uria na Hitita.” Hoi, o Joaba ki hagatorangenia râ tanga o Tavite.

⁷Matena i ata me o Uria, o Tavite ki hagatea, ki vi: “I hega, o Joaba ma na mane ni me ka oga bâkoro ma? Ma na hearihatana ki hega?”

⁸Hemuri o Tavite ki vi tanga o Uria, ki vi: “Go aporo i pasimu ku mamaro nga.” O Uria ki râ ma o Tavite ki hagatorangenia râ na mahatanga tanga.

⁹Ma o Uria ki pe râ i pasina. Ngaia ki mêru ma igê na kiboru tanga râ na tarâta tanga na ruma raha iana na maneraha, ga oga igê na mane ni anumasiha.

¹⁰Matena o Tavite ki rongo, vi o Uria ki pe râ i pasina, ngaia ki hagatea, ki vi: “Igo ko rârâ arihu era. Igo ko kahu aporo ma me. Tanu hega go pe râ i pasimu?”

¹¹O Uria ki arami, ki vi: “Na mane ni me ni Isiraele me Juta ka oga vê igê na hearihatana, ma na bokesi na suruheri ki oga vê henia o Joaba i bêngenigami, ma henira na mane getera ga bêngenira na mane ni me. Ngaira ka tênga ma i metara. Tanu hega kani vigê arâ i pasiku, kê ngêngê ma kê totono ma kê memêru kaniaku? Inê kê tohe renia God ma renigo nikâ igo, vi pe arariê ngavê na tarana ngekana!”

¹²Hoi, o Tavite ki vi: “Gu oga so ikê i ngekê ma i gomaha kê page nakago ko arâ.” Vikê o Uria ki oga so i Jerusaleme igê na tangiana ngekana ma na tangiana i muri.

¹³O Tavite ki guhia ki mengê i manurahi ma ki hagatonomia ki ruguhia. Ma nikâ igê na bungiana ngekana o Uria ki pe râ i pasina. Ngaia ki mêru ma igê na banana igê na kiboru iata na me ga anumasia na ruma raha iana na maneraha.

¹⁴Ki tangi me ma o Tavite ki segea na leta tanga o Joaba. O Uria ki torea na leta.

¹⁵O Tavite ki sege ki vi: “Gu naka o Uria igê na harahara hagenago, na agua i ramoramo igê na hearihatana. Hemuri ko sugasuga bê aporo nga tenia, hanana i meme igê na hearihatana.”

¹⁶Hoi, matena o Joaba ki oga rihia na hinua, ngaia ki kasia o Uria igê na agua ga ramo ngavê igê na merongana.

¹⁷Na mane ni me na meronga ka hura me tenia na hinua ma ka meraheariha na me iana o Joaba. Tani na mane ga bêngenira na me iana o Tavite ka me ma o Uria nikâ.

¹⁸Hemuri o Joaba ki kasi tamasinga tanga o Tavite, ki hagarongoa renia na hearihatana.

¹⁹Ngaia ki vi tanga na mane i tora tamasinga, ki vi: “Matena go hagarongoa hato na maneraha renia na hearihatana,

²⁰vari ngaia ki mangariaga ma ki page hagatego, ki vivi, ‘Tanu hega igamu kamu râ hagarangia na hinua kamu meraheariha? Mu pe bani girara vari, vi ngaira ka hanahana so me tenigi na para ni hinua?

²¹Mu pe takusia vari, vi i manga i he o Abimeleki karena o Giteone ki me? I Tebesi tenia na para ni hinua ta na gete ki kasia vato na hê, ga menamenarigi na koni renia, ma ki nahuia ki me. Hoi, tanu hega kanimu hagarangia râ na para ni hinua?’ Manga na maneraha ma ki hagatego vikana, go aramia, ko vi, ‘O Uria na hitangita na mane ga bêngenira na me iamu, ngaia nogana ki me.’”

²²Vikê na mane tora tamasinga ki râ i pasina o Tavite ma ki hagarongoa renia na tamasinga iana o Joaba.

²³Ngaia ki vi: “Na merongaka ka ramo teharigami ngavê. Ngaira ka hura me tenia na hinua, hanana viga megamiheariha igê na bena, ma igami kami sugarira bê aporo tanga na maani para ni hinua.

²⁴Ngaira ka hanasigami so me tenia na para ni hinua, ma tani na mane ga bêngenira na me iamu, maneraha, ka me. I berarogata o Uria nikâ ki me henira.”

²⁵O Tavite ki vi tanga na mane tora tamasinga, ki vi: “Go hagaramonia o Joaba ma ko vi tanga, siana ki takotako bâraha, suria tarema igê na hearihatana na enoni ka meme, ma ki asa vigu girara o ti. Go vi tanga ki taharia ramo na hinua teharia i nago, ma ki henahuraua.”

²⁶Matena ka Bateseba ki rongo, vi o vaniana ki me, ngaia ki mesia.

²⁷Igê na hatongina na matena ni mesiha, o Tavite ki kasi tamasinga tanga, ki râ me ki oga i ruma raha iana. Ngaia ki vora re kaniana ma ki apara na kare mane tanga. Ma na Araha ki ngaritenia na tauhana o Tavite ngekana.