Read Kahua 2 SAMUELE 12 Bible Online

2 SAMUELE 12 - Kahua bible

2 SAMUELE 12

¹Na Araha ki hagatorangenia o Natane na poropete tanga o Tavite. O Natane ki râ i pasina na maneraha ma ki vi: “Ta na matena na vererua na mane karu oga i hinua gi tage. Ta na hitangiterua ki ruruguha ma tani ki matareha.

²Na mane ruruguha ki nahunira rako era na puruka, na goti ma na sipi.

³Na mane i matareha ki nahunia ma na ani gi tage na karena sipi i vuria. Ngaia ki marupea ma na sipi ki raharaha i ruma iana henira o karena ma ka karena. Ngaia ki hagangêa na sipi renigi tani na ngêra iana marena ma ki hagatonomia igê na kâkâ iana marena. Ngaia ki topea. Na sipi ki tagenana ma manga vi ka karena.

⁴I ta na matena ta na mane ki vatugia me na mane ruruguha. Na mane ruruguha ngekana ki pe obania, vige nahuia hete na hitangita na togoha iana marena, hanana vige hagamakoa tanga. Ngaia ki torea ma na karena sipi iana na mane i matareha ma ki hagamakoa tanga na mane i vatugia.”

⁵O Tavite ki mangariaga ngavê tanga na mane ruruguha ma ki vi: “Inê kê tohe renia na Araha mamauri, vi na mane ngekana ki tuguhia vi meme renia na bagatauhana!

⁶Suria ngaia ki hagamamasiaga ngavê na mane matareha, ngaia ki tuguhia vi barua aporo renira na sipi ge he.”

⁷O Natane ki vi tanga o Tavite, ki vi: “Igo ngekana! Ma na Araha God iata na Isiraelita kani vi vikê tangago, ki vi, ‘Inê kê nakago ko maneraha i Isiraele ma kê hagatahigo tenia o Saulo.

⁸Inê kê kasigo ko maneraha urusia ma kê haganahunigo renira na gete iana. Inê kê nakago ko maneraha i Isiraele ma i Juta. Ngaia ki bani teha renia ngavê vi arari. Manga i mareha, na ta be kahu vatego nikâ renia?

⁹Hoi, tanu hega ko aharêngigi na ramata iaku? Tanu hega ko bagarongo vikana? Igonga kanigo nahuia ki me o Uria. Igonga kanigo nakara na Amonita ka nahuia ki me ma ko hanagoa kaniana.

¹⁰Hoita, surigi na ara ni apaparaha iamu igê na raraha iamu ka page nahuira ka meme tani, suria igo ko haritoheê ma ko hanagoa kaniana o Uria.

¹¹Inê na Araha kê tohe, vi inê kê page katoa na hitangita na ahemata iamu maremu ki hagaratemu. Igo ko page tahetara renia, matena gê tavora hura kaniamu tenigo ma kê haganahunia na mane getea renira. Ma ngaia ki page meramêru rara so ma.

¹²Igo ko pinihia na bagatauhamu ma inê kê page katoa, ke meramêru rara so ma i maata na Isiraelita hato.’”

¹³O Tavite ki vi: “Inê kê tasi. Inê kê haritohea na Araha.” O Natane ki arami, ki vi: “Na Araha ki bonotenigi na tasi iamu. I asa vigu me.”

¹⁴Ma suria igo ko haritohea ngavê na Araha vikana, tahema na karemu ki page me.”

¹⁵Ma o Natane ki aporo i pasina. Na Araha ki naka na kareterua o Tavite ma kaniana o Uria, ki maeha bâraha.

¹⁶O Tavite ki avarasia God tanga na kare. Ngaia ki usi vige ngê, ma i na ara ni bungiana ngaia ki tâtâ so ma i ano igê na kiboru iana.

¹⁷Na mane ni hagaotongo iana ka arâ tanga ma ka vi tanga, vige aharaga, ma ngaia ki usi. Ngaia ki usi nikâ vige ngê henira.

¹⁸Ki hato na tangiani gi pi ma na kare ki me. Na mane ni hagaotongo ka magu vige hagarongoa o Tavite renia. Ngaira ka vi: “Matena i tahitahi mênga ka kare, o Tavite ki pe aramigia rârâ. Na ta ke katoa? Manga vi igia ma ka hagarongoa, vi na karena ki me, ngaia ki page nahuia marena vari!”

¹⁹Matena o Tavite ki bâsira ga hehahanate, ngaia ki kahu girara, vi na karena ki me. Vikê ngaia ki hagatera, ki vi: “Na kare ki me?” Ngaira ka arami, ka vi: “Ua, i bani me.”

²⁰O Tavite ki aharaga tenia na ano, ki mamanu, ki surasura bê ma ki tuguni haoru. Hemuri ngaia ki râ i ruma iana na Araha ma ki rahesia. Matena i aporo me i ruma raha iana, ngaia ki hagategi na ngêra ma ki ngê, matena ga tora me.

²¹Na mane ni hagaotonga ka vi: “Igami kami tako makira. Matena i tahitahi mênga na kare, igo ko angiangi ma ko usi vigu ngê. Ma na matena i me, igo ko aharaga ma ko ngê!”

²²O Tavite ki arami, ki vi: “I monari. Inê kê hari ma kê angi, matena i tahitahi mênga. Inê kê takusia ma, vi na Araha ki takiê ma ki pe naka ke meme na kare.

²³Ma ki tanu hega ki arariê, vigê harihari? Na kare ki bani me. Inê ki asa be hagamêria aporo. I ta na tangiana inê kê page hakunia i na agua i oga igê, ma ngaia ki asa vige aporo me tangê!”

²⁴Hoi, o Tavite ki haganaku parongana ka Bateseba kaniana. Ngaia ki memêru ma karu apara kare mane nikâ. O Tavite ki hêtana vi o Salomo. Na Araha ki takuia na kere mane,

²⁵ma ki bonasia na poropete o Natane, hanana vi hêtana, vi o Jetitia, i vi, vi na Araha ki takuia.

²⁶I na matena ngekana o Joaba ki ama ni taharia nga i Raba, na hinua raha iata na Amonita, ma ki sugi henahuraua.

²⁷Ngaia ki hagatorangenira na mane tora tamasinga tanga o Tavite, ka hagarongoa, ka vi: “Inê kê taharia i Raba ma kê bani henahuraua na ve ga hagepuria tanga na hinua.

²⁸Hoi, gu hagahakura na mane ni me i pasimu ma igo maremu ko taharia na hinua ma ko henahuraua. Inê kê pe obania vige hagarahasiê, suria gê henahuraua.”

²⁹Vikê o Tavite ki hagahakura na me iana, ki râ tanga i Raba, ki taharia ma ki henahuraua.

³⁰O Tavite ki tavoa râ na tarepuri na golo tenia na bêna na nununa o Milekome na ataro iata na Amonita. Na higahigana na tarepuri na golo ki 30 kilo ma ki oga igê na hê i raha na mena. O Tavite ki tavoa râ na hê ngekana ma ki naka igê na tarepuri iana marena. Ngaia ki rurugu nikâ rako na marâ tenia na hinua.

³¹Ngaia ki henahuraura vê na ai ni hinua ma ki hagatagarahira, ka tagara renigi na marâ ni reteha ni hê, na piki, na akesi, hanana ga ninigi na hê renigi. Ngaia ki katora vikana nikâ na enoni surigi na hinua getigi hato iata na Amonita. Me hemuri ngaia ma na mane ni me iana ka aporo i Jerusaleme.