Read Kahua 2 SAMUELE 13 Bible Online

2 SAMUELE 13 - Kahua bible

2 SAMUELE 13

¹Ki rârâ ma ki vora me ta na tarana. O Abasalome karena o Tavite ki tonga renia ka Tamare kesina. Ka Tamare ki bâkoro ma ki pe êragi. Tani o karena o Tavite ka no Amanone.

²Ka Tamare ki râ me i parongana o Amanone. O Amanone ki maeha, suria i takusia ma, ki bâ manga i bara tanga, vige torea. Suria ka Tamare ki na kare viru, tahema ki apu vige amane.

³Na tamana koro o Amanone ka no Jonataba. Ngaia ki na mane i katokato teha ngavê. Ngaia ki no karena o Sima, o veogana, o Tavite.

⁴O Jonataba ki vi tanga o Amanone, ki vi: “Igo ka no karena na maneraha. I na ara ni tangiani inê kê bâsigo go apeape ruruhi. Na ta ki katogo?” O Amanone ki arami, ki vi: “Na bêku ki tasi suria ka Tamare kesina o Abasalome na goaku.”

⁵O Jonataba ki arami, ki vi: “Go hagaparu vigo maeha ma ko râ ko tâtâ i bea. Manga i arâ me o vaemamu ki bâsigo, go vi tanga, ko vivi, ‘Gu vi tanga kesiku ka Tamare, ke tora me na ngêra tangê. Inê kê obania vi hagarêgi na ngêra ikê, hanana gê bâsia, ma ke hagangêê marena.’”

⁶Hoita, o Amanone ki hagaparu vi maeha, ma ki râ ki tâ i bana. Na maneraha o Tavite ki râ ki bâsia. O Amanone ki vi tanga, ki vi: “Gu naka ka Tamare ke râ me ke hahi na kere koni ikê, hanana gê bâsia, ma ke hagangêê marena renigi.”

⁷Hoita, o Tavite ki kasi tamasinga râ i ruma raha tanga ka Tamare, ki vi: “Gu râ i ruma iana o Amanone ma ku hagamako ngêra tanga.”

⁸Hoi, ka Tamare ki râ ma ki tarahua o Amanone i tâtâ i bea. Ngaia ki tavoa na makona na koni, ki hagarêa ma ki hêhêgi na kere koni i ngekana, matena o Amanone i boretenia. Hemuri ngaia ki hahi na kere koni.

⁹Ngaia ki tavogi tarê igê na apira tanga ki ngê. Ma ngaia ki usi. Ngaia ki vi: “Na enoni hato ke hura.” Ma ngaira ka râ.

¹⁰Hemuri ngaia ki vi tanga ka Tamare, ki vi: “Go tora me na koni tangê ikê i banaku ma ko hagangêê igo maremu.” Ka Tamare ki tora na koni ma ki migirâ tanga.

¹¹Matena ka Tamare ki tagarenia râ na koni tanga, o Amanone ki raguia ka Tamare ma ki vi: “Tâ heniê i bea iaku!”

¹²Ka Tamare ki vi: “Inê kê usi! Siana ko tuguriê! Na tarana ngekê ki erataga ngavê. I mareha rârâ vige manga ngekana!

¹³Manga gê katokato vikê, inê kê maki ngavê tare. Ma igo ka page tamasigo tare. Gu râ ku rongoa na maneraha. Inê kê girara nga, vi ngaia ki hagauragingeniê henigo.”

¹⁴Ma ngaia ki pe tê viteana. Ngaia ki piringia so i ano ma ki merongo era, suria i ramo teharia.

¹⁵Hemuri o Amanone ki kitenia ngavê. I ngekê ngaia ki kitenia teharia i takuia i nago. Ngaia ki vi tanga, ki vi: “Aharaga! Gu râ!”

¹⁶Ka Tamare ki vi: “E, mareha! Go paiê hura vikana ki erataga teharia na tarana go katoa râ tangê i ngekê!” Ma o Amanone ki pe rongo ringena.

¹⁷Ngaia ki unia me na kariana i bâsuria na kiboru iana ma ki vi: “Gu torea vê teniê na gete ikê! Gu kasia hura ma ko raburia na maani ruma!”

¹⁸Na kariana ki kasia hura ma ki raburia na maani ruma. Ka Tamare ki tuguni renia na tuguni borahu, i borahu na rimana. I na matena ngekana na tuguni vikana ka na tauhata na kare viru ka kareta na maneraha.

¹⁹Ngaia ki kuhuia marena na bêna renia na rahu, ki tarisia na tuguni borahu iana ma ki angi ki râ i tê pusigi na maana.

²⁰Matena o Abasalome o veogana ki bâsia, ngaia ki hagatea, ki vi: “I hega, o Amanone ki tugurigo ki megorongo era? Kesiku, siana! Siana ko torea bâraha na takoha. O veogamu ngekana. Siana ko hagarongoa rârâ ta na enoni renia.” Vikana ka Tamare ki oga so ma i ruma iana o Abasalome. Ngaia ki rugu na obana ma na enoni ki asa vige haganaku parongana rârâ.

²¹Matena na maneraha o Tavite ki rongo vikana, ngaia ki mangariaga ngavê.

²²Ma o Abasalome ki kitenia ngavê o Amanone, suria i tuguria ka Tamare kesina ki merongo era. Tahema ngaia ki kahu pe metamasi rârâ nikâ o Amanone.

²³I murina na harisi gi rua o Abasalome ki tapurura na sipi iana i Bala Gasore hagarangia na hinua i Eperone. Ngaia ki guhira o karena hato na maneraha ka râme.

²⁴Ngaia ki râ i pasina na maneraha o Tavite ma ki vi: “Maneraha, na sipi iaku ka tapurura. Inê kê guhigamu, igo ma na mane ni hagaotonga iamu, kamu arâ me tanga na magotoha.”

²⁵Na maneraha ki arami, ki vi: “I kere bara, kareku. Manga vi igami hato ma kami arâ me, ki page barabara tangago.” O Abasalome ki togeaga ma na maneraha ki togeaga nogana ma ki vi tanga o Abasalome, ki hura.

²⁶O Abasalome ki vi: “I koro ma. Hoita, suria igo ko pe arâ me, go naka o Amanone o goaku ki arâ me.” Na maneraha ki hagatea, ki vi: “Suria i hega?”

²⁷O Abasalome ki ama ni togeaga nga, mataro me o Tavite ki nakara vê o Amanone ma o karena hato getera, ka râ henia o Abasalome. O Abasalome ki hagarêa na magotoha i marisina na maneraha.

²⁸Ngaia ki bonasira na kariana, ki vi: “Mu bâbâ. Matena o Amanone ki ruguhia na tonoha ma inê kê page bonasigamu, kê vivi ‘Nahuia’, hoi, mu nahuia ki meme. Siana kamu magu. Inê kanigê bonasigamu. Inê ma kanigê girara. Mu ramoramo. Siana kamu takotako herua.”

²⁹Hoi, na kariana o Abasalome ka kato vikana ma ka nahuia ki me o Amanone. Ngaira hato o karena getera o Tavite ka tagirira na tonki iata ma ka gava.

³⁰Matena ga arâ vê i tara tanga i pasita, o Tavite ki rongo, vi o karena ki nahu hunira hato o Abasalome. I mareha rârâ ta na hitangita vige tahi.

³¹Na maneraha ki aharaga, ki tarisigi na tuguni iana marena, suria i rugu na obana, ma ki ehu marena ki râ ki tâ i ano. Na kariana, ga oga i ngekana henia, ka tarisigi nogata na tuguni iata mareta.

³²Ma o Jonataba karena o Sima o veogana o Tavite ki vi: “Maneraha, i mareha vige nahuira hato o karemu, nga noga ma o Amanone ki me. O Abasalome ki bâ tanga vi nahuia ki meme o Amanone, suria i tuguria ka Tamare kesina ki rongo era henia.

³³Vikê siana ko tongesuria vi o karemu hato ka me. O Amanone ma hete kani me.”

³⁴I na matena ngekana o Abasalome ki bani gava. Hoita na mane ni me ni anumasiha ki parama ma ki bâsia râ na hakuta na enoni ga rerere me tenia i Goronaimi. Ngaia ki râ i pasina na maneraha ma ki hagarongoa renia.

³⁵O Jonataba ki vi tanga o Tavite, ki vi: “O karemu kaniga arâ me agana. Inê kê bani visia tangago.”

³⁶Matena i tamasi hato vikana, o karena o Tavite ka banu me. Ngaira ka haganega ka angi ma o Tavite ma na mane ni hagaotonga iana ka angi bâraha nogata.

³⁷O Abasalome ki gava ki râ i pasina o Talamai na maneraha i Gesure, o karena o Amigure, ma ki oga ngekana surigi na harisi gi oru. O Tavite ki hetaki arihu era renia o Amanone o karena.

³⁹Matena i hato na hetakiha iana renia o Amanone, ngaia ki obania bâraha vi bâsia nikâ o Abasalome o karena.