Read Kahua 2 SAMUELE 14 Bible Online

2 SAMUELE 14 - Kahua bible

2 SAMUELE 14

¹O Joaba ki bani girara, vi o Tavite ki angisia bâraha o Abasalome.

²Tahema ngaia ki kasia tamasinga tanga ta na gete i Tekoa, i takotako bâkoro, ki râ me. Matena na gete ki ata me, o Joaba ki vi tanga, ki vi: “Gu kato manga vi igo ko hetaki. Gu tuguni manga na gete i hetaki. Siana ko surasura bê. Go maramara gete i bani hetaki arihu me.

³Hemuri ko kahu arâ i pasina na maneraha ma ko visigi tanga na marâ gê visigi tangago.” Hoi, o Joaba ki visigi tanga na gete na marâ i page visigi.

⁴Na gete ki râ i pasina na maneraha, ki susure ki tube so iano, hanana i hagahigasia, ma ki vi: “Maneraha, gu tamaniê!”

⁵Na maneraha ki hagatea, ki vi: “Na ta ko obania?” Na gete ki arami, ki vi: “E, maneraha, inê ki na nâ gê matareha. O vaniaku ki bani me.

⁶Maneraha, inê kê nahunirerua o kareku gi rua. I ta na tangiana ngairerua karu oga i mu ma karu heariha. Ma ki mareha rârâ ta na enoni vige ura pusirerua heri. Tahema tani ki nahuhunia tani.

⁷Vikê maneraha, na goaku hato ka merongasiê ma ka obaniê, vigê tagarenia o kareku tangara, hanana vi ngaira ka nahuia ki meme baruna o vesina. Manga vi ngaira ma ka katokato vikana, inê kê page têtê tara renia. Ngaira ka obania viga hatungia na hagêguringa iaku ma ka obania viga hagamagahurua na raraha iana o vaniaku.”

⁸Na maneraha ki arami, ki vi: “Go aporo i pasimu. Inê ma kê girara.”

⁹Na gete ki vi: “Maneraha, henaka vi na ta ko katogi, ngaigi ki tâtâ i apemami igami, inê ma na ahemata iaku, mareha vi igo maneraha ma na ahemata iamu.”

¹⁰Na maneraha ki arami, ki vi: “Manga ta na enoni ma ki rapasigo, go torea me tangê, hanana ki asa vige page hagamarâ apemu nikâ.”

¹¹Na gete ki vi: “Maneraha, gu tohe renia na Araha God iamu, hanana vi siana na goaku i tâ i apena vi marabarua o kareku, ki nahuia ki meme o kareku na ani i tahitahi mênga, suria na tarana ngekana ki erataga ngavê.” O Tavite ki arami, ki vi: “Inê kê tohe renia na Araha mamauri, vi ngaia ki bara vige rapasia rârâ o karemu.”

¹²Na gete ki vi: “Maneraha, gu nakê be tamasi hagetage râ nikâ.” Na maneraha ki arami, ki vi: “I koro ma.”

¹³Na gete ki hagatea, ki vi: “Tanu hega ko katoa na eraha ngekana tangara na kariana God? Suria go tamasi vikana, igo ko tugurigo so maremu, suria igo ko pe obania vi o karemu maremu ke aporo me tenia na hinua go paia tanga.

¹⁴Igia hato ka page meme. Igia ka manga na ve ga karangigia so i ano. I asa vige page apea aporo nikâ. God ki pe hagamaurira aporo nikâ na enoni ga me. Ma igo, maneraha, igo ko girara, go katoa ta na tarana, hanana go hagaporosia na mane tenia na agua ga paia tanga.

¹⁵Hoi, maneraha, inê kê râ me kê tamasi tangago, suria na enoni ka rapasiê. Inê kê tako i obaku, vige tamasi tangago, suria gê tako togo, vi igo ko page katoa na tarana, gê nungigo renia.

¹⁶Inê kê tako togo, vi igo ko page aganariê ma ko page hagatahiê tenia na mane, i obania vi nahunahu hunigamirua o kareku menê, hanana i hagamagahurugamirua tenia na agua, God ki bani haganahunira na kariana renia.

¹⁷Maneraha, inê kê takusia mareku, vi na tohenga iamu ki katoê kê apeape tatara, suria na maneraha ki manga na angero iana God, i girara na ta ki koro ma na ta ki era. Na Araha God iamu ke ngahisigo!”

¹⁸Na maneraha ki arami, ki vi: “Hoi, be hagatego ma ko aramiê igê na monariha.” Na gete ki arami, ki vi: “Maneraha, na ani mavê na hagatenga ki koro ma.”

¹⁹Na maneraha ki hagatea, ki vi: “I hega, o Joaba kani hagatorago me vikê vari?” Na gete ki arami, ki vi: “Maneraha, inê kê tohe vi inê kê aramia nga na hagatenga igê na monariha, ma ki asa vi be nakanaka ririhu. I monari, o Joaba na mane i bêngenira na me iamu, kani hagatorê kê kato ma kê tamasi vikana.

²⁰Ngaia ki kato vikana, hanana i hagaotoa na berarogamurua. Maneraha, igo ko tako mataha manga na angero iana God ma ko rongogiraragi na marâ hato ga vora me.”

²¹Hemuri na maneraha ki vi tanga o Joaba, ki vi: “Hoi, inê be katoa na marâ go obania. Go arâ ma ko torea aporo me o kareku o Abasalome.”

²²O Joaba ki susure ma ki tube so i ano i maana o Tavite ki hagahigasia ma ki vi: “Maneraha, God ke korokoro tangago. Hoi, i ngekê inê kê kahu girara, vi igo ko obakoro reniê, suria igo ko aganaria na obaniha iaku.”

²³O Joaba ki aharaga ma ki râ i Gesure ma ki meaporo me o Abasalome i Jerusaleme.

²⁴Ma na maneraha ki haribona, vi siana o Abasalome ki gâga i ruma raha. Na maneraha ki vi: “Inê kê pe pasi bâsia.” Tahema o Abasalome ki oga tonge so i ruma iana marena ma ki pe rârâ i pasina na maneraha.

²⁵I mareha rârâ ta na Isiraelita, vige bâkoro manga o Abasalome. Ngaia ki bâkoro tongatongani na apena hagenani.

²⁶Na varehuna ki gagahi. Ngaia ki tapuru bê hagetage igê na ara ni harisi, matena i borahu ngavê na varehuna ma ki higahiga. Na higahigani na varehu ga retegi râ ki higa teharia na kilo gi rua, manga bani hanana ga hagararingenigi na higahigata ngekana i na matena ngekana.

²⁷O Abasalome ki nahunira o karena gi oru ma ka karena gi tage. Ngaia kani ka Tamare. Ngaia ki na gete i bâkoro ngavê.

²⁸O Abasalome ki oga i Jerusaleme ma ki pe bâsia rârâ na maneraha surigi na harisi gi rua.

²⁹Hato na harisi gi rua, ngaia ki unia me o Joaba, hanana i torea na tamasinga iana tanga na maneraha. Ma o Joaba ki usi vige râ me. O Abasalome ki unia me nikâ ma o Joaba ki usi nikâ.

³⁰Vikê o Abasalome ki vi tangara na kariana, ki vi: “Bâ, na mu iana o Joaba ki oga i na apaneku râ. Ngaia ki na mu ni koni. Mu râ kamu sungia.” Vikana ngaira ka râ ma ka sungia.

³¹O Joaba ki râ i ruma iana o Abasalome ma ki hagatea, ki vi: “Tanu hega na kariamu ka sungia na mu iaku?”

³²O Abasalome ki arami, ki vi: “Suria gu usi vigu râ me, matena gê unigo. Inê kê obanigo, vigo arâ ko bâsia na maneraha, ma ko tamasi suriê, ko vivi: ‘Tanu hega gê pania i Gesure kê râ me ikê? Na ogaha iaku i ngekana ki koro teharia ikê.’ Hoita, i ngekê inê kê obanigo, vigu girara tangê be râ be bâsia na maneraha. Manga inê ma kê aharê, i koro ma i nahuiê kê meme.”

³³Hoi, o Joaba ki râ ki bâsia na maneraha o Tavite ma ki hagatarêngenigi tanga na tamasinga iana o Abasalome. Na maneraha ki unia me o Abasalome. O Abasalome ki râ ma ki susure ki tube so i ano i maana na maneraha. Na maneraha ki siginia.