Read Kahua 2 SAMUELE 15 Bible Online

2 SAMUELE 15 - Kahua bible

2 SAMUELE 15

¹I murina ngekana o Abasalome ki tora tanga marena na kati ni me henira na hosi ma na mane ni anumasiha tangahuru gi rima.

²I na ara ni mahogotani ngaia ki rêrâ igê na teha na maani para ni hinua. I na ara ni mateni ta na enoni ki arâ me ki bâsia na maneraha renia na hagatamasinga, o Abasalome ki unia me ngaia, ma ki hagatea, ki vi: “Goaku, i pasimu i he?” Matena na enoni ki visigi hato na hinua iana ma na varo ninuni iana,

³o Abasalome ki vivi: “Bâ, henaka na ramata ki tamanigo, ma ki mareha rârâ ta na mane ni hagaotonga iana na maneraha, vige hagaotoa maninga na hagatamasinga iamu.

⁴Hoi, manga vi inê ma be mane ni hagaotonga, vikê manga na enoni ma ki arâ me i pasiku, suria vi na hetamasiana iana se vi na pusiana, hoi, inê kê hagaotoa tanga.”

⁵Manga vi na enoni ma ki tarahua o Abasalome ma ki susure ki hagahigasia, o Abasalome ki tagara râ, ki ruia me ma ki siginia.

⁶O Abasalome ki katora vikana na Isiraelita hato, ga râ i pasina na maneraha, hanana vi hagaotora. Vikana o Abasalome ki katora na enoni ka pane henia.

⁷I murina na harisi ge he o Abasalome ki vi tanga o Tavite, ki vi: “Maneraha, gu nakê be râ i Heberone, hanana ve hagamonaria igê na suruha iaku tanga na Araha.

⁸Matena gê oga i Gesure i Siria, inê kê bani suru tanga na Araha, vi inê kê page vogasia i Heberone, manga vi ngaia ma ki nakê kê aporo me i Jerusaleme.”

⁹Na maneraha ki vi: “I koro ma go arâ. Na Araha ke ngahisigo.” Vikê o Abasalome ki râ tanga i Heberone.

¹⁰Ma ngaia ki kasira na mane tora tamasinga tangara na varo ninuni hato iana o Isiraele, ka vi: “Matena mu rongogi na ahuri, mu ngerengere, kamu vivi, ‘O Abasalome ki maneraha i Heberone!’”

¹¹Na tangarê gi rua na mane ka bani takua o Abasalome tenia i Jerusaleme, suria i nungira. Ngaira ka tako makira renia na harikatoha iana o Abasalome. Ngaira ka ata ni râ mavê.

¹²Matena o Abasalome ki vogasia na Araha, ngaia ki kasi tamasinga nikâ tanga o Agitopele i hinua i Gilo, ki râ me. O Agitopele ki na hitangita na mane ni hagaotonga iana na maneraha o Tavite. Na harikatoha renia na maneraha ki râ raha ngavê, ma na enoni, ga pane henia o Abasalome, ka ama ni rakorako nga.

¹³Ta na mane tora tamasinga ki hagarongoa o Tavite, ki vi: “Na Isiraelita ka tohe, viga panepane henia o Abasalome.”

¹⁴Vikê o Tavite ki vi tangara na gavumane hato iana, ga oga henia i Jerusaleme, ki vi: “Manga vi igia ma ka obania viga tahitahi tenia o Abasalome, hoi, ga gavagava ototo râ nga. Garigari! Manga i mareha, ngaia ki page sugi taharigia ma ki teharigia ma ki mutegia hato i hinua!”

¹⁵Ngaira ka arami, ka vi: “Hoita, maneraha! Igami kami nanê!”

¹⁶Vikê na maneraha ki meragava na ahemata hato iana ma na gavumane hato iana, nga noga ma na tangahuru gi tage na gete râ ma iana. Ngaia ki panira so, hanana ga bâsuria na ruma raha iana.

¹⁷Matena na maneraha ma na enoni hato ka takua, ka pania na hinua, ngaira ka ura so i avorana na ruma matakere.

¹⁸Na gavumane hato iana ka ura râ henia, matena na mane ni me ni anumasiha iana ka teha ka nanago tarana. Ka râ me ka teha nikâ na tangarê ge ono na mane ni me ni Gate, ga bani hakunia me.

¹⁹Na maneraha ki vi tanga o Itai, i bêngenira na me ngegana, ki vi: “Tanu hega go takugami? Gu aporo ma ku oga henia na maneraha haoru. Na mahuara kanigo. Igo ko gava me tenia na agua iamu.

²⁰Igo ko kahu râ ma me. Inê kê pe obanigo, vigu arârâ heniê. Inê kê ata ni arârâ mavê vikê. Gu aporo ma ku meraaporo na me iamu. Na Araha ke korokoro ma ke ngahisigo tare.”

²¹O Itai ki arami, ki vi: “Maneraha, inê kê tohe tangago renia na atana na Araha, vi inê kê takugo tare igê na ara ni agua mavê, go arâ igê, naka ma gê meme.”

²²O Tavite ki arami, ki vi: “I koro era! Nika, tavo uga!” Vikê o Itai ma na me hato iana henira na gete iata ma na kareta ka tavoraha.

²³Na enoni ka angiangi raha, matena o Tavite ma na me iana ka tavoraha. Na maneraha ma na me iana ka tarêhia na ve i Kiteroni ma ka togo tanga na bagamasusu raha.

²⁴O Satoke na mane ni vogasiha ki oga i ngekana henira na mane ni hagarahenga, ga tugia na bokesi apuna na suruheri. Ngaira ka naka so ma ka pe ragea akê rârâ, mataro me na enoni hato ka bani pania na hinua. O Abiatare na mane ni vogasiha ki oga i ngekana nikâ.

²⁵O Tavite ki vi tanga o Satoke, ki vi: “Meaporo i hinua na bokesi na suruheri. Manga na Araha ma ki obakoro reniê, ngaia ki page nakê kê aporo i ta na tangiana, hanana gê bâsia igê na atohana.

²⁶Ma ki manga vi ngaia ma ki pe obakoro reniê, hoi, i koro ma, ngaia ma kani girara tangê.

²⁷Bâ Satoke, gu mererârua o karemu o Agimasi ma o Jonatane o karena o Abiatare, ma ko mererârua aporo haritagi i hinua.

²⁸Inê kê page gâga igê na bagamasusu raha i na apanena tare na ve, ma kê page naasia igê na rongoha tenigo.”

²⁹Vikê o Satoke ma o Abiatare karu meaporo i Jerusaleme na bokesi na suruheri ma karu oga i ngekana.

³⁰O Tavite ki angi ki tagere igê na hungana ni Olive. Ngaia ki râ renigi na êgana gonari, ma ki buhigi na maana, suria i hataera na obana. Na enoni hato ga takua ka buhigi na maata ma ka angiangi nogata.

³¹Matena o Tavite ki rongo, vi o Agitopele ki bani banu igê na harikatoha iana o Abasalome, ngaia ki avarasia na Araha, ki vi: “Araha, gu pariria na hagaotonga iana o Agitopele ke râ bekabekaga.”

³²Matena o Tavite ki hura akê igê na hungana igê na agua ni vogasiha, o Gusai ni Atarote ki râ vurusia. O Gusai ki na kariana koro, i hagêguritogo renia. Na gahu iana ka taritarisiga ma ki kuhuia na bêna.

³³O Tavite ki vi tanga, ki vi: “Manga go arâ me heniê, igo ki asa vigu tamaniê.

³⁴Ma igo ko girara go tamaniê, manga vigo aporo i hinua ma ko vi tanga o Abasalome, vi igo ko tototo suria tagenana manga go toto suria o vaemana. Go rêra pusigi nga na ani mavê na hagaotonga iana o Agitopele tanga.

³⁵Ngairerua o Satoke ma o Abiatare na mane ni vogasiha karu page gâga nikâ i ngekana. Go hagarongorerua renigi na ara ni marâ go rongogi i ruma iana na maneraha.

³⁶O Jonatane mo Agimasi na kareterua hegitigi karu oga henirerua. Go girara go hagatorangenirerua me henigi na rongoha hato go tavogi.”

³⁷Vikê o Gusai, na kariana koro o Tavite, ki aporo i hinua igê nga na matena i ata igê o Abasalome.