Read Kahua 2 SAMUELE 16 Bible Online

2 SAMUELE 16 - Kahua bible

2 SAMUELE 16

¹Matena o Tavite ki hura vê sisite igê na bêni tara na hungana, ngaia ki parama ma ki mehetarahu o Siba, na kariana o Mepiboseti. Ngaia ki ururerua me na tonki gi rua, garu toregi na tangarê gi rua na guani na bereti, na tangarê gi tage na parani na guani na vaini ma na tangarê gi tage na hunguni na apinige ni ngauha, ma na anga na gavona na puruka i vunu renia na vaini.

²Na maneraha o Tavite ki hagatea, ki vi: “Na marâ hato tanga na ta ngegana?” O Siba ki arami, ki vi: “Na tonki gi rua tanga na ahemata iamu, ga tagetage igê. Na guani na apinige ka na ngêra tangara na me iamu, ma na vaini kani tangara ga totono, matena i meme na apeta igê na bagamasusu raha.”

³Na maneraha ki hagatea, ki vi: “O Mepiboseti o vesina na maneraha iamu o Saulo kani i he?” O Siba ki arami, ki vi: “Ngaia ki gâga i Jerusaleme, suria ngaia ki takusia, vi na Isiraelita ka page kasia ki maneraha urusia o Saulo o virana.”

⁴Na maneraha ki vi tanga o Siba, ki vi: “Vikana na ara ni nahuninga iana o Mepiboseti ka na animu.” O Siba ki arami, ki vi: “Igo ma, maneraha. Inê na kariamu. God ke nakê be hagakoro obamu tare.”

⁵Matena o Tavite ki ata râ i Bagurimi, o Simi ta na goana o Saulo ki râ me vurusia. Ngaia ki no karena o Gera. O Simi ki vi berasia o Tavite, matena i râ me.

⁶Ngaia ki haganega ki rangora o Tavite ma na gavumane iana renigi na hê, naka ma na me ma na mane ni me ni anumasiha ka ura rihia o Tavite.

⁷O Simi ki vi hagabekasia, ki vi: “Gu râ! Gu râ! Mane nahu enoni kanigo! Eragani nuni kanigo!

⁸Igo ko rêa na arahanga tenia o Saulo. I ngekê nga na Araha ki hagaitangigo, suria go nahuira rako igê na ahemata iana o Saulo. Na Araha ki bani kasia o karemu o Abasalome ki maneraha urusigo. Igo na mane nahu enoni ko hato!”

⁹O Abisai karena ka Seruia ki vi tanga na maneraha, ki vi: “Maneraha, tanu hega ko naka na o akana ki tamasi berasigo? Gu nakê be râ be retenguria na riona.”

¹⁰Na maneraha ki vi tangarerua o karena ka Seruia o Abisai ma o Joaba, ki vi: “I mareha vi na tagaraniha iamurua igamuru nge. Manga vi ngaia ma ki tamasi berasiê, suria vi na Araha ki hagatora vikana, ti kani girara i hagatea vi tanu hega?”

¹¹O Tavite ki vi tangara o Abisai ma na mane ni hagaotongo hato iana, ki vi: “O kareku mareku kani uhungia vi nahuiê kê meme. Ma ki tanu hega mu konekone renia na tauhana na raraha iana o Benamino ngekê? Na Araha kani hagatora ki tamasi berasiê vikana. Mu naka ma! Mu naka ma vê!

¹²Vari na Araha ki page takuiê igê na mamasiganiha iaku, ma ki page urusia na tamasinga erasiê renigi na koroha.”

¹³Vikê o Tavite ma na me iana ka râ nga. O Simi ki râ henira ki niha igê na tarihana na hungana. Ngaia ki ama ni guhaguha nga ma ki rangora hato renigi na hê ma na mako.

¹⁴Na maneraha ma na me hato iana ki me ngavê na apeta, matena ga ata râ i Jotano ma ka mamaro igê.

¹⁵O Abasalome henira na Isiraelita hato, ga pane henia, ka banu i Jerusaleme. O Agitopele ki oga i berarogata.

¹⁶Matena o Gusai, na mane koro o Tavite ki hagêguritogo renia, ki mehetarahu o Abasalome, ngaia ki ngere, ki vi: “Ge mêri arihu na maneraha! Ge mêri arihu na maneraha!”

¹⁷O Abasalome ki hagatea, ki vi: “I hega, igo vari ki hato vigu kariana koro o Tavite? Tanu hega go pe takua?”

¹⁸O Gusai ki arami, ki vi: “Tanu hega kanigê girara vigê takua? Inê kê pane henia na ani na Araha i atea ma na enoni ngegê nogata ma na Isiraelita hato nogata. Inê be oga henigo.

¹⁹Ti nikâ kanigê girara vigê kahu tagara tanga? Nga noga ma o karena na maneraha iaku! Tagenana manga gê toto suria o vaemamu, hoi, i ngekê inê be toto surigo nga nogamu.”

²⁰Hoi, o Abasalome ki aharia o Agitopele ma ki hagatea, ki vi: “Hoi, igia ikê i ngekê! Na hagaotonga ta ko naka tangagami?”

²¹O Agitopele ki arami, ki vi: “O vaemamu ki panira so kaniana râ ma, hanana ga bâbâsuria na ruma raha iana. Go arâ ma ko meramêru. Vikana na Isiraelita ka page girara, vi o vaemamu ki vi, vi igo ka na merongana. Na tarana ngekana ki page hagaramonira na enoni ga pane henigo.”

²²Vikê ngaira ka hagêrasia na ruma na gahu tanga o Abasalome igê na gerina aberabera na ruma raha, ma o Abasalome ki banu igê i maata na enoni hato ma ki meramêru kaniana râ ma o vaemana.

²³Na anima na hagaotonga iana o Agitopele surigi na mateni ngegana na enoni hato ka takusigi, vi ngaigi ka na tamasinga monari iana God. Ngairerua o Tavite mo Abasalome karu râ surigi nogaterua.