Read Kahua 2 SAMUELE 17 Bible Online

2 SAMUELE 17 - Kahua bible

2 SAMUELE 17

¹I murina ma ngekana ma o Agitopele ki vi tanga o Abasalome, ki vi: “Gu nakê be atera na 12,000 na mane ni me ma i rikini bungi inê be tarigenia o Tavite.

²Inê be taharia, matena i meme na apena ma ki hagêguri era. Ngaia ki page magu ma na me hato iana ka page gavagava. Inê be nahuia ma na maneraha ke me.

³Ma hemuri be meraaporo me na mane ni me hato iana tangago, manga na gete i êragi haoru i aporo tanga o vaniana. Igo ko obania, vigo nahuia ki meme na mane gi tage ma. Na enoni hato getera ka page gâga aporo igê na marapeha.”

⁴O Abasalome ma na meraha hato iata na Isiraelita ka takusia, vi na hagaotonga ngekê ki koro.

⁵O Abasalome ki vi: “Hoi, unia me o Gusai, hanana ge rongoa na takoha iana.”

⁶Matena i ata me o Gusai, o Abasalome ki vi tanga, ki vi: “O Agitopele ki naka na hagaotonga tangagami. I hega mi arâ suria se mareha? Manga i mareha, gu vi tangagami renia vi na ta kani vigami katoa.”

⁷O Gusai ki arami, ki vi: “Na ani ngekê na hagaotonga iana o Agitopele tangagamu ki pe koro.

⁸Igo ko bani girara, vi o vaemamu o Tavite ma na mane ni me iana ka na mane ni me ramo. Ngaira ka ramo manga na o vasiga ga torera na karena tenia. O vaemamu ki manisingenia ngavê na hearihatana ma ki page gâga so igê na bungiana henira na mane ni me iana.

⁹I ngekê vari ngaia ki ahi igê na vaba se i tagua. Matena o Tavite ki taharira na mane ni me iamu, na enoni ga rongorongo tarohana ngaira ka page vivi ototo râ nga, vi na mane ni me iamu ka so renia.

¹⁰Vikana, naka ma na mane ni me ramo ngavê mangara na laione, ngaira ka page magu, suria na enoni hato i Isiraele ka girara, vi o vaemamu ki manisingenia ngavê na hearihatana ma na mane ni me iana ka ramo ngavê.

¹¹Hoi, na takoha iaku ki manga ikê: Gu hakura me na mane ni me hato i Isiraele hagenani, ka rakorako mangagi na one i one, ma ko bêngenira igo maremu tanga na hearihatana.

¹²Igia ka page tarahua o Tavite igê na agua mavê i gâga igê, ma ko page hagakangia ko taharia. Ngaia ma na mane ni me hato iana ka page mute hato.

¹³Manga vi ngaia ma ki sugasuga bê aporo i rarona na hinua, na me hato iaka ka page migirâ me na varo ma ka page okea vato na hinua hagenani tanga na maruguna. I mareha rârâ na kere hê gi tage, vige page hita so igê na hungana.”

¹⁴O Abasalome ma na meraha hato iata na Isiraelita ka vi: “Na takoha iana o Gusai ki koro teharia na anina o Agitopele.” Na Araha ki katora, siana ka arâ suria na katoha iana o Agitopele, hanana na bagabevoani ka tarahua o Abasalome.

¹⁵Hemuri o Gusai ki hagarongorerua o Satoke ma o Abiatare na mane ni vogasiha renia na takoha, i vatea tangara o Abasalome ma na meraha iata na Isiraelita ma nikâ renia na takoha iana o Agitopele tangara.

¹⁶Ma o Gusai ki vi nikâ: “Garigari! Kasia na rongoha tanga o Tavite, vi siana ki mauru so igê na tara tarê na ve igê na masusu. Ma ki tarêhia ototo râ nga hete na ve i Jotano, hanana ngaia ma na mane ni me hato iana siana ka mutemute.”

¹⁷O Jonatane karena o Abiatare ma o Agimasi karena o Satoke karu oga hekarigi igê na ve banga i Rogele i murina hura i Jerusaleme. Ngairerua karu pe banu i rarona na hinua, suria i era ma na enoni ka bâsirerua. Na kere gete tagara ki arâ tare ki hagarongorerua renigi na rongoha, hanana vi ngairerua karu arâ ma karu hagarongoa na maneraha o Tavite renia.

¹⁸Ma i ta na tangiana ta na kere mane ki bâsirerua ma ki hagarongoa o Abasalome renirerua. Vikê ngairerua karu tango râ karu ahi igê na ruma iana na mane i Bagurimi. Ngaia ki nahunia na vekaru hagarangia na ruma iana ma ngairerua karu vato igê.

¹⁹Na gete iana na mane ngekana ki buhia na maana na vekaru ma ki tokorenigi na maani na koni igê, hanana vi siana ta na enoni ki bâbâgirara.

²⁰Na me iana o Abasalome ka râ me tanga na ruma ma ka hagatea na gete, ka vi: “O Agimasi ma o Jonatane i he?” Na gete ki arami, ki vi: “Ngairerua karu reke tarê i ve.” Na me ka aporo baguru i Jerusaleme, suria ga pe tarahurerua.

²¹Matena na me ka aharo vê ka râ, o Agimasi ma o Jonatane karu akê me tenia na vekaru, ma karu râ karu hagarongoa na maneraha o Tavite. Ngairerua karu hagarongoa renia na harikatoha iana o Agitopele renia. Ngairerua karu vi: “Garigari! Tarêhia na ve!”

²²Vikê o Tavite ma na me iana ka tarêhia nga na ve i Jotano. Ngaira hato ka bani hato tarê matena i tangi me.

²³Matena o Agitopele ki tahetara, vi ngaira ka pe aganaria na takoha iana, ngaia ki naka na âgâga i gerina na tonki iana ma ki tagiria ki aporo i pasina i Gilo. Ngaia ki hagaotogi noga na marâ ga tuguhia vi tanugi, ma ki kahu rigo. Ngaia ka bagia igê na matahu iata na ahemata iana.

²⁴Matena o Abasalome ma na mane ni me na Isiraelita ka bani tarêhia na ve i Jotano, o Tavite ki bani ata râ igê na hinua i Maganaimi.

²⁵O Abasalome ki bani kasia o Amasa ki urusia o Joaba ki bêngenira na mane ni me. O Amasa ki no karena o Jitero na Isimailita. Kenana kani ka Abigaile, ka karena o Nagasa ma kesina ka Seruia, kenana o Joaba.

²⁶O Abasalome ma na me iana ka tênga igê na apanena i Gileata.

²⁷Matena o Tavite ki ata râ i Maganaimi, o Sobi karena o Nagasa ni Raba i Amone ma o Makire o karena o Amaliele ni Lotebare ma o Barasilai ni Rogelimi i Gileata, ngaira ka mehetarahu.

²⁸Ngaira ka migirâ me na apira, na pi na hê ma na bana tangara o Tavite ma na me iana henigi na ngêra: na ani mavê na koni ma na pini, na pirui, na poponi na suru na susu ma tani na sipi ma na kere puruka nikâ. Ngaira ka bani girara, vi o Tavite ma na me iana ka magê, ka pasi tono ma ki me na apeta igê na bagamasusu raha.