Read Kahua 2 SAMUELE 18 Bible Online

2 SAMUELE 18 - Kahua bible

2 SAMUELE 18

¹Na maneraha o Tavite ki hagahakura na mane ni me hato iana. Ngaia ki voasira ka vora na apanini me hehigitigi. Tani na apanini me ka rehagaro ma tani ka tangarê. Ngaia ki kasira na me ka bêngenira.

²Ngaia ki votora tonganira o Joaba, o Abisai o vesina o Joaba ma o Itai ni Gate, hanana ga bêngenira hegitigi. Na maneraha ki hagatorangenira ma ki vi tangara na mane ni me iana, ki vi: “Inê mareku be râ henigamu.”

³Ngaira ka arami, ka vi: “E, siana! Tangara na merongaka ki tagenana ma igami hato kami gavagava se ga mutemute na ara ni ruata na hitangimami, suria ngaira ka rapasigo igo. Naka ma igami kami 10,000, igami ka na marâ purua ma tangara. I ararigo vigo gâga so hete ikê i hinua ma ko katoa me tangagami na hetamaniha tenia ikê.”

⁴Na maneraha ki arami, ki vi: “Inê kê page katoa na tarana ta kê takusia vi i koro.” Hoi, ngaia ki ura i na akerena na maani para, matena na mane ni me iana ka tavo uga hura surigi na apanini me hehigitigi na rehagaro ma na tangarê.

⁵Ngaia ki bonasira o Joaba, o Abisai ma o Itai, ki vi: “Mu takuiê. Siana kamu nahuia o kareku o Abasalome.” Na mane ni me hato ka rongoa o Tavite i bonasira vikana na me iana, gâ bêngenira na mane ni me.

⁶Na mane ni me iana o Tavite ka râ igê na bena ma ka meraheariha na Isiraelita igê na vapuna i Eparaimi.

⁷Na Isiraelita ka so renira na me iana o Tavite. Ngaira ka so ngavê. Na 20,000 ka me igê na tangiana ngekana.

⁸Na hearihatana ki râhia na apanena hagenani i ngekana. Na ani ga me igê na vapuna ka rako teharira na ani ga me igê na hearihatana.

⁹O Abasalome ki parama ma ki meraheariha tani na mane ni me iana o Tavite. O Abasalome ki tagiria na tonki. Matena na tonki ki sirugu igê na apinige raha i arubebe so i ano, na bêna o Abasalome ki tu igê na arani. Na tonki ki tango vê ki râ, ma o Abasalome ki kuku tare so i bevoa.

¹⁰Na hitangita na mane ni me iana o Tavite ki bâsia ma ki hagarongoa o Joaba renia, ki vi: “Inê kê bâsia o Abasalome i kuku igê na apinige raha!”

¹¹O Joaba ki arami, ki vi: “Manga go bâsia, ma ki tanu hega kanigo pe nahuia ke me ototo râ nga i ngekana? Vikê inê be vatego na maani na siliva tangahuru gi tage ma na hogosina.”

¹²Ma na mane ni me ki arami, ki vi: “Henaka gu vateê na rehagaro na maani na siliva, i asa iaku hagetage vi ve erasia râ hagamamana o karena na maneraha. Igami hato kami bani rongoa na maneraha i bonasigamu, igo mo Abisai ma o Itai, ki vi: “Mu takuiê. Siana kamu nahuia o kareku o Abasalome.

¹³Manga ve haritohea na maneraha ma be nahuia ke me o Abasalome, na maneraha ke page rongoa, suria ngaia ki rongogi na ara ni rongoha, ma igo, ki asa iamu vigu rohe pusiê.”

¹⁴O Joaba ki vi: “Ti ki pasi megohetuguri?” Ngaia ki tahuragi na ora gi oru ma ki ahura na matona o Abasalome renigi, i mauri mênga i kuku igê na apinige.

¹⁵Na tangahuru gi tage na mane ni me iana o Joaba ka ura me ma ka hagamakoa ki me.

¹⁶O Joaba ki uhia na ahuri, hanana na mane ni me iana ka naka vê na hearihatana. Na me iana ka aporo tenira na Isiraelita ma ka pe tarigenira.

¹⁷Ngaira ka torea na gahuana o Abasalome, ka kasia vato igê na kokoro i bemu, ka ahunia ma ka tete huria na hê i page ki akê. Na Isiraelita ka gava tangagi na hinua iata hegitigi.

¹⁸Matena o Abasalome ki tahitahi mênga, ngaia ki tagarahia na girarana marena igê na maruguna Maneraha, suria ngaia ki pe tonga o karena, hanana vige hagaborahusia na atana. Tahema ngaia ki hêtana renia marena, ma ki tariha me i ngekê na enoni ka visia vi Girarana o Abasalome.

¹⁹Hemuri o Agimasi karena o Satoke ki vi tanga o Joaba, ki vi: “Gu nakê be tango râ i pasina na maneraha ma be hagarongoa renia na rongoha koro, vi na Araha ki hagatahia tenira na merongana.”

²⁰O Joaba ki arami, ki vi: “Mareha! I ngekê ki mareha vigu metango râ na rongoha koro. I ta na tangiana vari hete, ma ki mareha vi i ngekê, suria o karena na maneraha ki me.”

²¹Vikê ngaia ki vi tanga na kare rakuraku iana ni Sutane, ki vi: “Go arâ ma ko hagarongoa na maneraha renia na marâ go bani bâsia.” Na kare rakuraku ki tube so ma ki tango vê ki râ.

²²O Agimasi ki togeaga, ki vi: “Henaka i manga ngekana, gu nakê be merâ nogaku na rongoha.” O Joaba ki hagatea, ki vi: “Kareku, tanu hega kanigo obania vikana? Igo ki asa vigu nahunia ta na tarana koro igê.”

²³O Agimasi ki vi nikâ: “Naka ma i manga ngekana, inê kê obania nga vigê arâ. O Joaba ki arami, ki vi: “Manga ngekana, hoita, gu râ.” Vikê o Agimasi ki tango vê ki râ suria na tara igê na maruguna i Jotano, ki page arihu ma ngaia ki ritare tenia na kare rakuraku.

²⁴O Tavite ki oga so igê na tarâto i berarogaterua na maani para ni hinua. Na mane ni anumasiha ki tagere kê igê na para ma ki ura igê na gerina na tarâto na maani para. Ngaia ki bâ ma ki bâsia râ na mane i tango ki arâ me getea.

²⁵Ngaia ki ngere vato ki hagarongoa na maneraha. Na maneraha ki vi: “Manga vi getegetea, ngaia ki merâ me na rongoha koro.” Na mane ki tango me. Ngaia ki ama ni hagahagarangi me nga.

²⁶Hemuri na mane ni anumasiha ki bâsia râ nikâ ta na mane i tango ki arâ me getea nogana. Ngaia ki ngere vato tanga na mane i bâsuria na maani para, ki vi: “Bâ, ta na mane nikâ ki tango ki arâ me akana!” Na maneraha ki arami, ki vi: “Na ani ngekê ki merâ me nogana na rongoha koro.”

²⁷Na mane ni anumasiha ki vi: “Na mane i hagenago me ki bâ manga o Agimasi.” Na maneraha ki vi: “Na mane koro ngekana. Ngaia ki merâ me na rongoha koro.”

²⁸O Agimasi ki ngere me tanga na maneraha, ki vi: “Na ara ni marâ ka koro ma!” Ngaia ki susure ki tube so i ano i maana na maneraha, ma ki vi: “Maneraha, gu hagarahasia na Araha God iamu, suria i katogo ko teharira na me ga merongasigo.”

²⁹Na maneraha ki hagatea, ki vi: “I hega, o kareku o Abasalome ki oga bâkoro ma?” O Agimasi ki arami, ki vi: “Maneraha, matena o Joaba i bêngenira na mane ni me iamu ki hagatorangeniê me, inê kê bâsira na me ga heasiasi, ma kê pe girara vi na ta ngekana.”

³⁰Na maneraha ki bonasia, ki vi: “Gu ura so ikana.” Ngaia ki râ ma ki ura i ngekana.

³¹Hoi, na kare rakuraku ni Sutane ki ata nogana, ma ki vi tanga na maneraha, ki vi: “Maneraha, inê kê merâ me na rongoha koro tangago. I ngekê na Araha ki katogo, ko teharira na me hato ga merongasigo.”

³²Na maneraha ki hagatea, ki vi: “O kareku o Abasalome ki oga bâkoro ma?” Na mane rakuraku ki arami, ki vi: “Maneraha, na tarana i tarahua, ke tarahura nogata na merongamu hato ma na me hato ga merongasigo.”

³³Na maneraha ki hetaki ngavê. Ngaia ki tagere ki banu igê na kiboru i avorana na tarâto na maani para ma ki angi igê. Ngaia ki angi gogogo ki tagere, ki vi: “E, o kareku! O kareku o Abasalome! O Abasalome o kareku! Manga vi inê ma be me urusigo hete o kareku! O Abasalome! O kareku!