Read Kahua 2 SAMUELE 19 Bible Online

2 SAMUELE 19 - Kahua bible

2 SAMUELE 19

¹O Joaba ki rongo, vi na maneraha o Tavite ki angi maramara renia o Abasalome.

²Vikana na vagevageha iata na mane ni me iana o Tavite vi ngaira ka teha, ki ahoro igê na hetakiha igê na tangiana ngekana, suria ngaira ka rongo, vi na maneraha ki angi maramara renia o karena.

³Ngaira ka aporo munimuni banu i hinua, mangara na mane ni me ga maki, suria ga gavatenia na hearihatana.

⁴Na maneraha ki buhigi na maana ma ki angi raha, ki vi: “E, o kareku! O kareku o Abasalome! O Abasalome o kareku!”

⁵O Joaba ki banu i ruma iana na maneraha ma ki vi tanga, ki vi: “Igo ko hagamakira na mane ni me iamu i ngekê, na me ga hagatahigamu, igo ma o karemu ma ka karemu, ma ngaira kaniamu ma ngaira na gete râ ma iamu.

⁶Igo ko panira na ani ga takuigo ma ko pane henira na ani ga merongasigo. Ngaia ki mataha, vi na mane ga bêngenira na mane ni me iamu ma na me iamu ka na marâ purua ma tangago. I bâ manga vi igo ko obakoro ngavê, manga vige tahi o Abasalome ma igami hato kami me!

⁷Hoi, gu hura ma ku hagaramonira na mane ni me iamu. Inê kê tohe renia na atana na Araha, manga vi igo ma ko usisi, ngaira hatohato ka page arâ panigo i rikini bungi. Na tarana ngekana ki page erataga ngavê tangago, i pe tarahugo noga igê na ogaha hagenani iamu.”

⁸Vikê na maneraha ki aharaga, ki hura ma ki oga so hagarangia na manipara ni hinua. Na me iana ka rongo, vi ngaia ki oga i ngekana ma ngaira hato ka haku me i pasina. Hoita na Isiraelita hato ka bani gava tangagi na hinua iata hegitigi.

⁹Na enoni hato suria na agua hagenani ka hevoavoa so mareta, ka hetamatamasi ka vi: “Na maneraha o Tavite ki hagatahigia tenira na merongaka. Ngaia ki hagatahigia tenira na Pilisitina. Ma i ngekê ngaia ki bani gavatenia o Abasalome ma ki pania na agua.

¹⁰Igia ka bani monea o Abasalome ki vora na maneraha iaka ma ngaia ki bani me igê na hearihatana. Tanu hega igia ka pe uhungia ke torea aporo me na maneraha o Tavite?”

¹¹Na tamasinga iata na Isiraelita ki tarahua na maneraha o Tavite. Vikê ngaia ki hagatorangenirerua o Satoke ma o Abiatare na mane ni vogasiha, karu tamasi vikê tangara na meraha i Juta, karu vi: “Meraha ni Juta, i hega, kanimu pe bani hagenago kamu tamaniê, hanana ve aporo i ruma iaku?

¹²Igamu nga ka na goaku. Igamu nga ka na gapu mavoro iaku. I hega, kanimu pe bani hagenago kamu tamaniê, hanana ve aporo i ruma iaku?”

¹³O Tavite ki bonasirerua nikâ karu tamasi vikê tanga o Amasa, karu vi: “Igo nga ka na goaku. Haganega tenia i ngekê, inê be nakago, ku urusia o Joaba, ku bêngenira na mane ni me iaku. God ke nahuiê be me, manga vigê pe katokato vikana!”

¹⁴Na tamasinga iana o Tavite ki katora na me hato i Juta ka toto suria ngavê. Ngaira ka kasi tamasinga tanga, hanana vi aporo me henira na kariana hato.

¹⁵Matena i aporo me o Tavite, na me ni Juta ka râ vurusia ka mehetarahu i ve i Jotano. Ngaira ka râ me tanga i Gilegale, hanana viga bâbâsuria ki tarê igê na ve.

¹⁶Igê nga na matena ngekana o Simi, karena o Gera ni Bagurimi ki tango râ i Jotano, hanana vi mehetarahu na maneraha o Tavite.

¹⁷Ngaia ki merarâ me na rehagaro na mane ni me tenia na varo ninuni iana o Benamino. O Siba, i tagara tangara na ahemata iana o Saulo, ngaia nikâ ki merarâ me o karena tangahuru matare rima henira na tangahuru gi rua na kariana. Ngaira ka ata râ hagenago i Jotano, ma i hemuri ki ata me na maneraha o Tavite.

¹⁸Ngaira ka tarêhia na ve, hanana ga bâbâsuria na maneraha henira na me iana ka tarêhia na ve ma ka katogi na ani mavê na marâ ki obanigi na maneraha. Matena na maneraha ki nanê vi tarê, o Simi ki susure ki aba so i maana,

¹⁹ma ki vi: “Maneraha, gu bonotenigi na bagaparongaku tangago, matena go pania i Jerusaleme. Gu hagamareha vê. Siana ko takusia nikâ.

²⁰Maneraha, inê kê bani girara, vi inê kê tasi. Tahema inê kê hagenago me tenira na varo ninuni iana o Isiraele, hanana gê megoheterahu i ngekê.”

²¹O Abisai karena ka Seruia ki tamasi, ki vi: “O Simi ki araria vi meme, suria ngaia ki guharia na ani na Araha i atea ki maneraha.”

²²Ma o Tavite ki vi tangarerua o Abisai mo Joaba na goana, ki vi: “Ti kani hagategamurua, vigamuru tamasi? Muru obania vari, vigamuru hagarateku. Inê nga kanigê maneraha i Isiraele i ngekê. Siana hagetage ka nahuia ki meme ta na Isiraelita i ngekê!”

²³Ma ngaia ki vi tanga o Simi, ki vi: “Inê kê tohe, vi igo ki asa vige nahuigo ku me.”

²⁴Hemuri o Mepiboseti o vesina o Saulo ki râ me ki mehetarahu na maneraha. Ngaia ki pe tananigi na êgana, ki pe ninigi na taboturina se vige tananigi na gahu iana, haganega tenia na matena na maneraha ki pania i Jerusaleme mataro me na matena i aporo me bâkoro ma.

²⁵Matena o Mepiboseti ki ata me tenia i Jerusaleme, hanana vi mehetarahu na maneraha, na maneraha ki vi tanga, ki vi: “Mepiboseti, tanu hega kanigo pe pania i Jerusaleme heniê? Suria i hega?”

²⁶O Mepiboseti ki arami, ki vi: “Maneraha, igo ko bani girara, vi inê ka na mane gê tavi. Inê kê bonasia na kariaku ki hagarêa tangê na tonki iaku, hanana vigê tagiria kê arâ henigo. Ma ngaia ki hagaparuê.

²⁷Maneraha, ngaia ki hagaparugo reniê. Ma igo ko manga na angero iana God. Vikê gu katoa na tarana go takusia vi i koro.

²⁸Maneraha, na ahemata hato iana o vaemaku ki ararira, vigo mutera hato. Igo ko nakê kê megongê. Tahema, maneraha, i pe oto tangê, vi ve nungigo kê nikâ renia ta na marâ.”

²⁹Na maneraha ki arami, ki vi: “Naka vê. I koro ma. Inê kê bani naka, vi igo ma o Siba kamuru page tongania na mako iana o Saulo.”

³⁰O Mepiboseti ki arami, ki vi: “Naka vê o Siba ke nahunia hagenani ngaia. Tangê inê, ngaia hete kani igo go aporo me bâkoro ma.”

³¹O Barasilai ni Gileata ki râ me nogana tenia i Rogelimi, hanana vi bâbâsuria na maneraha i tarêhia i Jotano.

³²O Barasilai ki merahaga ngavê. Ngaia ki tonga na tangahuru ge varu na harisi iana. Ngaia ki ruruguha ngavê ma ki votogi na ngauha tanga na maneraha, matena na maneraha ki oga i Maganaimi.

³³Na maneraha ki vi tanga, ki vi: “Gu râ me heniê tanga i Jerusaleme. Inê kê page marupego.”

³⁴Ma o Barasilai ki arami, ki vi: “Maneraha, inê kê sugi meme noga. I pe arariê, vi ve arâ surigo tanga i Jerusaleme.

³⁵I bani tangahuru ge varu na harisi iaku. I bara ngavê vi ve vagevagesia ta na marâ. Inê ki bara ve ngê se vi ve tono hagagara renigi na marâ. Inê ki bara ve rongogi na ringeta na enoni ga kiki. Maneraha, i era ma kê hagamarâ apemu.

³⁶I pe arariê, vigu takusiê vikana. Inê be râ surigo râ ma suria na tara i na apanena tarê i Jotano.

³⁷Ma i ngekana ko kahu nakê kê aporo i pasiku ma kê meme hagarangia na anoanoterua na enaku. O kareku o Kimihama ikê. Gu merâ ngaia, hanana i tagara tangago. Maneraha, go katoa tanga na anima na tarana, go takusia vi i koro.”

³⁸Na maneraha ki arami, ki vi: “Inê be merâ ma be katogi tanga na ani mavê na marâ go obanigi. Ma inê be aganarigi na ani mavê na marâ, go nungiê renigi.”

³⁹Hemuri o Tavite ma na me hato iana ka tarêhia i Jotano. Ngaia ki ruia o Barasilai ma ki hagamauru koro tanga, ma o Barasilai ki aporo i pasina.

⁴⁰Na mane ni me ni Gate ma na apaneni me na mane ni me ni Isiraele ka bani bâsuria na maneraha, matena i tarê. Ngaia ki râ nga tanga i Gilegale ma o Kimihana ki râ henia.

⁴¹Hemuri na Isiraelita hato ka râ i pasina na maneraha ma ka hagatea, ka vi: “Maneraha, tanu hega na goaku na me ni Juta kaniga takusia, vi i oto tangara, viga torego ma ka bâbâsurigamu, igo, na ahemata iamu ma na me iamu, kamu tarêhia i Jotano?”

⁴²Na me ni Juta ka arami, ka vi: “Igami kami kato vikana, suria na maneraha ki na goamami. Ma ki tanu hega mu mangariaga renia na tarana ngekê? I hega, igami kami oga hagêguria vari re na ngêra iana? I hega, igami kami nahunigi vari tani na marâ suria vi ngaia?”

⁴³Na me ni Isiraele ka arami, ka vi: “Igami ki oto tangagami ngavê tanga na maneraha o Tavite teharihamu igamu, naka ma vi ngaia ki na goami. Tanu hega mu ruhigami? Mu pe takusia vari, vi igami kanimi hagenago kami tamasi renia na maneraha, hanana vigamu meaporo me?” Na me ni Juta ka tamasi ramo ngavê teharira na me ni Isiraele. Vikana na me ni Isiraele ka so renira.