Read Kahua 2 SAMUELE 2 Bible Online

2 SAMUELE 2 - Kahua bible

2 SAMUELE 2

¹Hemuri o Tavite ki hagatea na Araha, ki vi: “I hega, be râ vari tanga na hitangini na hinua i Juta ma be marungia?” Na Araha ki arami, ki vi: “I koro ma. Gu râ nga.” O Tavite ki hagate, ki vi: “Na anita na hinua?” Na Araha ki arami, ki vi: “I Heberone.”

²Vikê o Tavite ki râ i Heberone. Kaniana gi rua karu râ henia: ka Aginoama ni Jeserele ma ka Abigaile ni Karamele ka nâna o Nabala.

³Ngaia ki merarâ nikâ na mane ni me iana henira na ahemata iata. Ngaira ka ogasigi na hinua hagarangia i Heberone.

⁴Hoi, na ai ni Juta ka râ me i Heberone ma ka monea o Tavite ki maneraha i Juta. Matena o Tavite ki rongo, vi na ai ni Jabesi i Gileata ka bani bagia o Saulo,

⁵ngaia ki hagatorangenira râ na mane tora tamasinga, ka vi: “Na Araha ke korokoro tangagamu, suria mu hagabângenia na hagahigasiana iami tanga na maneraha iami, suria mu bagia.

⁶Tahema na Araha ke korokoro tangagamu ma ke ngahisigamu tare. Inê nogaku be komanigamu maninga renia na tauhami koro.

⁷Mu ramoramo ma kamu togeaga. O Saulo na maneraha iami ki me ma na ai ni Juta ka bani moneê kê maneraha iata.”

⁸O Abenere karena o Nere, i bêngenira na mane ni me iana o Saulo, ngaia ki bani megava o Isiboseti karena o Saulo, karu tarêhia i Jotano tanga i Maganaimi.

⁹I ngekana o Abenere ki kasia o Isiboseti ki maneraha ki marungigi na apaneni i Gileata, i Asere, i Jeserele, i Eparaimi ma i Benamino. Vikana ngaia ki marungia i Isiraele hagenani.

¹⁰Ngaia ki vora re na maneraha i Isiraele, matena i tonga na tangahuru ge he na harisi iana. Ngaia ki maneraha surigi na harisi gi rua. Na raraha iana o Juta ka toto suria o Tavite.

¹¹O Tavite ki oga i Heberone ma ki marungia i Juta surigi na harisi gi pi ma na hageha ge ono.

¹²O Abenere ma na mane ni hagaotonga iana o Isiboseti ka tavoraha i Maganaimi tanga na hinua i Gibeone.

¹³O Joaba karena ka Seruia ma na mane ni hagaotonga iana o Tavite ka merahetarahu igê na nonganonga. Ngaira hato ka oga so hetangenia.

¹⁴O Abenere ki vi tanga o Joaba, ki vi: “Ge atera tani na mane ni me iamu ma inê nogaku ma ka nakara ka heariha, hanana ga tarahua, vi o ti kani teha, igo se inê.” O Joaba ki arami, ki vi: “Hoita!”

¹⁵Vikê na mane ni me tangahuru matarerua, ga urusira o Isiboseti ma na raraha iana o Benamino, ngaira ka meraheariha na tangahuru matarerua na mane ni me iana o Tavite.

¹⁶Ngaira ka ranguigiheri na bêta, na vererua ma na vererua, ma ka ahuragiheri na ravota. Vikana ngaira hato na tangahuru gi rua matara ge he ka vota tagenata ka me. Tahema ka hêtana na agua i Gibeone ngekana, vi Mako ni Tatapa Borahu.

¹⁷Vikana na bagahearihatana raha ki haganega ma na me iana o Tavite ka teharira o Abenere ma na Isiraelita.

¹⁸O karena gi oru ka Seruia i ngekana henira. Ngaira ka no Joaba, o Abisai mo Asaele. O Asaele ki girara i tangotango teha manga na o vasiga.

¹⁹Ngaia ki tarigenia o Abenere, ki tari oto râ tanga.

²⁰O Abenere ki sira bê aporo, ma ki vi: “O Asaele kanigo?” O Asaele ki arami, ki vi: “Mako.”

²¹O Abenere ki vi: “Siana ko tarigeniê! Tarigenia hete ta na mane ni me. Ku rêa tenia na tangaruha iana.” Ma o Asaele ki ama ni tarigenia nga.

²²O Abenere ki vi tanga nikâ, ki vi: “Siana ko tarigeniê, i era ma kê nahuigo ko me. Tanu hega kani vigê merongasia o Joaba o veogamu?”

²³Ma o Asaele ki togeaga ma. Vikê o Abenere ki ahura bê aporo na obana renia na ora iana. Na ora ki ami i gerina. O Asaele ki vota so ki me. Ngaira hato, ga tariha i na agua i tâ igê o Asaele, ngaira ka ura so i ngekana.

²⁴Hoi, o Joaba ma o Abisai karu tarigenia nogaterua o Abenere. Matena i su na arito, ngairerua karu tariha igê na hungana i Ama kerekê i Giaga i tara tanga na bagamasusu raha i Gibeone.

²⁵Na me na raraha iana o Benamino ka hakuria aporo o Abenere ma ka nanê igê na hungana.

²⁶O Abenere ki ngiria o Joaba, ki vi: “I hega, ga ama ni heariha nga? Manga ngekana, na hemerongeana ki asa vige page hato. Igia ka na mane haku. Na me iamu ka tarigenigami taraha? I na keta ko bonasira ka nakagami so?”

²⁷O Joaba ki arami, ki vi: “Inê kê tohe renia God mamauri, manga gu pe tamasi, vikê na me iaku ke ama ni tarigenigo nga rârâ ma ki tariha i gomaha.”

²⁸Hoita o Joaba ki uhia na ahuri tangara na me iana, hanana ga nakara vê na Isiraelita. Ma na hearihatana ki hato so.

²⁹O Abenere ma na mane ni me iana ka tavo uga igê na maruguna i Jotano suria na bungiana hagenani. Ngaira ka tarêhia na ve i Jotano, ka tavo uga rârâ igê na mavoraro hagenani ma ka ata aporo i Maganaimi.

³⁰Matena o Joaba ki bani nakara vê na Isiraelita, ngaia ki hagahakura na me iana ma ki bâ aporusira na me tangahuru matare siva ma o Asaele.

³¹Na me iana o Tavite ka nahuira ka me na 360 na mane ni me iana o Abenere. Ngaira hato ka na raraha iana o Benamino.

³²O Joaba ma na me iana ka torea na gahuana o Asaele ma ka bagia i Beteleheme igê na matiku tangara na raraha iana. Hemuri ngaira ka tavo uga igê na bungiana hagenani ma ka ata râ i Heberone, matena i tangi râ.