Read Kahua 2 SAMUELE 20 Bible Online

2 SAMUELE 20 - Kahua bible

2 SAMUELE 20

¹I Gilegale ki oga igê na eragani nuni. Na atana ki no Seba, karena o Bikiri tenia na varo ninuni iana o Benamino. Ngaia ki uhia na ahuri ma ki ngere, ki vi: “Me ni Isiraele, naka vê o Tavite! Siana ka tongesuria! Nika, ge aporo i pasika!”

²Vikê na me ni Isiraele ka râ pania o Tavite ma ka pane henia o Seba, ma na me ni Juta ka ama ni toto suria nga o Tavite ma ka takua tenia i Jotano tanga i Jerusaleme.

³Matena o Tavite ki ata râ i ruma raha iana i Jerusaleme, ngaia ki torera râ na tangahuru gi tage na gete iana râ ma, i bani panira so ka bâsuria na ruma, ma ki purusira igê ta bogona na ruma iana. Ngaia ki nakara na mane ni anumasiha ka bâsurira. Ngaia ki marupera ma ki meramêru. Ngaira ka oga nga i ngekana mataro me ka me. Ngaira ka oga mangara na gete ga nâ.

⁴Na maneraha ki vi tanga o Amasa, ki vi: “Go hagahakura na me ni Juta ma o meraaporo me ikê i oge gomaha.”

⁵O Amasa ki râ ki hagahakura ma ki pe aporo me igê na matena i bani surua na maneraha tanga, vi aporo me igê.

⁶Vikê na maneraha ki vi tanga o Abisai, ki vi: “O Seba ki page hagarateka ngavê teharia o Abasalome. Gu merarâ na mane ni me iaku ma ko tarigenia, i era ma ki ogasigi tani na hinua nganganihaga ma ki tahitahi tenigia.”

⁷Vikana o Abisai ki bêngenira na mane ni me iana o Joaba, na mane ni anumasiha iana na maneraha, ma na mane ni me getera hato. Ngaira ka pania i Jerusaleme ma ka tarigenia o Seba.

⁸Matena ga tariha râ igê na bagahê raha i Gibeone, o Amasa ki merahetarahu igê. O Joaba ki bani hagesuru ni hearihatana. Ngaia ki hogotenia na hogosina henia na tatapa borahu igê na angana. Matena i ura me, na tatapa borahu ki amihura ki vota.

⁹O Joaba ki hagatea o Amasa, ki vi: “Go hega bamane?” Ma na rimana na otona ki here râ i taboturina o Amasa, hanana i ruia.

¹⁰Ma o Amasa ki pe hinarua rârâ vi na tatapa borahu kani i rimana na mahana o Joaba. O Joaba ki ahura na obana ma na auna obana ki tatahu so i ano. Ngaia ki me ototo râ nga, ma o Joaba ki pe araria vige ahura râ nikâ. Hemuri o Joaba ma o Abisai o vesina karu tarigenia nga o Seba.

¹¹Na hitangita na mane ni me iana o Joaba ki ura so hagarangia na gahuana o Amasa, ma ki ngere, ki vi: “Manga mu panepane henirerua o Joaba mo Tavite, hoi, mu arâ suria o Joaba!”

¹²Na gahuana gapugapuga o Amasa ki tâ i gupuna na tara. Na kariana o Joaba ki bâsira na me hato ga ura so. Vikê ngaia ki oke rataratagenia râ i bêmu na gahuana o Amasa tenia na tara ma ki tukuia renia na gahu.

¹³I murina i bani okea râ na gahuana tenia na tara, na me hato ka râ suria o Joaba ma ka tarigenia o Seba.

¹⁴O Seba ki aharêvoro igê na apanena iata na varo ninuni iana o Isiraele ma ki ata râ igê na hinua i Abele-Bete-Maka. Na hagosini nuni hato iana o Bikiri ka haku i ngekana ma ka takua ka banu i hinua.

¹⁵Na mane ni me iana o Joaba ka rongo, vi o Seba ki oga i ngekana. Vikê ngaira ka râ i ngekana ma ka oga rihia na hinua. Ngaira ka ukugi na mako ki akê suria na para ni hinua. Nikâ ngaira ka oparuguhia na para, hanana vi marupi.

¹⁶Ta na gete i takotako bâkoro, ki oga i hinua. Ngaia ki ura igê na para ni hinua ma ki ngere so, ki vi: “Vegamu! Rongo! Vi tanga o Joaba ke râ me. Inê kê obania ve metamasi!”

¹⁷O Joaba ki râ me, ma na gete ki hagatea, ki vi: “O Joaba kanigo?” O Joaba ki arami, ki vi: “Mako, inênga.” Na gete ki vi: “Gu karingê.” O Joaba ki arami, ki vi: “Inê kê karingago.”

¹⁸Na gete ki vi: “I nago na enoni ka vivi tare ka vivi, ‘Manga go obania, vigo girara ta na marâ, go arâ i hinua i Abele.’ Nga hanana ngekana.

¹⁹Na hinua iamami ki teha igê na marapeha ma na totosuriha teharigi na hinua getigi i Isiraele. Tanu hega ko obania vigo ruhuruhua? Go obania vari vigo hagaerasia ngavê na hinua iana na Araha?”

²⁰O Joaba ki arami, ki vi: “Mareha vê! I asa be hagaerasia se vi ve ruhuruhua na hinua iami.

²¹Na katoha iamami ki pe râ vikana. Ta na mane o Seba na atana o karena o Bikiri tenia i toro i Eparaimi ngaia kani katora na enoni, ka merongasia na maneraha o Tavite. Manga igamu ma kamu naka me tangê na vere tage togo na mane ngekana, hoi, inê kê naka so na hinua.” Na gete ki arami, ki vi: “Igami kami page kasia vato aharê vê na bêna igê na para ni hinua tangago.”

²²Hoi, ngaia na gete ki hagarongora na ai ni hinua renia na katoha iana, ma ngaira ka retenguria o Seba ma ka kasia vato aharê vê na bêna igê na para ni hinua tanga o Joaba. O Joaba ki uhia na ahuri, hanana na mane ni me iana ka naka vê na hinua. Ma ngaira ka aporo i pasita. Ma o Joaba ki aporo i Jerusaleme i pasina na maneraha.

²³O Joaba ki na mane i bêngenira na mane ni me ni Isiraele. O Benaia o karena o Joiata ki bêngenira na me ni anumasiha iana o Tavite.

²⁴O Atorama ki bâsurira na enoni i tugurira ka tagara. O Josapata o karena o Agilute ki bâsurira na enoni segesege.

²⁵O Seia ki na mane segesege igê na hagatamasiha. O Satoke mo Abiatare ka na mane ni vogasiha.

²⁶Mo Ira ni hinua i Jaire ki mane ni vogasiha iana o Tavite nikâ.