Read Kahua 2 SAMUELE 21 Bible Online

2 SAMUELE 21 - Kahua bible

2 SAMUELE 21

¹Suria na matena i maneraha igê o Tavite, ki na magêha raha surigi na harisi gi oru hagenani. Vikê o Tavite ki hagatea na Araha renia. Na Araha ki vi: “O Saulo ma na ahemata iana ka nahu enoni: ngaia ki hagamesira na enoni i Gibeone.”

²Na ai ni Gibeone ka mareha vi na Isiraelita. Ngaia ka na Amorita hete. Ngaira ka pe rako. Na Isiraelita ka bani suru viga anumasira, ma o Saulo ki obania vi mutera, hanana i tamanira na enoni ni Isiraele ma ni Juta.

³Vikê o Tavite ki unira me na ai ni Gibeone ma ki vi tangara, ki vi: “Be tamanigamu bâ hega? Inê kê obania ve hagaotoa na tarana i pe oto, ga bani katogamu renia, hanana vigamu nungia na Araha ke korokoro tangara na kariana.”

⁴Ngaira ka arami, ka vi: “Na seliva ma na golo ki asa vige hagaotoa na berarogamami, igami ma o Saulo ma na ahemata iana. Nikâ igami kami pe obania, vigami raherahe rumami renira na Isiraelita.” O Tavite ki hagatera, ki vi: “Hoi, vikana na ta kamu obaniê, vigê katoa tangagamu?”

⁵Ngaira ka arami, ka vi: “O Saulo ki obania vi mutegami ngavê, hanana i pe hitahita so na hitangimami i tagua ma ikê i Isiraele.

⁶Vikana gu tagarenira tangagami na vere pi na mane tenia na raraha iana. Igami kami page riguira i Gibea na hinua iana o Saulo, hanana mi hagakoro obana na Araha, i atea o Saulo ki maneraha.” Na maneraha ki arami, ki vi: “I koro ma. Be tagarenira tangagamu.”

⁷Suria na tohenga heri iaterua o Jonatane mo Tavite, tahema o Tavite ki hagatahia o Mepiboseti karena o Jonatane ma o vesina o Saulo.

⁸Ngaia ki torererua o Aramoni ma o Mepiboseti o kareterua o Saulo ma ka Risipa ka karena o Aia. Ngaia ki torera nikâ o karena gi rima iaterua ka Meraba ka karena o Saulo ma o Atiriele karena o Barasilai ni Megola.

⁹O Tavite ki tagarenira tangara na enoni ni Gibeone. Na ai ni Gibeone ka riguira igê na hungana, hanana ga hagakoro obana na Araha renira. Ma ngaira hato gi pi ka me haku. Ngaira ka me igê na matena ga mêa igê na ngêra, igê na matena na hutohutoêa.

¹⁰Hemuri ka Risipa ka karena o Aia ma na gete râ ma iana o Saulo ki tagarahia na mamaruku renigi na gahu tanga marena igê na hê, ga tâ igê na gahuata. Ngaia ki oga i ngekana haganega igê na matena na hutohutoêa mataro me igê na matena na hutuhutu baranga. Surigi na tangiani ngaia ki tarigenira na manu tenigi na gahuata, ma surigi na bungiani na marâ vasiga.

¹¹Matena o Tavite ki rongoa na tauhana ka Risipa,

¹²ngaia ki râ ki toregi na suriterua o Saulo mo Jonatane o karena tenira na enoni ni Jabesi i Gilegale. Ngaira ka bani hanagogi igê na mahera i Bete Sane, na agua na Pilisitina ka riguirerua igê na gahuaterua, i murina ga nahuia ki me o Saulo i hungana i Giliboa.

¹³O Tavite ki toregi na suriterua o Saulo mo Jonatane ma na surita nikâ na vere pi na mane ga bani riguira.

¹⁴Hemuri ngaira ka ahunigi na suriterua o Saulo mo Jonatane igê na anoanona o Kise o vaemana o Saulo i Sela igê na apanena iana o Benamino, manga hanana i bani bonasira vikana na maneraha. I murina ngekana God ki aganarigi na nunginungiha iata tanga na apanena iata.

¹⁵Ta na hearihatana ki akê me nikâ i berarogata na Pilisitina ma na Isiraelita. O Tavite ma na me iana ka râ ma ka meraheariha na Pilisitina ma ka tênga i Gobe. Rârâ, i ta na tangiana igê na hearihatana o Tavite ki me na apena.

¹⁶Ta na mane i borahu ma ki ramo ngavê ki oga i ngekana. Na atana ka no Isibibenobe. Ngaia ki têa na ora. Na higahigana na arara na aiani ki na ararina na kilo gi oru. Ngaia ki kuharenia i kâna na tatapa borahu haoru. Ngaia ki hagêguri vi ngaia ki page nahuia o Tavite ki meme.

¹⁷Ma o Abisai karena ka Seruia ki tamania o Tavite, ki taharia na mane i borahu ma ki nahuia ki me. Hemuri na me iana o Tavite ka katoa o Tavite, ki tohe, vi ngaia ki asa hagetage, vige page râ nikâ henira igê na hearihatana. Ngaira ka vi: “Igo ka na hagêguringa tanga i Isiraele hagenani. Igami kami pe obania, vigami têtê tara renigo.”

¹⁸I murina ngekana ka meraheariha nikâ na Pilisitina i Gobe, ma o Sibekai ni Gusa ki nahuia ki me o Sape, na mane i borahu ma ki ramo ngavê.

¹⁹Ngaira ka meraheariha na Pilisitina i Gobe nikâ, ma o Eleganana karena o Jaire ni Beteleheme ki nahuia ki me o Goliate ni Gate. Na ora iana o Goliate ki raha manga na apena na rimana na mane.

²⁰Hemuri ngaira ka heariha nikâ i Gate. I ngekana ki oga igê na mane i borahu ma ki ramo ngavê ma ki magêsi hearihatana. Na rimana gi rua karu tonge renigi na kakêni ge ono, tagenaterua ma nikâ igê na êgana gi rua.

²¹Ngaia ki hagararamo tangara na Isiraelita ma o Jonatane karena o Sima o veogana o Tavite ki nahuia ki me.

²²Na vere he ngegana ka na raraha iata na enoni ni Gate ga borahu ma ka ramo ngavê, ma o Tavite ma na mane ni me iana ka nahuira ka me.