Read Kahua 2 SAMUELE 22 Bible Online

2 SAMUELE 22 - Kahua bible

2 SAMUELE 22

¹Matena na Araha ki bani hagatahia o Tavite tenira o Saulo ma na merongana getera, o Tavite ki kiria na ki ikê tanga na Araha:

²Na Araha ki na hagêguringa iaku, i manga na ruma nganganihaga ngavê.

³God ki na hagêguringa iaku ma na tahingaku. Ngaia ki na hagamauri iaku. Ngaia ki ngahisiê ma ki anumasiê tenira na merongaku ramo.

⁴Inê kê avarasia na Araha ma ngaia ki hagatahiê tenira na merongaku. Ka visia raha na Araha.

⁵Inê kê haga ni tu igê na varo na mera. Inê kê manga na enoni na maganuha ki sugi ogo henia.

⁶Na mera ki haga ni toreê ma kê haga ni aporo i na kiru.

⁷Na matena ga tarahuê na bagabevoani, inê kê avarasia na Araha; inê kê avarasia na God iaku.

⁸Ki nunu raha ma ki angingi na maveta. Na hungani ka gisigisi ma ka maopa, suria God ki mangariaga ngavê.

⁹Na robona na gi ki hura me i barisuna ma ka hura me i harana na vavatani raha na gi ma na hê karekare ni sivi.

¹⁰Ngaia ki tangahia na vavearo ma ki so me igê na vaha na roto.

¹¹Ngaia ki tage igê na marâ i tonga na gagahana ma ki hatani gaha me garigari renigi na gagahani na roga.

¹²Ngaia ki aruha marena renia na roto hono. Na roto ni rangi ka rihia.

¹³Na hê karekare ni sivi ka hura me tenia na marangea i maana.

¹⁴Na Araha ki katoa na akurua i vavearo: na ringena na Araha God raramohaga hunia.

¹⁵Ngaia ki hanatenigi na mage ma ki tokorenira na merongana. Ngaia ki hanasira renigi na marangea ma ngaira ka gava sirasira.

¹⁶Na asi ki mamata tenigi na gatani na maveta, suria na Araha ki ramonira na merongana ma ki tamasi raha ni mangariaganiha tangara.

¹⁷Na Araha ki maroro so me ki tauê ma ki okeê akê tenigi na rutuni.

¹⁸Ngaia ki hagatahiê tenira na merongaku raramohaga ma tenira na ani ga ruhiê. Ngaira hato ka ramo tehariê.

¹⁹Matena gê pe ramoramo, ngaira ka tahariê, ma na Araha ki ngahisiê.

²⁰Ngaia ki tamaniê kê tahitahi. Ngaia ki hagatahiê, suria i koro na obana reniê.

²¹Na Araha ki vuriê, suria gê katogi na tarani ga oto ma koro. Ngaia ki korokoro tangê, suria gê pe tanua rârâ ta na marâ i era.

²²Inê kê bani râ surigi me na ramata iana na Araha ma kê pe murisigea na God iaku.

²³Inê kê marupegi tare na ramata hato iana ma ki asa iaku ve aharê igê.

²⁴Ngaia ki girarê, vigê matarotaro i maana ma kê pe tanua rârâ ta na marâ i era.

²⁵Tahema ngaia ki vuriê, suria gê katogi na tarani ga koro ma oto ma kê pe erasia rârâ ta na marâ.

²⁶Araha, igo ko toto surira na ani ga toto surigo. Igo ko korokoro tangara na ani ga matarotaro i maamu.

²⁷Igo ko takuira na ani ga matarotaro i maamu ma ko merongasira na ani ga bagaparongata.

²⁸Igo ko hagatahira na ani ga haritagi ma ko hagamakira na ani ga paroparo.

²⁹Igo, Araha ko mavesia na obaku ma ko mavesiê igê na roto.

³⁰Igo ko hagaramoniê kê taharira na merongaku. Renia na hetamaniha iamu inê kê teharira.

³¹Na God ngekê ki koro teha ngavê igê na ara ni parongana hato. Ngaia ki hagamonarigi tare na tamasinga iana. Ngaia ki ngahisira na enoni hatohato ga gavagava râ i pasina.

³²Ngaia getea ma na Araha ngaia ki God. Ngaia getea ma God ngaia ki anumasigia.

³³Na God ngekê ki hagaramoniê ma inê kê rukuruku i pasina. Ngaia ki ngahisiê, hanana gê arâ asitatara i tara.

³⁴Ngaia ki tamaniê hanana siana kê tapasu kê votavota. Ngaia ki uruê igê na barani.

³⁵Ngaia ki hagesuriê renia na hearihatana ma kê girara gê rohea na epage ni me.

³⁶Igo, Araha, ko anumasiê ma ko hagatahiê. Na hetamaniha iamu ki katoê kê teha.

³⁷Igo ko hagabarasira na merongaku ga henahurauê ma kê pe ato bera.

³⁸Inê kê tavogenira na merongaku ma kê teharira. Inê kê pe aporo me tenia na henahuita mataro me kê mutera ngavê.

³⁹Inê kê ahurara ka vota ka meme ma kê purira so i ano.

⁴⁰Igo ko hagaramoniê tanga na henahuita ma ko katoê kê teharira na merongaku.

⁴¹Igo ko katora na merongaku ka gavagava teniê. Inê kê mutera na ani ga merongasiê.

⁴²Ngaira ka avaravara ma ki asa vige tahi. Ngaira ka avarasia na Araha ma ngaia ki pe botage renira.

⁴³Inê kê nahu menamenarira, ka mangagi na momo. Inê kê purira so i ano manga na makomako i tara.

⁴⁴Igo ko hagatahiê tenira na ani ga merongasiê ma ko katoê, kê marungira na enoni i maveta. Na enoni gê pe bani girarara me i nago ka oga i ruguhaku i ngekê.

⁴⁵Na enoni mahuara ka bêtu tangê. Pusina ma ga girarê, ma ngaira ka tê viteaku.

⁴⁶Ngaira ka bagahagêguri ma ka magu ma ka hura me tenigi na ruma nganganihaga iata.

⁴⁷Na Araha ki mauri tare! Mu visia raha, suria i ngahisiê tare. Mu kasia akê God raramohaga hunia, suria ngaia ki hagatahiê.

⁴⁸Ngaia ki katoê, kê teharira na merongaku ma kê marungira na enoni hato i maveta.

⁴⁹Ngaia ki hagatahiê tenira na merongaku. Igo Araha, ko katoê kê teharira na merongaku ma ko anumasiê tenira na ani ga oga sutaga.

⁵⁰Tahema inê kê hagarahasigo i maata na enoni hato i maveta. Inê kê kirigo kê visigo raha.

⁵¹God ki katoa na maneraha ki tehateha. Ngaia ki ama ni takuia tare nga na ani i bani atea. Ngaia ki takuira tare, ki bê ki arâ, o Tavite ma na raraha iana.