Read Kahua 2 SAMUELE 23 Bible Online

2 SAMUELE 23 - Kahua bible

2 SAMUELE 23

¹Igê nga na tamasinga hagemuri iana o Tavite: “Inê o Tavite karena o Jese kê tamasi. Na Araha God ki kasiê akê, ki rongo raha na ataku. God, o Jakobo i rahesia, ki moneê kê maneraha. Inê ka na ani gê baro ki maninga tanga i Isiraele.

²Na raramohana na Araha ki tamasi i haraku. Inê kê tarohenia na tamasinga iana.

³God na Isiraelita ga rahesia, ki bani tamasi. God i anumasira na Isiraelita, ki vi tangê, ki vi: “Na maneraha i marungira na enoni suria na otoha, na maneraha i hagahigasia God,

⁴ngaia ki manga na arito i raboa i bagorana na matava. Na arito ki katogi na go ka togatoga i murina i rangirangi.”

⁵Ngekana nga hanana God ki page korokoro tangara na raraha iaku, suria ngaia ki naka heniê na suruheri, i asa vige page magahuru, na suruheri i asa vige page hato, na suruheri i asa vige page heurusige. Vikana ma kanigê obania. Na marâ hato ga girara ga hagakoro obaku, God ki page katogi ka voravora me mave.

⁶Ma na enoni ga pe sibea God ka mangagi na tone ga kasigi. I asa ta na enoni ge girara vige taugi,

⁷nga noga ga taugi na gira se na ora. Ga sungigi ki makaka ngavê.”

⁸Igê nga ka na atata na mane ni me ramo iana o Tavite i rongo raha na atata. Na ani hagenago ka no Isiboseti ni Gakamone. Ngaia ki na hitangita na vera oru i rongo raha na atata. Ngaia ki bêngenira oru. Ngaia ki manisingenia na hearihatana renia na ora. I ta na tangiana ngaia ki meraheariha na 800 na mane ma ki mutera hato ngavê.

⁹Na ruata na vera oru ngegana ka no Eleasare karena o Toto tenia na hagosi ni nuni iana o Agoaga. I ta na tangiana ngaia mo Tavite karu hagaramo tangara na Pilisitina, ga bani haku me tanga na hearihatana. Na Isiraelita ka sugare bê aporo,

¹⁰ma ngaia ki ura gatagata so hete. Ngaia ki rete tangotango renira rârâ ma ki paparakuga na rimana ma ki bara vige herekasia na tatapa borahu iana. Vikana na Araha ki katora na Isiraelita ka teha igê na tangiana ngekana. Matena i hato na hearihatana, na Isiraelita ka aporo tanga o Eleasare ma ka hanagogi na tangaruha tenira na mane ni me ga me.

¹¹Na oruta na vera oru ngegana ka no Sama karena o Age ni Harare. I ta na tangiana na Pilisitina ka bani haku me i Legi, na agua i oga igê na mu ni pini. Na Isiraelita ka gava tenira na Pilisitina,

¹²ma o Sama ki ura gatagata pusia na mu ngekana ma ki mutera na Pilisitina. Vikana na Araha ki katora na Isiraelita ka teha igê na tangiana ngekana.

¹³Na vera oru me nikâ na mane ni me ramo. Ngaira ka na hitangita na 30 na mane ni me ga rongo raha na atata. Igê na matena ga mêa igê na mu, ngaira hato ka râ i pasina o Tavite, i ahi igê na vaba i Atulama, henaka na Pilisitina ka tênga igê na maruguna i Rapaimi.

¹⁴I ta na tangiana o Tavite ki oga igê na agua ga pararihia igê na hungana ma na apanena na mane ni me na Pilisitina ki oga i Beteleheme.

¹⁵O Tavite ki maehasi takoha aporo i pasina i Beteleheme ma ki manava so raha, ki vi: “E, magaria ma ve tono na ve tenigi na vekaru hagarangia na maani para i Beteleheme! Ma ti kanige torea me tangê!”

¹⁶Hoi, na vera oru na mane ni me ngegana ka tahuru tarata ka banu tararua na tênga iata na Pilisitina, ka ti ve igê na vekaru ma ka migiaporo tanga o Tavite. Ma ngaia ki usi vige tono ma ki karangia ma i ano manga na vogasiha tanga na Araha.

¹⁷Ngaia ki vi: “Araha, i bara tangê vi ve tono. Manga gê totono, ki manga vigê tunumigi na gaputa na mane ngegê ga kasi manavata, ka tia me na ve ngekê tangê.” Tahema ngaia ki usia vige tono. Ngaia nga hanana na tauhata na vera oru na mane ni me ramo ngegana.

¹⁸O Abisai, o vesina o Joaba, kenaterua kani ka Seruia, ngaia ki raha renira na 30 na mane ni me ramo ngegana. I ta na tangiana ngaia ki meraheariha na 300 na merongana renia na ora ma ki mutera hato. Ngekana ngaia ki rongo raha na atana i berarogata na 30 na mane ni me ramo ngegana.

¹⁹Ngaia ki rongo raha ngavê na atana. Tahema ngaia ki raha renira na 30 na mane ni me ramo ngegana. Ma ki mareha vige rongo raha na atana mangara oru hagenago.

²⁰Ta na mane ni me nikâ i rongo raha na atana ka no Benaia, karena o Jehoiata ni Kabasele. Ngaia ki rongo raha na atana igê na hearihatana. I ta na tangiana ngaia ki nahuirerua na mane ni me ramo ngavê ni Moaba karu me. I ta na tangiana, matena na rogaroga huru, ngaia ki so igê na kiru i oga igê na laione ma ki nahuia ki me.

²¹Nikâ ngaia ki nahuia ki me na mane ni me ni Esipito i borahu ngavê ma ki tangaru renia na ora. O Benaia ki taharia renia na tarure iana, ki tahura na ora tenia ma ki ahura renia ki me.

²²Ngaigi nga ka na tauhana raha o Benaia na hitangita na 30 na mane ni me ramo ngegana.

²³Na atana ki rongo raha teharigi na atata na tamana ma ki mareha vige rongo raha mangara oru hagenago. O Tavite ki atea ki bêngenira na mane ni me ni anumasiha iana.

²⁴I berarogata na 30 na mane ni me ga rongo raha na atata ka oga igê nikâ: o Asahele, o vesina o Joaba, o Eleganane karena o Toto ni Beteleheme, o Sama mo Elika ni Harote, o Gelesi ni Bete Pelete, o Ira karena o Ikesi ni Tekoa, o Abiesere ni Anatote, o Mebunai ni Gusa, o Salamone ni Agoaga, o Maharai ni Netopa, o Gelebe karena o Bana ni Netopa, o Itai karena o Ribai ni Gibea igê na apanena iana o Benamino, o Benaia ni Piratone, o Hitai ni Nagale Gasa, o Abialabone ni Bete Araba, o Asamavete ni Bagurimi, o Eliagaba ni Salabimi, o Jasene ni Gune, o Jonatane karena o Sama ni Harare, o Agiama karena o Sarare ni Harare, o Elipeleti karena o Agasibai ni Bete Maka, o Eliama karena o Agitopele ni Gilo, o Geseroni ni Karamele, o Parai ni Araba, o Igala karena o Natane ni Soba, o Bani ni Gata, o Seleke ni Amone, o Nagarai ni Berote i to(...)