Read Kahua 2 SAMUELE 24 Bible Online

2 SAMUELE 24 - Kahua bible

2 SAMUELE 24

¹I ta na tangiana na Araha ki mangariaga nikâ tangara na Isiraelita ma ki katoa o Tavite ki hagamamasiaga apeta. Na Araha ki vi tanga, ki vi: “Go tomanira na enoni i Isiraele me Juta.”

²Vikê o Tavite ki bonasia o Joaba, na mane i bêngenira na mane ni me iana, ki vi: “Mu arâ, igo ma na mane ga bêngenira na mane ni me, ma kamu arâhira hato na varo ninuni iana o Isiraele suria na apanena hagenani ma kamu tomanira na enoni. Inê kê obania vigê girara vi gi hita.”

³O Joaba ki aramia na maneraha, ki vi: “Maneraha, na Araha God iamu ke hagarakonira na Isiraelita hagetangarê me nikâ teharia i ngekê, ma ke katogo ku tahi togâna na matena i hagarakonira igê vikana. Ma ki hega igo maneraha kanigo obania vikana?”

⁴Ma na maneraha ki tugurira o Joaba ma na mane ga bêngenira na mane ni me, ka tê viteana. Ngaira ka tavoraha tenia ma ka râ, hanana viga tomanira na Isiraelita.

⁵Ngaira ka tarêhia i Jotano ma ka tênga hagarangia i Aroere na hinua i gupuna na maruguna i na apanena iana o Gati. Tenia i ngekana ngaira ka râ tanga i Jasere,

⁶ma ka râ nga tanga i Gileata ma i Katesi i na apanena iata na Hitita. Hemuri ngaira ka râ tanga i Tane, ma tenia i Tane ngaira ka bêso tanga i Sitone.

⁷Hemuri ngaira ka râ tanga i Taire na hinua nganganihaga ma ka râ nga tangagi na hinua hato iata na Givita ma na Kananita, ma hemuri tanga i Bereseba igê na Negeve i Juta.

⁸Hoi, i murini na hageha ge ono ma na tangahuri tangiani gi rua ngaira ka aporo tanga i Jerusaleme. Ngaira ka bani râhia na apanena hagenani.

⁹Ngaira ka hagarongoa na maneraha vi gi hita ka na mane i ararira viga mane ni me: na 800,000 i Isiraele ma na 500,000 i Juta.

¹⁰Matena o Tavite ki tomanira hato, ngaia ki tangahuria ma ki vi tanga na Araha, ki vi: “Inê kê tasi bâraha suria gê kato vikana. Gu takuiê. Gu bonotenia na tasi iaku. Inê kê kato bekabekaga ngavê.”

¹¹Na Araha ki vi tanga o Gati na poropete i oga i pasina o Tavite, ki vi: “Gu râ ma ku hagarongoa o Tavite, vi inê kê nakagi tanga na tarani gi oru. Inê kê page katoa na anima na hitangini i atea.” Ki tangi me, matena o Tavite ki bani rite,

¹³ma o Gati ki râ i pasina ma ki hagarongoa renigi na tamasinga iana na Araha. Ngaia ki hagatea o Tavite, ki vi: “Na ani ta ko atea? Na magêha suria na apanena iamu surigi na harisi gi oru, se go gavagava tenira na merongamu surigi na hageha gi oru, se na ringa suria na apanena iamu surigi na tangiani gi oru? Hoi, gu oga ku tako ma ko kahu hagarongoê me renia na aramiha iamu, hanana gê meaporo tanga na Araha.”

¹⁴O Tavite ki arami, ki vi: “E, i bara ngavê tangê vikana! Inê kê pe obania na hagaitangiha i arâ me tenira na enoni. Na Araha hete kani ge hagaitangigami, suria ngaia kani i girara i hetaki.”

¹⁵Vikê na Araha ki naka na ringa ki tarahua i Isiraele, haganega tenia na mavorarotana ngekana mataro me na matena na Araha ki bani naka. Suria na apanena hagenani ka me na 70, 000 na Isiraelita.

¹⁶Matena na angero iana na Araha ki sugi hagamesia i Jerusaleme, na Araha ki urisi parongana renia na hagaitangiha tangara na enoni. Tahema ngaia ki vi tanga na angero i hagamesira na enoni, ki vi: “Nakara vê! I uhu noga!” Na angero ki oga hagarangia na agua ni haatanga iana o Arauna na Jebusita.

¹⁷O Tavite ki bâsia na angero i hagamesira na enoni, ma ki vi tanga na Araha, ki vi: “Inênga hete kanigê tasi. Inênga hete kanigê hagaera. Na bagenuni ngegana ka pe erasia rârâ ta na marâ. Gu hagaitangigami hete, inê ma na ahemata iaku.”

¹⁸Igê nga na tangiana ngekana o Gati ki râ i pasina o Tavite ma ki vi tanga, ki vi: “Gu tagere tanga na agua ni hatanga iana o Arauna ma ku tagarahia igê na bea ni vogasiha tanga na Araha.”

¹⁹O Tavite ki tê viteana na Araha ma ki râ suria na tamasinga iana o Gati tanga.

²⁰O Arauna ki sira vato ma ki bâsira na maneraha ma na mane ni hagaotonga iana ga tagere me tanga. Ngaia ki susure ma ki aba so i ano i maana o Tavite,

²¹ma ki hagatea, ki vi: “Maneraha, na ta ko râ me tanga ikê?” O Tavite ki arami, ki vi: “Inê kê obania, vigê vuria tenigo na agua ni hatanga iamu be tagarahia igê na bea ni vogasiha tanga na Araha, hanana ge hato na ringa.”

²²O Arauna ki arami, ki vi: “Maneraha, i koro ma gu nahunia igo. Gu vogasia na Araha renigi na anima na marâ go takusigi. Na puruka ni tagaraha gi oru igê. Gu susu renira igê na bea ni vogasiha. Na ario ka na totora iata ma na papa ni hatanga igê.

²³Na marâ hato ngegana ka na animu. Na Araha God iamu ke aganaria na vogasiha iamu.”

²⁴Ma na maneraha ki arami, ki vi: “Mareha. Inê kê obania gê vurivuri. Inê kê pe obania ve rahesia na Araha renigi na vogasiha gê toregi purua ma.” Vikê ngaia ki vuria na agua ni hatanga ma ki vurira na puruka gi oru ni tagaraha renigi na maani na siliva tangahuru gi rima.

²⁵Hemuri ngaia ki tagarahia na bea ni vogasiha tanga na Araha, ma ki susu igê tanga na Araha, ma ki vogasia renigi na vogasiha ni ngêra tanga ga ngê haku. Na Araha ki aganaria na avarasiha iana o Tavite ma na ringa ki hato tenia i Isiraele.