Read Kahua 2 SAMUELE 3 Bible Online

2 SAMUELE 3 - Kahua bible

2 SAMUELE 3

¹Na hearihatana i berarogata na apanena iana o Saulo ma na apanena iana o Tavite ki râ borahu era. O Tavite ki rârâ ma ki kahu ramo ngavê, ma na apanena iana o Saulo ki rârâ ma ki kahu so ngavê.

²I Heberone o Tavite ki aparara igê o karena ge ono. Ngaira kani igê: hagenago o Amanone, kenana kani ka Aginoama ni Jeserele;

³na ruata ka no Kileaba kenana kani ka Abigaile ni Karamele ka nâna o Nabala; na oruta ka no Abasalome kenana kani ka Maka, ka karena o Talamai na maneraha i Gesure;

⁴na heta ka no Atonia, kenana ka Gagiti; na rimata ka no Sepatia, kenana kani ka Abitale;

⁵na onota ka no Itereama, kenana kani ka Egela. O karena hato ngegana ka vora i Heberone.

⁶Matena i tavoraha mênga na hearihatana i berarogaterua na apanena iana o Tavite ma na apanena iana o Saulo, o Abenere ki kahu ramo ngavê i berarogata na enoni, ga pane henia o Saulo.

⁷I ta na tangiana o Isiboseti karena o Saulo ki tuguria o Abenere, ki vi: “Tanu hega kanigo memêru ka Risipa ka karena o Aia kaniana râ ma o Saulo?”

⁸Vikana o Abenere ki mangariaga ngavê ma ki vi tanga o Isiboseti, ki vi: “Gu takusia vari vi na o kani inê? Gu takusia vari, vi inê kê pane henia Juta? Bâ, inê kê toto surira tare o vaemamu o Saulo, na goana ma na tamana. Inê kanigê roherohe pusigo tare, hanana vi siana o Tavite ki teharigo. Ma i ngekê igo ko visiê, vigê katoa na tarana i pe oto henia na gete!

⁹Na Araha ki surua tanga o Tavite, vi ngaia ki page hatungia na arahanga tenira o Saulo ma na raraha iana, ma ki page kasia o Tavite ki maneraha i Juta ma i Isiraele nikâ, i na apanena hagenani. Na Araha ke nahuiê be me, manga vi inê ma kê pe katoa ke vagavaga me mave na suruha ngekana!”

¹¹O Isiboseti ki pe tamasi bê aporo rârâ, suria i magutenia bâraha o Abenere.

¹²O Abenere ki hagatorangenira na mane tora tamasinga tanga o Tavite, i oga i Heberone, ka vi: “Ti kani marungia na apanena ikê? Garu heaganari, hanana gê page tamanigo, hanana i Isiraele hagenani ki page panepane henigo.”

¹³O Tavite ki arami, ki vi: “Hoita! Matena go arâ me go merâ me nga ka Mikale ka karena o Saulo. Manga i mareha, na heaganariha iakerua ki asa vige akê me.”

¹⁴O Tavite ki hagatorangenira nikâ na mane tora tamasinga tanga o Isiboseti, ka vi: “Vateê aporo ka Mikale kaniaku. Inê kê bani vuria renigi na tangarê gi tage na gavoni na varata na Pilisitina, hanana vigê aruragia.”

¹⁵Vikê o Isiboseti ki torea vê ka Mikale tenia o vaniana o Palatiele karena o Laisi.

¹⁶O Palatiele ki angi gogogo suria kaniana rârâ ma ki tariha i hinua i Bagurimi. I ngekana o Abenere ki vi: “Gu aporo.” Ma ngaia ki aporo.

¹⁷O Abenere ki râ i pasita na enoni raha i Isiraele ma ki vi tangara, ki vi: “I arihu me noga igamu kamu bani obania vi o Tavite ke maneraha iami.

¹⁸Hoi, ikênga nga na matena koro tangagamu. Mu takusia aporo na tamasinga iana na Araha, i vi, ‘Renia na kariaku o Tavite inê be hagatahira na kariaku na Isiraelita tenira na Pilisitina ma tenira na merongata getera hato.’”

¹⁹O Abenere ki tamasi nikâ tangara na raraha iana o Benamino, ma hemuri ngaia ki râ i Heberone ki hagarongoa o Tavite renia na heaganariha i berarogata na varo ninuni iana o Benamino ma na Isiraelita.

²⁰Matena o Abenere henira na me iana tangahuru gi rua ka bani ata vê i Heberone i pasina o Tavite, o Tavite ki magoto tangara.

²¹O Abenere ki vi tanga o Tavite, ki vi: “Hoi maneraha, inê be râ ma be katoa i Isiraele hagenani ke pane henigo. Ngaira ka page aganarigo ko maneraha iata. Vikana ki page togotogo na obaniha iamu ma ko page marungia na apanena hagenani.” O Tavite ki surua tanga, vi arâ purupurunguniaga.

²²I murina ma ngekana o Joaba, ki bêngenira na mane ni me iana o Tavite ma na mane ni hagaotonga getera iana o Tavite, ka râ ka rurugu ma ka migiaporo me rako teha ngavê na marâ ga henahuraugi. O Abenere ki bani râ tenia o Tavite i Heberone, suria o Tavite ki kasia vê ki râ ma ki surua tanga, vi arâ purupurunguniaga.

²³Matena i ata me o Joaba henira na me iana, ngaia ki rongo, vi o Abenere ki bani vatugia me na maneraha o Tavite, i kasia vê ki râ ma ki surua tanga, vi arâ purupurunguniaga.

²⁴Vikê o Joaba ki râ i pasina na maneraha ma ki hagatea, ki vi: “Na tarana ta go katoa? Inê kê rongo, vi o Abenere ki vatugigo me! Tanu hega kanigo kasia vê ki râ vikana?

²⁵Ngaia ki râ me ikê, hanana vi hagabekasigo, ma hanana vi tarahua na katoha iamu ma vi i he ko arâ igê. Igo ko bani girara!”

²⁶Matena o Joaba ki bani hura me tenia o Tavite, ngaia ki kasira na mane tora tamasinga, hanana viga meaporo o Abenere. Ngaira ka meaporo me tenia na vekaru i Sira. Ma o Tavite ki pe hagare rârâ.

²⁷Matena o Abenere ki ata i Heberone, o Joaba ki meura râ getea igê na maanipara ni hinua. Ngaia ki kato manga vi tamasi pinihi tanga. Manga i ngekana ngaia ki ahura na obana. Vikana o Joaba ki nahuia ki me o Abenere baruna o Asaele o vesina.

²⁸Matena o Tavite ki rongo, ngaia ki vi: “Na Araha ki girara, vi na tarana i katoa o Joaba ki pe takegami na kariaku menê.

²⁹Na hagaitangiha mena ke tarahura hete o Joaba ma na apaparaha hagenani iana. Ta na mane surigi na apaparaha iana ke tarahua na hiraga, se na asiahu, se i araria ma na tagaraha iana na gete, se i meme igê na hearihatana, se i magê tare!”

³⁰Vikê o vahegoana o Joaba mo Abisai karu nahuia ki me o Abenere baruna o Asaele o vesiterua, i me igê na hearihatana i Gibeone.

³¹Hoi, o Tavite ki bonasira o Joaba ma na mane ni me iana ka tarisigi na tuguni iata ma ka tuguni kakaga ka angisia o Abenere. Matena ga râ tanga ga bagia, o Tavite ki mumuria na gahua.

³²Ngaira ka bagia o Abenere i Heberone ma na maneraha ki angi raha igê na anoano, ma na enoni hato nogata.

³³O Tavite ki angi maramara vikê: “O Abenere, tanu hega ko me igê na tarana i pe hagarahasigo?

³⁴Na rimamu ka pe rakugi. I mareha na seni i ugamu. Igo ko me manga na enoni na manero ka nahuia ki me!” Ma na enoni ka angisia aporo nikâ.

³⁵Suria na tangiana hagenani na enoni ka uhungia o Tavite, hanana vige ngê. Ma o Tavite ki tohe, ki vi: “God ke nahuiê be me, manga vigê ngêngê, matena i tangitangi mênga!”

³⁶Ngaira ka aganaria na tamasinga ngekana ma ka naka ma vê. I monari, na ara ni marâ i katogi na maneraha, na enoni ka aganarigi.

³⁷Na kariana hato o Tavite ma na Isiraelita hato ka aitangisia, vi na mera iana o Abenere ki pe takea rârâ na maneraha.

³⁸Na maneraha ki vi tangara na mane ni hagaotonga iana, ki vi: “Mu pe girara vari, vi i ngekê ki me na mane i bêngenira bâkoro na Isiraelita?

³⁹Henaka God ki ateê kê maneraha, inê ki mamênga vi ve raramohaga. O karena ka Seruia ngegana ka ramo tehariê mênga. Na Araha ke hagaitangira na manero ngegana renigi na meni ga ararira!”