Read Kahua 2 SAMUELE 5 Bible Online

2 SAMUELE 5 - Kahua bible

2 SAMUELE 5

¹Na varo ninuni hato iana o Isiraele ka râ i Heberone i pasina o Tavite ma ka vi tanga, ka vi: “Igo ma igami ka na gapu mavoro.

²I nago, matena o Saulo ki maneraha iaka mênga, igo ko bêngenira na Isiraelita tanga na hearihatana. Ma na Araha ki surua tangago, vi igo ko page bêngenira na kariana ma ko marungira.”

³Vikê na enoni raha hato i Isiraele ka râ me i Heberone i pasina na maneraha o Tavite. Ngaia ki katoa na heaganariha henira i maana na Araha. Ngaira ka monea ki maneraha i Isiraele.

⁴O Tavite ki tonga na tangahuru gi oru na harisi iana, matena i vora re na maneraha, ma ki maneraha surigi na harisi tangahuru ge he.

⁵Matena i oga i Heberone, ngaia ki marungia i Juta surigi na harisi gi pi ma na hageha ge ono, ma na matena i oga i Jerusaleme, ngaia ki marungirerua hagenani i Isiraele me Juta surigi na harisi tangahuru gi oru matare oru.

⁶Hoi, na maneraha o Tavite ma na mane ni me iana ka tavo uga tanga ga taharia i Jerusaleme. Na ai ni Jerusaleme na Jebusita ngaira ka takusia ma, vi o Tavite ki bara tanga vige henahuraua na hinua iata. Tahema ngaira ka vi tanga, ka vi: “I bara vê tangago, vigu banu me ikê. Henaka vi na ani ga guru se ga tavi, ngaira ka girara ma ga rêra pusigo hura.”

⁷Henaka, ma o Tavite ki henahuraua i Sione na hinua nganganihaga iata. Hemuri ka hêtana vi na hinua iana o Tavite!

⁸I na matena ngekana o Tavite ki vi tangara na me iana, ki vi: “Ti ka na hitangimi i kitenira na Jebusita manga inê? Ti kani obania vi mutera? Hoi, mu sivasiva akê igê na tara tanga na ve ma kamu taharira na enoni ga guru ma ka tavi ngegana.” Tahema na enoni ka vivi tare, vi na enoni ga guru ma na ani ga tavi ki asa vige banu i ruma iana na Araha.”

⁹Matena ga henahuraua hato i Sione, o Tavite ki ogasia ma ki hêtana vi ‘Hinua iana o Tavite.’ Ngaia ki tagarahia na para rihia i Sione, haganega tenia na kere bena i Milo kerekê tanga na ruma nganganihaga iana igê na hungana i Sione.

¹⁰Ki rârâ ma o Tavite ki raramohaga ngavê, suria na Araha God raramohaga hunia ki ngahisia.

¹¹O Girama na maneraha i Taire ki hagatorangenira na mane ka râ tanga o Tavite ka metamasi, hanana vige tagarahia na ruma raha iana. Ngaia ki vatea renigi na bagorani na apinige ma renira na mane ga manisingenia na tagaraha ni ruma renigi na bagorani na apinige ma renira na mane ga manisingenia na tagaraha ni ruma renigi na apinige ma na hê.

¹²Vikana o Tavite ki tahetara, vi na Araha ki naka ki maneraha raramohaga i Isiraele, hanana na enoni ka gâga igê na ramana.

¹³Matena o Tavite ki aharaga hato tenia i Heberone tanga i Jerusaleme, ngaia ki torera akê nikâ tani na gete, tani ki êragira monari ma tani ka na gete iana râ ma, ma ki aparara akê nikâ o karena ma ka karena.

¹⁴Ikê nga na atata o karena i aparara i Jerusaleme: O Samua, o Sobaba, o Natane, o Salomo,

¹⁵o Ibigare, o Elisua, o Nepege, o Japia,

¹⁶o Elisama, o Eliata ma o Elipeleti.

¹⁷Na Pilisitina ka rongo, vi o Tavite ki maneraha i Isiraele. Tahema na mane ni me iata ka râ tanga viga taua. Matena o Tavite ki rongo vikana, ngaia ki vato tanga na agua i hagagara koro vi tahitahi igê.

¹⁸Na Pilisitina ka ata igê na maruguna i Repaimi ma ka ogasia.

¹⁹O Tavite ki hagatea na Araha, ki vi: “I hega, i koro ma vari vigê taharira na Pilisitina se mareha? I hega, igo ko page katoê vari kê teharira se mareha?” Na Araha ki arami, ki vi: “Gu taharira! Inê be katogo ko tehateha!”

²⁰Hoi, o Tavite ki râ tanga i Bala Perasimi, ma i ngekana ngaia ki teharira igê na Pilisitina. Ngaia ki vi: “Na Araha ki manga na maganuha raha i musira na merongaku.” Tahema ga hêtana na agua ngekana vi Bala Perasimi, i vi na Araha ni Musiha.

²¹Matena na Pilisitina ka gava, ngaira ka panigi so na nunuta na ataro iata, ma o Tavite ma na me iana ka toregi vê.

²²Hemuri na Pilisitina ka aporo me nikâ igê na maruguna i Repaimi ma ka ogasia aporo.

²³O Tavite ki hagatea nikâ na Araha. Na Araha ki arami, ki vi: “Siana ko taharira i na apanena bê me ikê. Gu rihu hete ma ko taharira bême i murita tenia na vapuna.

²⁴Matena go rongo na tavo uga igê na bêni na apinige, hoi, go taharira, suria inênga be tavo uga be nanago taramu, hanana gê teharira na mane ni me na Pilisitina.”

²⁵O Tavite ki râ suria na tamasinga iana na Araha, ki teharira na Pilisitina ma ki tarigenira, haganega tenia i Geba ki râ tare tanga i Gesere.